¹ Jakob bo thangpinlaba odehe lama ha bo, deglarao khe goronba. ² Jakob bonsi khe nuhi thiba, "Ebode Madai ni nohse," odejang bo hahthan khe, bo Mahanaim thiba. ³ Edom haphai ni Seir haphai ha boni bada dongyaba Esau ne Jakob graojma haidahaba. ⁴ Bo, bonsi khe thiba, "Ebo graojma khe ani gedema Esau ne sainthitha: Nini dangyahsa Jakob thidu: 'Ang Laban jang dongphaba, ode phaipinba lenba. ⁵ Ani ha mih buthu ode mihleng, dangyahsarao, dangyahjikhrao dong. Ang nini khasaoma maimane ang ebo graojma khe ani gedema ne haihaladu. ⁶ Graojma langyarao Jakob niha phaipinhi thiba, "Jing nini bada Esau niha thangba. Bo, ning jang goronmane phaidu, bo jang baosi rjabri siphayarao phaiphadu. ⁷ Odehe Jakob khinsingdu ode waimu nangdu. Odejang, bo, boni subungrao, mih buthu, melma buthu khrip khe dolgin khlaihi ronphaiba. ⁸ Bo thiba, "Esau phaihi dolsi khe daikhripdu tikhade dolsi gibin ha dongyarao khailangma." ⁹ Jakob thiba, "Ani abai Abraham ni Madai ode ani abai Isaac ni Madai, ang khe thiyaba, 'Jarni raji ha, hainthi dongyarao niha thangphin ode ang ning khe hamthai gablairinang.' ¹⁰ Ning ebo dangyahsa ni basao ha khasaoyaba ode lonma dengyaba; ang olai latha jaya bede tikhade ang ebo goda jang Jordan dibu baiba, duhade dolgin jakha. ¹¹ Ani bada ni yao niprang ang khe sgo, Esau ni yao niprang, bede tikhade ang bo khe khindu, bo phaima, ode ang khe ani basa bisikhthu khe daikhriptharma. ¹² Tikhabo ningla thiba, 'Ang ninthane hamthai rima. Ang nini sah sikh khe dimlang ni hajenglai, sainsophuyasi bangrima." ¹³ Okhali ni hor ha Jakob orahaniing dongba. Boni ha dongyaba khe bo, Esau ne yaosandi dengba: ¹⁴ rjagin burun jikh ode burun jla makhon, rjagin melma jikh ode melma makhon, ¹⁵ gaker riyaba mih hajeng mathimji ode boni basa buthu, musu jla maji, mihleng jikh makhon, ode mihleng jla maji dengba. ¹⁶ Ebo buthu khe bo, boni dangyahsarao ni yaoha dengba. Bo, boni dangyahsarao khe thiba, "Ani sgang sgang thangphalang odehe khrip mih buthu ni gejeha hatho deng." ¹⁷ Sgangthaoyaba dangyahsa khe bo thiba, "Ani bada Esau khe ning goronkhade ode ning khe singkhade, thi, 'Ningla sere ni subung? Ningla baraha thangma? Nini sgang sgang dongyaba mih buthula sereni?' ¹⁸ Ode ning thipinma nangma, 'Bo buthude nini gedema Jakob ni. Ebo buthu khe ani gedema, Esau ne yaosandi haihaba. Naiha, bobo jini yahon yahon phaidu." ¹⁹ Dolginba dol jang dolthamba dol khebo, Jakob thiba, "Esau thibalai jasosi nisibo thima nangma. ²⁰ Nisi ebo grao khe asalai tikhabo thima nangma, 'Nini dangyahsa, bobo jini yahon yahon phaidu." Bede tikhade bo baoba, "Bonthane yaosandi haidahahi ang boni thampsi mgainrima. Boni yahon ha, ang bo khe nuba ha, ang khe, bo lamjaophaima." ²¹ Odejang, boni sgang sgang yaosandi haidahaba. Bode okhlali hor ha, noh haniing dongbase. ²² Jakob, hokhjer ha baijaba ode boni nobrajhikh gini, dangyahjikhrao gini, ode boni basathu jise khe langba. Bo, bonsi khe Jabbok ni nohkhrong ha haihaba. ²³ Dikhong dikhong khe jahi bo, bonsi khe don somphothi jang baosi haihaba. ²⁴ Jakob saojang thaoba ode subung saosi jang phorong sosi dolaiba. ²⁵ Bo subung, bo khe dephuyabani boni yathong ha gaiba ode boni yathong baiba. ²⁶ Bo subung thiba, "Ang khe haiger, bede tikhade yathong baikha." Jakob thiba, "Anthane ning hamthai riyasi ang ning khe haihaya." ²⁷ Bo subung, bo khe thipinbakho, "Nini bumu snadi?" Jakob thipinba, "Jakob." ²⁸ Bo subung thiba, "Nini bumu dini niprangde Jakob janang niyakha, Israel se jasima. Bede tikhade ning Madai jang ode subung jangbo nanglaiba ode ning deba.," ²⁹ Jakob, bo khe singba, "Khasaohi nini bumu khe thihasang." Bo thiba, "Ningla sumu jabani ani bumu khe singbakho?" Odehe bo, bonthane hamthai riba. ³⁰ Jakob, bo hahthan khe Peniel bumu denghi thiba, "Ang, Madai ni muhkhang khe nuba ode ani hayu golam maiba." ³¹ Jakob, Peniel niprang thanglaba ni yahon ha sain baigoba. Yathong ha dojaobani bo lengra jaba. ³² Odejang, Israelsarao dinini basain habo yathong gbai khe jiya, bede tikhade bo subung Jakob ni yathong khe dophaiba.