7

¹ Mah cengten, Pathian in Noah nelah thu a piak leh mi cu hi huncan sungah nang cu ka mai pen dikcang nak thu ka muh hang, na innsung sang hempoh te tuah tembaw sungah tum un. ² Hi leihum ah ngam sa ci nam tham tuk ngawl in, a thiangtho mi ci nam, ci nam khat sung pen a nu le pa kop salih, a thiangtho ngawl mi ci nam khat sung pen a pa le a nu kop nih, ³ Vanhum va no ci nam khat sung pen a pa le a nu kopcawi salih tek cu keng in hi. ⁴ Itahum titale tu ni pen pan ni salih a kim ten ni sawmli sung sun le zan leihum ah nguahzu tuk hi. Ka bawl mi ngam sa hempoh te hi leihum pen siatsuah tung hitin, Pathian in thu cah zo hi. ⁵ A cah mi thu bang Noah in bawl hi.

⁶ Leihum cu tui hau tung in a um ten, Noah cu a kum zaluk kim hi. ⁷ Tui hau tung haksat nak hang Noah cu a zi le a ca, a mo te tuah tembaw sungah tum haw. ⁸ Pathian thucah nak bang a thiangtho mi sa, a thiangtho ngawl mi sa, va no le leihum ah a bop in a vak mi ngam sa hempoh sung pen, ⁹ A nu le a pa kopcawi cu Noah te tuah tembaw sungah lut tum haw hi. ¹⁰ Ni salih a kim ten a khuh thei mi tui leihum ah heng hi. ¹¹ Noah kum zaluk a kim kum hanih nak, ni salih in a thuk zet mi tuikhuk a khak thei hempoh vawk khawng in, vanhum a awng hempoh te a honsak hang, ¹² Ni sawmli sung sun le zan nguah cu hi leihum ah zu hi.

¹³ Mahmi ni in Noah le a nupi, Seth, Ham, Zapheth Noah capa pathum, a mo pathum te tembaw sungah tum haw hi. ¹⁴ Sahang nam, a beem a ngilo ngawl ngam sa, lehum ah a bop in a vak thei mi ngam sa, a leng thei mi ak va no nam, ¹⁵ Nunnak a nei mi ngam sa nam kim sung pen a pa le a nu a kop cawi cu Noah tuah tembaw sungah lut tum haw hi. ¹⁶ Mah tih cun Noah in Pathian thu cah nak bang, a lut tum mi ngam sa te cu ngamsa hempoh sung pen a pa le a nu a kop cawi in lut tum haw. Pathian in Noah cu a sung pen khak tik hi. ¹⁷ Tui hau tung cu ni sawmli le zan sawmli sung leihum ah khang to dedeuh in tembaw cu leipi pen laang to hi. ¹⁸ Mah cengten tuipi cu leihum ah khang to sesem in a um hang, tembaw cu tuipi hum ah laang to hi. ¹⁹ Mah cengten tuipi cu leihum ah khang sesem in van hang nuai ah a um mi hempoh mualpi te khuh khawng hi. ²⁰ Tui a khum mi mual hum pen a khuh mi tui cu tong hei nga um hi. ²¹ Leihum ah a phia thei ngam sa nam kim va no, a beem in ngilo ngawl mi ngam sa, sahang, leihum ah a bop in a vak thei mi ngam sa hempoh le mihing hempoh te thi khawng haw hi. ²² A nung in mual hum ah a um mite thi khawng hi. ²³ Leihum ah a um mihing hei hihen, ngan hing khoih mite hei hihen, a bop in a vak thei mite hei hihen, vanhum va no hei hihen, nunnak a nei mi hempoh te leihum pen siatsuah in tham khawng haw tuk hi. Noah le tembaw sungah a um mite bek tang haw tuk hi. ²⁴ Tui vang leihum ah ni zale sawmnga sung kiam ngawl in um hi.