¹ Amraphel, Shinar ni raja, Arioch, Ellasar ni raja, Kedorlaomer, Elam ni raja, Tidal, Goim ni raja, ² Bera jang jba dainlaiyaba, Sodom ni raja, Birsha, Gomorrah ni raja, Shinab, Admah ni raja, Shemeber, Zeboim ni raja ode Bela ni raja (Zoar bo thire). ³ Boni nyahon ha rajarao bowa Siddim haphai ha gbaphabakho. ⁴ Maithaijigin bonsi Kedolaomer ni khusi dangriba, tikhabo maithaijitham ha bonsi baikhaohi badaiba. ⁵ Maithaijibriba ha Kedolaomer ode bo jang rajarao dongphayarao phaihi Rephaim khe Ashteroth Karnaim ha, Zebusisarao khe Ham ha, Emisa khe Shaveh Kiriathim ha, ⁶ ode Horisarao khe bonsi ni desh Seir ni hajikh niprang Hajengling gba ni Ei Paran ha dainkhriphiba. ⁷ Bonsi gurdinghi Mishpat ha phaiba (Kadesh bo thidu), ode Amalekisa, ode Hazenzon Tamar ha dongyarao Amorisa desh buthu deyariba. Boni yahon ha, ⁸ Sodom ni raja, Gomorrah ni raja, Admah ni raja, Zeboim ni raja ode Bela ni raja (Zoar bo thidu) jba salaimane Siddim ha ⁹ Kedolaomer, Elam ni raja, Tidal, Goyim, Amraphel, Shinar ni raja, Arioch, Ellasar ni rajarao ni baslai ha, rajarao bri jang dainlaimane rajarao bowa Siddim ha baigolangba. ¹⁰ Siddim, atha jang gablaidu, ode sodom jang Gomorrah ni raja khaikha, bonsi atha ha glaisingkha. Atha ha glaisingyahi thaoyarao hajikhro gede gakhulangkha. ¹¹ Odejang, rajarao sodom jang Gomorrah ni khrip jinis buthu khe lantharhi thanglaba. ¹² Bonsi thangba lamai ha, Abram ni buphlung ni basa, Sodom ha dongyaba Lot khebo langphaba. ¹³ Thiiyahi khaihi goyaba Hebrewsa, Abram niha phaihi thiba. Amorisa, Mamre ni Oak gbaha bo dongre, bo Abram jang gbalaiyaba, Eshkol jang Aner ni buphlung. ¹⁴ Abram ni hainthi khe dusmonrao phaihi dainkhrip phaiba thihi khnabani Abram, boni noh ha hajaiyaba rjatham jijai siphayarao khe langhi, Dan sosi bonsi khe rikhsaiba. ¹⁵ Bonsi ni baslaiha, bo boni siphayarao khe ronphaiba, bo jang boni siphayarao, bonsi khe Damascus ni sain yaoda ni Hobah sosi rikhsaiba. ¹⁶ Odehe bo, boni khrip jinis buthu jang boni hainthi Lot jang boni jinis ode masainjikhrao ode gibin gibin subungrao khebo labuphinba. ¹⁷ Kedolaomer ode bo jang rajarao dongphayarao, Sodom ni raja bo jang goronmane Shaveh haphai (Rajarao ni haphai bo thire) ha thangyaba khe, Abram jba deyarihi phaipibani yahon ha. ¹⁸ Melchizedek, Salem ni raja jimu gainmu jang ju labuba. Bo, judaothaoyaba Madai ni jonthaima. ¹⁹ Bo hamthai rihi thiba, "Judaothaoyaba Madai, Sorgo jang phirthima khe sangsaiyaba, Abram ne hamthai ri. ²⁰ Nini dusmonrao khe nini yaophakhor ha ritharyaba judaothaoyaba Madai ni hamthai jathing." Odehe Abram khrip jadi niprang phanthaji Melchizedek ne riba. ²¹ Sodom ni raja Abram khe thiba, "Subung buthu khe ane yaopha, odehe jinis buthu khe nisi dengtharla." ²² Sodom ni raja khe Abram thiba, "Sorgo jang phirthima khe sangsaiyaba judaothaoyaba Madai ne ang yao guguba, ²³ ang khun dingsi jahibo, yaphadab wadubo ar asaba nini nijis khe laya ode 'Abram khe ang gnang khlaba' thihi ning ang khe thithai mainang niya. ²⁴ Ang jang baosi thangphayarao jiyaba ode bonsi jinis labuyaba khe garhide ang musi jinis khebo laya. Aner, Eshkol ode Mamre bonsi ni phatha khe lalathing."