¹ Isaac raphaiba ni yahon ha, bo muhthai nuba sringya jaba ode muhthai nuyalanglangba, bo Esau khe jirikhhi thiba, "Ani basa." Esau thipinba, "Ang era dong." ² Ode Isaac thiba, "Nai, angde rakha. Ani hayu bakhali jamnang ang mithiya. ³ Odebani khlaihi nini yaodi khe dila, baithuli jang bla dihi thang ode mih gaohi labu. ⁴ Ang thaojaobalai anthane thaosisi songhi ang jimane labu ode ani hayu jammani sgang ha ang ningthane hamthai galangnang." ⁵ Isaac, elai grao khe Esau ne sainthaiba khe Rebekah khnaba. Esau, hagra ha mih rikhmane thangba. ⁶ Rebekah, boni basa Jakob khe thiba, "Khna, Nini bupha, nini buphlung Esau khe thiba khnaba. Bo thiba, ⁷ "Hagra ni mih gaohi, thaosisi songhi ang jimane labu ode ani hayu jamyasani Madai ni sgang ha ang ninthane hamthai rilangnang.' ⁸ Odebani khlaihi, ang sanibalai ning khusi dang, ani basa. ⁹ Melma burun dongyaba ha thang, burun jlasa magin labu ode ang nini bupha thaojaobalai ang thaosisi songrinang. ¹⁰ Ode ning langhi nini bupha ne jiritha ode boni hayu jamyasani bo, ninthane hamthai rilangnang.' ¹¹ Jakob, boni buma Rebekah khe thiba, "Amai, ani bada Esau nihala saokhim bangbi tikhabo angla milithithise. ¹² Ani abaila ang khe dophama ode ang, bo khe thokhibalai jama. Hamthai maibade dathi ang jarni basao ha sahrithai labubalai jama." ¹³ Boni buma bo khe thiba, "Ani basa, asaba sahrithai nanginyaba dongkhade aniha glailathing. Ani grao khesening khna ode thang, burun remhi labu." ¹⁴ Odejang, Jakob thanghi burun jla remhi buma niha labuba, ode bupha thaojaogothai, buma thaosisi songba. ¹⁵ Noh ha dongyaba, basa radaoyaba Esau ni sola hamdaothaoyaba khe labuhi, basa gididaoyaba Jakob ne Rebekah thuriba. ¹⁶ Milithithiyaba yaodo jang gorna ha burun bikhim khe, bo phariba. ¹⁷ Thaosisi makham samlai songyaba khe bo, basa Jakob ni ni yaoha riba. ¹⁸ Jakob, bupha niha thangba ode thiba, "Abai." Boni bupha thiba, "Ang era dong, ning sere, ani basa?" ¹⁹ Jakob, bupha khe thiba, "Niniha hajaijenyaba, ang Esau. Ning sanibalai ang labuba. Phai kham ode ang mih gaoyaba khe ji ode ane hamthai ri." ²⁰ Isaac, basa khe thiba, "elaila bedehe mih gaohi lailolo labukha, ani basa?" Bo thiba, "Madai ang jang dongphabani maihakha." ²¹ Isaac, Jakob khe thiba, "Ani rogong ha phai, ang ning khe dophanang, ning niing ani basa gibi Esau nidu na niya ang mithinang.' ²² Jakob, Isaac ni rogong ha thangba; ode Isaac bo khe dophaba ode thiba, "Khurang Jakob ni, tikhabo yaodo buthula Esau ni." ²³ Isaac, bo khe mithiphuyakha bede tikhala boni yaodo buthu ha Esau niha saokhim dongbalai, boni habo saokhim gablaidu, odejang, isaac bone hamthai riba. ²⁴ Bo thiba, "Gibi jangniing ning ani basa Esau?" Bo thipinba, "Angniing." ²⁵ Isaac thiba, "Jimu gainmu labu, ode ning mih gaoyaba khe ang jinang, ode ang ninthane hamthai rinang.' Jakob, bonthane jimu laburikha. isaac jikha, jakob. bonthane ju laburiba ode bo lingba. ²⁶ Odehe boni bupha bo khe thiba, "Ani rogong ha phai ode ang khe khudim, ani basa." ²⁷ Jakob phaihi bo khe khudimba, ode boni ri ni bahai khe midimsuba ode hamthai riba. Bo thiba, "Naila, ani basa ni bahaide hagra bongra ni bahaise