Bojom 31

1 Laban ni basathu ni grao khe Jakob khnaba, bonsi thilaiba, "Jini bupha ni maiphain khe Jakob langtharlaba, ode jini bupha ni don somphothi jang bo dini gnang jaba. 2 Jakob, Laban ni muhkhang khe naiba. Boni gede bo naibaha naithai gibin jaba. 3 Odehe Madai, Jakob khe thiba, "Nini bupha niha, hainthi niha ning thangphin, ang ning jang baosi dongphadu." 4 Hadao ha mih raokhihi dongyaba Rachel jang Lea ne graojma haihahi bonsi khe Jakob longhaba 5 ode bonsi khe thiba, "Nini bupha ang khe naiba ha naithai slaiba khe ang nuba, tikhabo ani abai ni Madai ang jang dongphadu. 6 Ang nini bupha khe, aniha bol dongbalalai naisoba thihi ning mithidu. 7 Nini bupha ang khe thokhiba ode ani sainruji khe alangji slaiba, tikhabo bo, ang khe dukhu rimane Madai bonthane hajora riya. 8 Bo thire tikhade, "Mih merang buthude nini khlaihi gma jama; odehe khrip mih buthu merang basa jatharba. Bo thire tikhade, "Mih merangde nini khlaihi gma jama; odehe khrip merang basa hajaiba. 9 Olai jathai jahi, nini bupha ni mih buthu khe Madai langtharlaba ode anthane yaophaba. 10 Basa dongthor ha, ang saomin masi nuba, burun jla burun jikh jang jegelaiba. Burun jla jakha merang, bumin gnang. 11 Madai ni degla ang khe saomin ha thiba, 'Jakob.' Ang thipinba, 'Ang eraha dong.' 12 Bo thiba, 'Muhthai naikhuha sang, burun jla buthu burun jikh buthu jang jegelaidu. Bo buthude merangse, bumin gnangse bede tikhade nini basao ha Laban khusi dangyaba khe ang nudu. 13 Ning thao huhi thong gaikhuba ha, ning ani ha gonglaiyaba ha angde Bethel ni Madaise. Duha ning baija, ode ebo hahtha khe garhi thangla ode ning jar hajaiyaba hahthan ha thangphinla." 14 Rachel jang Lea thiphinba, "Jini khlaihi abai ni noh ha asaba jing maiginyaba ba jini japhuginyaba dong? 15 Jing khela bo naorailai khlaiyakho? Bede tikhade bo jing khe phainjikha ode jini rang khebo jitharkha. 16 Bede tikhade jini abai niprang Madai langtharyaba duha jini ode jini ansarao ni jahi dong. Odebani duha, ning khe Madai snadi thidu, olai khai." 17 Boni yahon ha Jakob songkhuba, ode mih hajeng basao ha basathu, boni nobrajikhthu khe gariba. 18 Paddan Haran ha dongba ha mih khrangyaba don somphothi buthu bojom khlaihayaba khe langhi jarni bupha Isaac niha, Kanaan rajiha thangba. 19 Laban, melma ni bikhim khepma thangba ha, Rachel, bupha ni noh ha madairao dongyaba khe khaolangba. 20 Aramsa Laban khe Jakobbo jar khailangba khe sainthiyahi thokhiba. 21 odejang, bo, boni ha dongyabasi khe langtharhi khailangba ode gebre gebre dibu baibaodehe Gilead ni hajikh harang gede thaphalangba. 22 Sainthamba ha, Jakobde khailangkha thihi Laban ne sainthiphaiba. 23 Odejang, bo jarni hainthi khe langphahi sainsni, boni yahon rikhaphaba. Gilead raji ni hading ha bo, bo khe mairikhiba. 24 Madai, Aramsa Laban niha hor ha saomin ha nujaophaihi thiphaiba, Jakob jang grao hamba hamya sainlaiba khe ning grikhla." 25 Jakob, hajikhro ha noh dangba. Ode Labanbo jarni hainthi jang baosi Gilead desh ni hajikhro ha noh dangba. 26 Laban, Jakob khe thiba, "Ning ang khe thokhihi, ani bisikh khe seng phung phunuhi sumu jabani langlaba? 27 Sumu jabani ning phrik phrik thanglaba, ang khe thokhiba, ang khe sainthiyaba? Angla ning khe hamsisi mel salaihise, bailai lulai damlai sulai khaja minise haikhlamamuda. 28 Ani busuthaithaithu khe, ani bisikhthu khe khudimmanebo ningla ane hajora riya. Ningde gibirrao ni khusise dangba. 29 Ang ning khe dukhu rimane aniha bol dong tikhabo miya horha, nini buphani Madai ang khe thiphaiba, "Jakob jang hamba hamya grao sainlaiba khe grikhla." 30 Ning nini bupha ni noh ha thang mijingba ni, ning thanglaba. Tikhabo sumu jabani ning, ani madairao khe khaolangbakho?" 