¹ Sahriphang ha Lot, Sodom daoglaph ha khamhi dongbaha Deglarao gini phaiba. Lot baihjahi bonsi jang goronhiba ode naikhlaihi gonglaihi bihba. ² Bo thiba, "Nai, gedemarao, khasaohi ani noha phai, horsilai thaolang, yega mukhang sula. odehe dakhna naijuha baijahi nisi thangpinlapunang." bonsi thipinba, "Niya, jing horha thol gorongbri hase dongma." ³ Tikhabo bo bol jang khainsuba ode bonsi bo jang baosi thangphahi noha hapba. Bo bonsine makham songriba ode blai gthang jang hon saoriba ode bonsi jilaiba. ⁴ Tikhabo, bonsi thuyasani, Sodom ha dongyarao, thol ha dongyarao, ansarao jang khraorao jang, rajisi phaihi bonsi khe gajephphaiba. ⁵ Bonsi Lot khe longhunhi thiba, "Dini hor ha nini noha phaiyaba subungla baraha dong? Bonsi khe bajiha haikho, jingbo bonsi khe mithima nangdu." ⁶ Odehe Lot derga khuruhi bajiha baigoba ode derga phraopinba. bo thiba, ⁷ "Ang nisi khe khainsuladu, hamya khusi khe dadang. ⁸ Nai, aniha bisikhthu gini dong, saosi miyahrao mithiyakho. ang ani bisikhthu gini khe nisine laburinang ode nisini muh nohjor nadi khlaima nangjaodu khlaila. tikhabo ebo subungrao ni basao ha musi dakhlai, bede tikhade bonsi ani noh sainkhlim hase phaiba." ⁹ Bonsi thiba, "Songphahining dong!" Bonsi thibakho, "Ebo subungla gibin raji niprangse era jaisingphaiba, ode ebo subungse jini bisadar jamakhone! bonsi ni basao ha hamya khusi dangbathane nini basaoha khipdaohi khusi dangma." Bonsi naorairao ni basaoha ode Lot ni baslaiha bakhjahining dongba ode derga sgaoma baoba. ¹⁰ Tikhabo, bo subung gini yao phlaohi, lot khe remhi bising ha sisinghi derga phraoba. ¹¹ Derga bajiha dongyarao ansa khrao khe andar ha dophlungba odejang, bonsi nethinglaiba ode bonsi derga smailaiba. ¹² Bo subungrao Lot khe thiba, "Eraha nini subung asaba dongkho? Bajamadirao, basa bisikh, ode asaba nini subungrao ebo thol ha dongkhade, bonsi khe era niprang baigori. ¹³ Bede tikhade ebo hahthan khe jing sjamtharma jakha, bede tikhade bonsi Madai ni baslaiha hamsining hamya khusi dangkha odebani Madai ebo hahthan khe sjamtharmane jing khe haihaba. ¹⁴ Lot baigolanghi, boni bisikhthu khe noh jama thiyarao, boni bajamadirao khe thiba, "Gebrehi, ebo hahthan niprang baigolang bede tikhade Madai ebo hahthan khe sjam jakha." Tikhabo boni bajamadirao mlaoba baoba. ¹⁵ Sainbili japhaibaha deglarao Lot khe thiba, "Ebo thol khe sjambaha, nisi sajamphajaoyamane khlaihi, nini nohbrajikh khe, nini bisikhthu gini lahi, dei nisi baigola." ¹⁶ Tikhabo Lot baigokhmapuya, Odebani khlaihi, degla bo jang boni nohbrajikh ni yao khe remhi, ode boni bisikhthu ni yao khe remhunba, bede tikhade Madai bonsi khe khasaoba. ¹⁷ Bonsi bonsi khe remhunba ode saosi subung thiba, "Jar golamane khriphbo khaila! Danaiphin, haphlai habo dalengo. gjaolangyamane khripbo hajikhro ha khaikhulang." ¹⁸ Lot bonsi khe thiba, "Niya, olai niya gedemarao! ¹⁹ Nai, nini dangyahsani basaoha nisi khasaoba, odehe ang khe sgomane nisi ani basao ha nisi mayama phnuba, tikhabo ebo

hading niprang ang thanglapuya bede tikhade khinthai ani basao ha glaima ode ang tiema.

²⁰ Ani grao khe khna, kheisa sgang ha nohlai masi dong, ang oraha khailanglanang, Nohlai khasebidana? - Ang oraha khalangkhaning golanang. ²¹ Bo bo khe thiba, "Dei jadu, ning thibalai ning jathing, ning thiyaba nohlai khe ang sjamya. ²² Gebre! thang oraha, ning oraha sohiyasi ang musi khlaipuya." Odebani khlaihise bo hahthan khe Zoar thihi bumu dengba. ²³ Zoar ha Lot sohibaha phirthima ha sain nangphaikha. ²⁴ Odehe madai nohkhasao niprang wai ni gidithai Sodom ha glairiba. ²⁵ Madai bo thol buthu, haphlai hawar ode dongyarao khrip subungrao khe, bongphang samphang dongyabasi khe sjamtharba. ²⁶ Tikhabo Lot ni nohbrajikh, yahon thaoyaba, yahon gede naipinba ode bo longthai ni Sem ni mihthong jalangba. ²⁷ Abraham naiju graha baijahi Madai jang songphalaiyaba hahthan ha thangba. ²⁸ Bo Sodom jang Gomorah gede naikhlaba, ode hawar haphlai gede naikhlaiba. Bo naihining thaoba, khamkhriptharyabani waikhudi baigohining dongba. ²⁹ Hawar haphlai khe sjamtharbani yahon ha Madai Abraham khe wainsohaba. Lot dongyaba hahthan khe Madai sjamtharba bo, Lot khe ora niprang haihaba. ³⁰ Tikhabo Lot Zoar niprang thanglahi boni bisikhthu gini khe langphahi hading ha donghiba bede tikhade bo Zoar ha dongba khinba. Bo ode bisikhthu gini longkhor ha dongba. ³¹ Radaoyaba gididaoyaba khe thiba, "Jini buphala rakha, Habasao ni dara mothapi jing jang yahmsi rihsi jaginyaba saosibo miyarao giri. ³² Phai abai khe ju khainthainang ode jing bo jang thuphanang, abai ni gede jahineng jing jini bongso mthaonang." ³³ Odejang, bonsi horha, jarni bupha khe ju khainthaiba. sgangthao ha radaoyaba thuphaba, thupahibaha bo tharmailaya ode baijapinba habo tharmaiya. ³⁴ Sainsi yahon ha, radaoyaba gididaoyaba khe thiba, "Miya hor ha ang abai jang thuphakha. Dei dinibo jing abai ne ju khainangkho, odehe dinide ning abai jang thupha odehe jing abai ni gede jahi jini bongso khe mthaonang." ³⁵ Odejang, okhali hor habo bonsi jarni bupha khe ju khainthaiba, odehe gididaoyaba bupha jang thupahiba. thuphahiba ha bo tharmaiya, baijapinbahabo tharmaiya. ³⁶ Odejang, Lot ni bisikhthu ginibo jarni bupha jang saokhongin jaba. ³⁷ Bisikh radaoyaba niha basa hajaiba, odehe boni bumu Moab dengba. Moabitsarao ni phagera bo jaba. ³⁸ Gididaoyaba bisikh nihabo basa hajaiba, ode boni bumu Ben-Ammi dengba. Ammonsarao ni phagera bo jaba