¹ Ora niprang Abraham, Negev haphai gede thangphalangba odehe Kadesh jang Shur hatho ha dongba. Bo Gerar ha naorai jahi dongba. ² Abraham, boni nobrajikh Sarah ni basao ha sainthiba, "Bode ani nobrajikhse. Odejang, Gerar ni raja Abimelek Sarah khe labumane saniba. ³ Tikhabo Madai, Abimelek jang hor ha saomin ha nujaohi thiphaiba, "Ningde githi subungse bede tikhade ning masainjikh labuyabade, miyah saosi ni nobrajikhse." ⁴ Abimilek, bo masainjikh ni rogong ha phaiyakho ode bo thiba, "Gabara, ning hamba raji khebo sdamma? ⁵ Bo subung jarning ang khe thibaseda, 'Bode ani bahandaose.' Bo masainjikhbo jarniing thibase, 'Bode ani badase.' Angde ebo khusi khe kha rgao ode gjai girihiniing dangbase." ⁶ odehe Madai, bo khe saomin thiba, "Grao gibi, ningde nini kha rgao rgao jangniing ebo khusi khe dangbase thihi ang mithidu ode ani baslai ha, ning khe khusi dangriyahi ang mthaobnase. Odejang, bo masainjikh khe, ning khe dophariya. ⁷ Odejang, bo masainjikh khe boni nobrane hodaiphinha, bede tikhade bode gorasalise. Bo, ninthane bihrinang ode ning thahnghi dongnang. Tikhabo ning, bo masainjikh khe hodaiya tikhade ning ode ning jang baosi dongphayaraosi khripbo thiitharma.' ⁸ Abimelek, naiju ha baijahi boni khrip dangyahsarao khe longthimba. Bo, bonsine khrip grao khe sainthitharba ode subung buthu khinsinglaiba. ⁹ Odehe Abimelek, Abraham khe longhi, bo khe thiba, "Ningla jini basao ha snadi khusi dangba? Ang nini basao ha phap khusi dangkhamu, ningla anii basao ha ode ani rajiyung ni basao ha phap khusi gedeba labuba? Ang khusi dangyaginyaba klhe ning dangrikhamuthi." ¹⁰ Abimelek, Abraham khe thiba, "Ning sumu jabani elai khusi dangma nangba? ¹¹ Abraham thiba, "Bede tikhade ang baoba, 'Ebo hahthan ha Madai khe khinyarao girinaidu, ode ani nobrajikh ni khlaihi ang khe, bonsi sthaimase.' ¹² Gibi jangniing, bode ani bahandaoniing, ani bupha ni bisikh, tikhabo ani buma ni bisikhde niya; ode ang, bo khe noh jaba. ¹³ Ani bupha ni noh niprang, Madai ang khe baigomane saniba ha, ang nobrajikh khe thiba, 'Ning ang khe khasaohi, jing braha braha thangdu angde nini bdase thi." ¹⁴ Odehe Abimelek, melma jang burun, dangyahsarao, dangyahjijkhrao khe langhi Abraham ne yaophaba. Ode bo, Abraham ne, Sarah khe yaophapinba. ¹⁵ Abimelek thiba, "Naila, ani hahyam nini sgang ha dong. Ning braha dongma nangjaodu, dongla." ¹⁶ Sarah khe, bo thiba, "Naila, ang nini bda ne rjingjang gjao guphu rikha. Nini basao ha, ode ning jang dongphayarao ni basao ha ang asaba gjai khusi dangkhade ebo jang suphindu ode khrip jadi khe hamba khlai." ¹⁷ Odehe Abraham, Madai niha bihba, ode Madai, Abimelek, boni nobrajikh, dangyahjikhrao khe hamriba ode bonsi ansarao maiphumane bihba. ¹⁸ Bede tikhade Abraham ni nobrajikh ni khlaihi bonsi ni sathip khe mthaohi dengba.