¹ Odehe Jacob boni lamaha thanglaba, odehe subungrao ni sainja gede phaiba. ² Bo naihabade, dikhor khorsi nuhaba ode bo dikhor gba ha melma magtham rogonhi dongba khe nuba. Bo dikhor gbaha melma magtham rogonhi dongba. Bo dikhor niprang bonsi di khaohi melma ne di khainma thangba ode dikhor muhkhang ha guwaryaba longthai dongba. ³ Melma buthu bojom jatharkha tikhaniing, melma raokhiyah phaihi, bo longthai khe, dikhor muhkhang niprang nekhaore ode melma buthu ne di khaire ode di khainblaihi dikhor muhkhang khe sganghalai niing phongpinre. ⁴ Jacob, bonsi khe thiba, "Ani khaphlungrao, nisila baraha niprang phaiba?" Bonsi thipinba, "Jingde Haran niprang phaiba." ⁵ Bo, bonsi khe thiba, "Nahor ni basa Laban khe nisi mithidu?" Bonsi thiba, "Jing mithidu." ⁶ Bo, bonsi khe thipinba, "Bola, hamhiniing dong?" Bonsi thiba, "Bo hamhiniing dong. ode hoogo naiha, boni bisikh melma labuhi Rachel phaidu." ⁷ Jacob thiba, "Duhade sainjerse. Melma gimthimmane bubli jayakho. Nisi duha melma buthu ne di khqainda ode sam jiritha." ⁸ Bonsi thiba, "Melma buthu khe gimthimtharyaside jing bonsine di khainphuya. Odehe bo subung, dikhor muhkhang niprang longthai nekhaonang ode jing melma buthu ne di khainnang." ⁹ Jacob, bonsi jang sainlaihi dongba bubli ha, Rachel, buphani melma khe labuhi phaiba, bobo melma raokhihi dongba. ¹⁰ Jacob ni buma ni buphlung Laban ni bisikh Rachel jang ode boni buma ni buphlung Laban ni melma khe Jacob nuhi phaiba, dikhor muhkhang ha longthai dongyaba khe nekhaoba ode boni buma ni buphlung Laban ni mih buthu ne, bo di khainba. ¹¹ Jacob, Rachel khe khudimba ode grakhaoba. ¹² Jacob, Rachel khe thiba bode, boni bupha ni hainthise thihi ode bode Rebeca ni basa thihi. Ode, bo khailanghi, bupha niha sainthiba. ¹³ Laban ni bahandao ni basa Jacob ni basao ha Laban graojma khnaba, bo khailanghi goronhiba, gbaophaba, khudimba, odehe bo khe, boni noh ha labuba. Jacob, Laban ne khrip jadi grao khe sainthitharba. ¹⁴ Laban, bo khe thiba, "Ningde ani grengse, bahainse." Odehe Jacob, bo jang baosi dainsi dongphaba. ¹⁵ odehe Laban, Jacob khe thiba, "Ning ani hainthi jabani thihi magna jang khusi dangrima? Ang khe thi, nini sainruji bislai jama?' ¹⁶ Laban niha bisikhthu gini dongba. Radaoyaba bisikh ni bumu jakha Leah, ode gididaoyaba ni bumu jakha Rachel. ¹⁷ Leah ni muhthai majangbi tikhabo Rachel de saogari majangbi. ¹⁸ Jacob, Rachel khe hamjaoba, odehe bo thiba, 'Ang, Rachel ni khlaihi niniha maithaisni khusi dangma, nini bahandao ni khlaihi." ¹⁹ Laban thiba, "Gibin miyah ne ani bahandao khe phaba slaide ninthane phaba hamdao. Ang jang baosi dongpha." ²⁰ odejang, Jacob, Rachel ni khlaihi maithaisni khusi dangba; ode bonsi baoba phongsi sening bede tikhade bo, bo khe hamjaoba. ²¹ Odehe Jacob, Laban khe thiba, "Ani nobrajikh khe ane ri, bede tikhade ani basain jamkha - odehe ang, bo jang thangphalanang!" ²² Odejang, Laban rajirao khe longthimtharhi mel khongsi salaiba. ²³ Sahriphang ha, Laban jarni bisikh Leah khe langba odehe Jacob ne yaophaba. ²⁴ Laban jarni bisikh Leah ne boni dangyahjikh khe riba. ²⁵ Phorong ha naibade, Leahse! Jacob, Laban khe thiba, "Ning sumu jabani elai khusi dangba? Ang, Rachel ni khlaihi khusi dangba niya? Ning, ang khe sumu jabani thokhiba?" ²⁶ Laban thiba, "Radaoyaba dongba ha gididaoyaba khe yaophamane jini ha dara giri. ²⁷ Ebo hapthasi de jamsori odehe ani khlaihi maithaisni khusi dangma nangma ode ang ar bisikh saosi khebo rianangkho. ²⁸ Jacob olainiing dangba ode Leah ni haptha khe jamsoriba. Odehe boni yahon ha Laban, Rachel khe bonthane nobrajikh riba. ²⁹ Laban, boni bisikh Rachel ne, boni dangyahjkikh Bilhah khe dangyahjikh jamane riba. ³⁰ Odejang, Jacob, Rachel nihabo thangba, tikhabo Leah thane Rachel khe bo hamjaodaoba. Odejang, Jacob, Laban niha maithaisni khusi dangba. ³¹ Leahde hamjaoma maiya thihi Madai nuba ode bo, boni sahthip khe khuruba tikhabo Rachel la saglangma jahi dongba. ³² Leah, sao khongin jaba ode basa saosi maiba ode bo, boni bumu Reuben dengba. Bo thiba, "Bede tikhade Madai ani dukhu hadi khe nuba, duhade asalai tikhabo ani nobra ang khe hamjaonang." ³³ Ar bo sao khongin jabakho ode basa maibakho. Bo thiba, "Bede tikhade ang khasaoma maiya thihi Madai khnaba, odebani khlaihise bo anthane basa riba," ode bo, boni basa ni bumu Simeon dengba. ³⁴ Ode bo ar sao khongin jabakho ode basa maiba. Bo thiba, "duhade ani nobra ani basao ha muhsa glainang bede tikhade ang boni khlaihi basa magtham hajairikha.' Odebani khlaihise boni bumu Levi thiba. ³⁵ Bo ar sao khongin jabakho ode basa maiba. Bo thiba, "Duhade ang Gabara khe bkhan khlaima.' Odebani khlaihi bo, boni bumu khe Judah dengba; Ode bo, basa maiba thaokha.