6

¹ Leihum ah mihing tampi um in capa le canu te hing haw. ² Pathian capa ten mihing canu a mawi cu a muhten a thinlung a um mi bang in huai haw hi. ³ Pathian in ka hawvang cu mihing tei sungah a cat ngawl in tawp thong tuk ma hi. Itahum titale mihing cu taksa hi. A nunnak vang kum za le kul hen hitin, thupia hi. ⁴ Mah huncan sungah hi leihum ah pumpi a ngengzet mi hek khat um haw hi. Mah cengten, Pathian capa ten mihing canu te tuah pawldun nak a nei tu capa te thazang ngilnak a nei mi ni dang laih pen pan a min thang mite haw hi.

⁵ Leihum ah nasezet in sualnak a um hang, a thinlung ngaihsut nak hempoh a cat ngawl sual bek a um nak thu cu Pathian in a muh ten, ⁶ Leihum ah mihing a bawl mi cu sik in a thinkham in um hi. ⁷ Pathian in ka bawl mi mihing hei hihen, mihing pen pan in a ca te, a bop in a vak mi ngamsa te, van hum va no te hei hihen, hi leihum pen siatsuah tung. A muhte ka bawl mi cu sik ing hitin, thupia hi. ⁸ Noah cu Pathian thinlung a tawk tupa hi.

⁹ Noah cu midik cang pa a miphun sung pen cangkim mipa hi. ¹⁰ Noah in Seth, Ham, Zaphet tih mi ca pathum hing hi. ¹¹ Mah cenngten leipi cu Pathian mai pen siatsuah in um hi. Leipi cu phat ngawlnak tuah dim hi. ¹² Leipi cu Pathian in a zoh ten, siatnak tuah um hi tih cu mu hi. Itahum titale, leihum ah mihing hempoh siatnak ah heng khawng zo hi.

¹³ Mah cengten Pathian in Noah thu a piak mi ngamsa hempoh tei tawpnak cu ka mai ah heng zo hi. A mu hang leipi cu sualnak a dim in um hi. A thungai in leipi tuah a muhte cu siatsuah tung. ¹⁴ Gopher thing tuah tembaw cu nangma ca tuk bawl in. A sungah a khan te dan in bawl in hi. A sunglam le a pawlam cu caknai seh nut in hi. ¹⁵ Na bawl tuk dan cu tembaw a sau lam tong zathum, a zal lam tong sawmnga, a sang lam tong sawmthum um tik in hi. ¹⁶ A hum lam vang a khuh bawl in hi. A hum khuh a lai pen a kul khuh a zal lam tongkhat zal tik in. Tembaw a langlam ah vang kongka bawl in hi. A nuai ta dot, a lai dot dan, a hum lam dot tin dot thum um tik in hi. ¹⁷ Nunnak a nei mi ngamsa hempoh te vanhum umnak nuai pen kei mah loli in siat suah tuk in, leipi cu tui hau tung tik in leihum ah a um mi hempoh te thi khawng haw tuk hi. ¹⁸ Nang cu ka thukhaam kho tik tung hi. Na capa, na zi, na mo te tuah tembaw sungah tum tuk ci. ¹⁹ A nung mi ngam sa namkim sung pen a nu, a pa, a kop kim keng in nangmah tuah nunnak co tuk in, tembaw sungah khum tum in. ²⁰ Va no vang a namkim tek in, ngam sa nam kim tek in, a bop in a vak mi ngam sa nam kim, a nu, a pa a kop kim a nunnak pia tuk in na nelah hung haw tuk hi. ²¹ Na eih tuk in hihen, ngam sa tei eih tuk in hihen, an eih tuk namkim te keng in khawl in hitin Pathian in thupia hi. ²² A thu cahnak bang Noah in bawl hi.