1 Odejang, Abram boni nobrajikh ode bo jang dongphgayarao khrip khe langhi, Egypt niprang gakhulanghi Negev ha thangba. Lotbo bonsi jang thangphaba. 2 Abram dao mih ni gnang ode gjao guphu nibo gnang. 3 Bo, Negev niprang Bethel gede thangphalanghi, boni sgangni nohyam gjam Bethel jang Ai hatho ha thangba. 4 Bo sgang ha hahbim salamyaba hahthan ha thangba. Oraha bo Madai khe jirikhba. 5 Abram jang thangphayaba Lot nihabo dao mih ode noh dongba. 6 Hahdam danghi jimane bangyaba ni khlaihi bonsi gathaisi ha dongba jayaba bede tikhade bonsi hahyam mthaoyaba hamseniing bangbi, odebani khlaihi bonsi gathaisi ha dongsmailaiphuyaba. 7 Abram ni mih raokhiyarao jang Lot ni mih raokhiyarao jangbo thandao phaidao jaba. Bo bubli ha, Kanaansarao jang Perizisarao bo hahthan ha dongba. 8 Odejang Abram, Lot khe thiba, "Ning jang ang jang bumain phnanglaiba jaya, nini mih raokhiyarao jang ani mih raokhiyarao jangbo bumain phnanglaiba jaya bede tikhade jing nokhorsise. 9 Ebo hahyam buthu nini niya? Ani hahyam niprang ning jarne hahyam sukhaolaitha. Ning yaosi gede saikhaokhade ang yaoda gede thanglanang. Ning yaoda gede saikhaokhade ang yaosi gede thanglanang." 10 Odejang, Lot naidingbaikha, Jordan hawar haphlai khe naibade Madai ni barisinglai, Egypt ni hahthanlai, Zoar sosi khrip jangniing di sothardu. Ebo jakha Sodom jang Gomorrah khe Madai sdammani sgang ha. 11 Odejang, Lot, Jordan hawar haphlai khe saikhaohi sainja gede thangba ode hainthi jang degaolaiba. 12 Abram Kanaan ha dongba ode Lot hawar haphlai ni thol buthu ha dongba. Bo Sodom sosi raji khaphalangba. 13 Sodom ha subung dongyarao Madai ni baslai ha hamya khusi dangba. 14 Lot degaolangbani yahon ha, Madai Abram khe thiba, "Ning songyaba niprang sain yaosi, sain yaoda, sainja, sainjroba gede nai. 15 Ning nuyabasi ninthane ode nini sahrikh surikh ni khlaihi thaoglao ni khlaihi ang ninthane ritharma. 16 Phirthima ha hahduri dongyaba khe sainsophuyabalai ang nini sahrikh surikh khe yerrima. 17 Baija, haphai warbalai, laobalai thangphalang bede tikhade ang nithane ritharma. 18 Odejang, Abram, boni noh khe subruhi Hebron ni Mamre ni Oak ha dongphaiba ode bo oraha Madaine hahbim salamba.