31 Jakob, Laban khe thipinba, "Nini bisikh khe, ani niprang ning bol jang langlamase baohi ang khinhi phrikh phrikh khailanglaba. 32 Sere nini madairao khe khaolangba bonsi habsao ha thanghi dongnang niya. Jini hainthirao ni sgang ha, nini asaba dongkhade naila ode langla." Rachelse, madairao khe khaolangba thihi Jakob tharmailaya. 33 Laban, Jakob ni noh ha haphba, Lea ni noh ha, ode dangyahjikhrao gnini noh ha haphtharba tikhabo smaihi maiya. Bo, Lea ni noh niprang baigolanghi Rachel ni noh ha haphba. 34 Rachel, noh ni madairao khe langba, gorai ni juli ha denghi langba. Laban, noh ha smaitharkha, tikhabo maidaoya. 35 Rachel, bupha khe thiba, "Thampsi dabaigo, ani Gabara, angde nini sgang ha songphapuya, bede tikhade ani sao ni thi thanghi dong." Odejang, bo smaiba, tikhabo bo, noh ni madairao khe maidaoya. 36 Jakob thampsi baigokha ode Laban jang niyalaiba. Bo, bo khe thiba, "Ang snadi gjai khusi dangba? Ani gjai snadi, ning ang khe bol jang rikhsaibala? 37 Aniha dongbasi khe ning smaitharkha. Ning, nini noh ni jinis buthu khe maikha? Asaba maikha tikhade nini ode ani hainrao ni sgang ha deng ode bonsi gibi gibi bisar khlainang. 38 Ang ning jang maithaikhon dongphakha. Nini melma jikh jathing burun jikh jathing basa khmaba giri, nini mih buthu khe ang masi jahibo dainjiba giri. 39 Mosrong, mihsi jang waijaoyaba khede ang niniha labuya. Olai gmagumu jayaba ni khlaihi ang bainjaoladu. Sain ha jathing hor ha jathing gmayaba khe ning aniha lagai sainphindu. 40 Sainyungma dungba ha ang dungthaijaolaba ode hor ha mgainthaijaolaba; melma ani niprang khailanglare. 41 Ebo maithaikhon bising hsa ang nini noh ha dongba. Nini bisikhthu gini ni khaihi ang nini ha khusi dangba ode maithaido nini mih buthu khe raokhiba. Ning ani sainruji khe alangji slaikhu slaikha khlaiba. 42 Ani abai ni Madai, Abraham ni Madai ode Isaac khinbalai ang khinyaremu, ning ang khe yao khongja haikhlamamu. Madai, ani dukhu hadi ode ang dukhu khlaiba khe nukha, odebani khlaihise ning khe miya horha sigringba." 43 Laban, Jakob khe thiba, "Ebo bisikhthude ani bisikhthuse, ebo busuthaithude ani busuthaithuse ode mih buthude ani mih buthuse. Ning nuyabasi ani gjase. Tikhabo ebo bisikhthu khe ode bonsi niha hajaiyarao ansarao khe ang snadi khlaimakho? 44 Odebani duha, jing gini jang smai dangnang ode ebo buthu jing ginini sakhi jathing. 45 Odejang, Jakob longthai thaisi lahi mihthong songkhuba. 46 Jakob, boni hainthirao khe thiba, "Longthai bojom khlai."Odehe bonsi longthai labuhi bojom khlaiba. Longthai bojom khlaiyaba ha bonsi khalai khamba. 47 Laban, bo khe Jegar Sahadutha thiba tikhabo Jakobde Galeed thiba. 48 Laban thiba, "Ebo longthai bojom khlaiyaba, ning jang ani gejer ha sakhi jathing." Odebani khlaihi ebo ni bumu Galeed jaba. 49 Ebo khe Mizpah bo thidu, bede tikhade Laban thiba, "Ning jang ang jang nulaiyaba ha, jing gnini gejer ha Madai naidaothing. 50 Ning ani bisikhthu khe naisledu tikhade ode ani bisikhthu khe garhi gibin masainjikh khe noh japhindu tikhade, jing gnini gejer ha saosibo giri tikhabop Madai sakhi dongma." 51 Laban, Jakob khe thiba, "Jing gini nni gejer ang dengyaba ebo longthai bojom khlaiyaba khe nai. 52 Ebo longthai bojom jang mihthong sakhi jama, saosi jang saosi hamya khlailaiyamane ang ebo longthai bojom khe lailangya ode ningbo ebo longthai bojom khe dalaibu. 53 Abraham ni Madai, Nahor ni Madai, bonsi ni bupha ni Madai jing gini khe bisar khlaithing. Jakob, boni bupha khe khinhi smai dangba. 54 Hajikhro ha, Jakob madai huba ode hainthi khe longthimhi khalai khamlaiba. Bonsi jihi linghi horsong horsi orahaniing thaoba. 55 Naiju graha, Laban baijaba, busuthaithu khe khudimba ode hamthai riba. Odehe Laban thanglahi noh ha phailaba.