Madai hamthai rithing. ²⁸ Nokhasao niprang ninthane Madai hadithai rithing phirthima habo jimu gainmu jang ju jang gablairithing. ²⁹ Subung buthu ning khe sowar muwar khlaithing ode nini ha gonglaithing. Nini khaphlungthu ni basao ha, ning hoja jathing ode nini bumani basathu, nini ha gonglaithing. Ning khe sahrithai riyarao sahhrithai riphinjaothing; ninthane hamthai riyarao hamthai jang gablaithing." ³⁰ Isaac, Jakob ne hamthai riblaiba ni yahon ha, Jakob, boni bupha dongyaba niprang, Jakob phrik phrik baigolangba, ode Esau mih rikh hi hagra niprang phaiba. ³¹ Esaubo, thaosisi mogong songhi buphane labuba. Bo, bupha khe thiba, "Abai, baija ode nini basa mih gaoyaba khe ji ode ane hamthai ri." ³² Boni bupha Isaac, bo khe thiba, "Ning sere?" Bo thipinba, "Ang nini basa, niniha hajaijenyaba, Esau." ³³ Isaac gablaohi thiba, "Bola serekho, mih gaohi ane labuyaba? Ning phaiba ni sgang haniing angla jikhathi ode ang bonthane hamthai rihakha. bode, hamthai mailama jakha." ³⁴ Bupha ni grao khe khnahi, Esau hamseniing grakhaoba ode bupha khe thiba, "Ane hamthai ri, anebo ri, abai." ³⁵ Isaac thiba, "Nini buphlung khaohi eraha phaiba odehe nini hamthai khe bo langlakha." ³⁶ Esau thiba, "Bo jarni bumu khe hamsisi Jakob thiya? Bo subungde ang khe alangin thokhikha. Bo ani hajaiba ni maiphantha khe langlakha ode nai, ani hamthai maiphantha khebo langlakha." Bo thibakho, "Ani khlaihi, ning hamthai dengkhaoya?" ³⁷ Isaac, Esau khe thipinba, "Nai, ang, bo khe nini hoja songblaikha ode boni khaphlungthu dongbasi khe boni dangyahsa jamane ritharkha ode jimu gainmu ode ju khebo bonthane ritharkha. Ang duha ninthane snadi riphumakho, ani basa?" ³⁸ Esau, boni bupha khe thiba, "Nini ha ani khlaihi hamthai masilai mamangbo girikha, abai? Ang khe hamthai ri, anebo ri, abai." Esau grakhaoba. ³⁹ Boni bupha Isaac, bo khe thipinba, "

Khnala, nini dongthande phirthima niprang gjain ha jama odehe nokhasao niprang oraha rbamdi glainang niya.

⁴⁰ Ning jarni seng khe yawaihi thahnghi dongma odehe nini buphlung ni bakhla ha dongmaima. Tikhabo ning badaidu tikhade, ning boni langol khe dophaima, ning khinhi khaila." ⁴¹ Jakob, bupha ni hamthai khe maibani darajang, Esau, Jakob khe hingsa jaba. Esau kha bising ha thilaba, "Ani abaila thiimane basain laoyakha, abai thiibani yahon ha ang ani buphlung Jakob khe sthaima." ⁴² Basa radaoyaba, Esau ni grao khe Rebekah ne sainthiba. odejang, Rebekah, basa gididaoyaba Jakob khe longhi bo khe thiba, "Naila, nini bda Esau ning khe sthaimane baobaidu. ⁴³ Odebani khlaihi, ani basa, ani grao khe khna ode ani bda Haran ha dongyaba Laban niha khailang. ⁴⁴ Nini bda ni thampsi rayasi bo jang baosi dongphatha, ⁴⁵ nini basao ha nini bda ni thampsi rayasi ar ning khusi dangyaba khe, bo blaoyasi dongtha. Boni yahon ha ang subung haihanang ode ning khe eraha labuphinnang. Sumu jabani sainsini midiha basa gni khe ang gmajaophuma? ⁴⁶ Rebekah, Isaac khe thiba, "Hethjikhrao ni bisikhthu ni khlaihi angde hamseniing dukhu nangdu. Bo raji ni masainjikhraolaiyaba khe Jakob bo Hethjikh khese noh jadu tikhade ang habsao ha thanghi donba ni snadi khlaimakho?