¹ Isaac, Jakob khe longhi, bonthane hamthai rihi, Jakob khe thiba, "Ning, Kanaanjikh khe nobrajikh lamainang niya. ² Baija, nini buma ni bupha Bethuel ni noh ha, Paddan Haran ha thang ode nini buma ni bda Laban ni bisikhthu niprang nobrajikh labu. ³ Gabara Madai ninthane hamthai rithing, yerdaophalangrithing, bangdaophalangrithing, ode nini jadi somaj japhuthing. ⁴ Bo, Abraham ni hamthai khe ninthane, nini sahrikh surikhraone rithing; Madai, Abraham ne riyaba hahthan ha nini dongthan jathing, ning yawaithing. ⁵ Odejang, Isaac, Jakob khe haihaba. Jakob jang Esau ni buma Rebekah ni bda, Aramsa Bethuel ni basa Laban niha, Paddan Aram ha Jakob thangba. ⁶ Isaac, Jakob ne hamthai rihi Paddan Aram ha nobrajikh laihimane haihaba khe Esau nuba. Isaac, Jakob ne hamthai riba khe ode khusi sanihi grao thiba khe Esaubo nuba, "Kanaanjikh khe ning nobrajikh labuma nangya." ⁷ Jakob, bupha buma ni grao khe khnaba khe ode Paddan Aram ha thangba khe Esau nuba. ⁸ Esau ni bupha Isaac khe Kanaan ni masainjikhrao hamjaoyaba khe Esau nuba. ⁹ Odejang bo Ishmael niha thangba ode bo ar nobrajikh khrangsingbakho. ASbraham ni basa, Ishmael ni bisikh Mahalath jang Nabaioth ni bahandao khe noh jaba. ¹⁰ Jakob Beersheba niprang baigohi Haran gede thangba. ¹¹ Hahthan masi ha sophaihi bo oraha horsong dongba, bede tikhade sainjroba. Ora niprang bo longthai thaisi khonba ode khroha bo dengba ode gandu lahi oraha thuba. ¹² Bo thu saomin masi nuba ode phrthima ha yamthai masi jenba khe bo nuba. Bo yamthai nokhasao ha soihidu ode Madai ni deglarao bo yamthai khe daokhuba daokhlailaiba. ¹³ Bsaothao ha Madai songhi dongba ode thiba, "Angde Gabarase, nini bupha Abraham, Issac ni Madaise. Nisi duha dongyaba hahthan khe ang ninthane ode nini sahrikh surikhraone rinang. ¹⁴ Nini sahrikh surikhraode phirthima ni hajenglai bangma ode mulug gorongbri ha gablaitharma. Nini gede ode nini sahrikh surikhrao ni gede jahi mulug ni khrip subungrao ni basao ha hamthai phaima. ¹⁵ Ang ning jang dongphadu. Odehe ning baraha thangdu ang ning jang thangphama. Ebo raji khe ang, ninthane ripinma; bede tikhade ang ning khe haigerya. Ang ninthane graosmai riyabasi khe dangritharma. ¹⁶ Jacob thuba mudri thanghi baijapinba ode thiba, "Gabara Madai ebo hahthan ha dong, tikhabo ang mithilaya." ¹⁷ Bo khinba ode thiba, "Ebo hahthanla gbangniing khinthaosisi selao! Ebo noh gibin ni noh niya, Madai nise. Ebo sorgo thangma ni daoglaphse." ¹⁸ Jacob phorongmaha baijaba ode bo khro ha rujungyaba longthai khe lahaba. Bo, longthai khe thong gaiba ode longthai basao ha thao lukhruba. ¹⁹ Bo hahthan khe bo, Bethel thiba, tikhabo thol ni bumu gibi de Luz se. ²⁰ Jacob, yasugu thuhi gonglaihi thiba, "Madai ang jang dongphadu tikhade ebo lama khe hemkhlailangba ha, anthane jimu gainmu rima, gainsi phinsi rima, ²¹ odehe ang ani abai ni noh ha hamsisi khlaihi sophaipinma odehe gabara ani Madai jama. ²² Odehe Ebo longthai ang gaiyaba gthar longthai jama. Ning anthane riyabasi ni basao ha ang phanthaji rima."