47
1
A thu awnkam bang Josep in Pharaoh kumpi nelah hawh tum in kapa le ka U te cu tuu le khui, Kanaan ngam pen a neihnak hempoh tuah heng in Goshen ngamah um haw tin a tih ten,
2
A U tei sung pen teng in mihing pa nga cu a ma nelah pui hi.
3
Pharaoh kumpi in nohten i na deh thiam uh kam tin a dot ten, a mun topa sila ten pu le pa te tuah tuukhal in um haw hitin a tih ten,
4
Kanaan ngam sungah ningkial pamtung nak a nase leita hang, tuu le khui ngulhnak a um ngawl ten topa sila te uknak ngam sungah um tuk in heng ung hi. Mah hang topai sila te cu Goshen ngam sungah um tuk thu pia in hi, tih hei in ngen haw.
5
Pharaoh kumpi in na pa le na U te cu na nelah heng zo haw a hih hang,
6
Izip ngam cu na mai ah um hi. Na pa le na U te cu a pha bel mi umnak mun Goshen ngam sungah um nak pia in. A muhtei thazang ngilnak te mi hekkhat ten a mu tale ka tuu, khui hon uktu sungah pia in hitin, Josep cu thupia hi.
7
Josep in a pa Jakop cu pui in Pharaoh inn mai ah a koih ten, Jakop cu Pharaoh kumpi in thupha pia hi.
8
Pharaoh kumpi in na kum izong toh kam tin Jakop cu a dot ten,
9
Kei cu khual zin mi ka hih hang, ka kum cu za le sawmthum kim hi. Ka nunnak kum cu dawm in phat nawlnak um hi. Khualzin vak mi pu le pa te pha zo mang hitin a tih cengten,
10
Pharaoh kumpi cu thupha pia in a ma nel pen tul hi.
11
Pharaoh kumpi thupiak nak bang Josep in a pa le a U te cu umnak tuk pia in, Izip ngam sungah a pha bel mi umnak mun Rames leilung cu pia hi.
12
A pa le a U te, a pa le a inn sungsang hempoh te a dawm a tam nak bang in cawm hi.
Ningkial pamtung nak hang mah le mah zuak nak
13
Ningkial pamtung nak cu a nase leita hang, ngam sung hempoh ah an eih tuk um ngawl in Izip ngam le Kanaan ngam cu thanem zet hi.
14
Ngam sung tei lei mi ancang man Izip ngam, Kanaan ngam sungah muh hempoh mi sum cu Josep in kem in, kumpi umnak sungah koih hi.
15
Izip ngam, Kanaan ngam sung ah sum a bo ten, Izip miphun hempoh Josep nelah hung in an eih tuk pia in hi. Kohten sum bo in na mai ah itihbang in thi tuk hum tin a nget haw ten,
16
Josep in sum a bo tale nganhing te pia un. Nganhing ca in ancang pia tung hitin a tihbang in,
17
A mun nganhing cu keng in Josep in cipuh, tuu, laak tei ca in ancang a piak ten mah kum in nganhing hempoh hang mipi te cu cawm hi.
18
Mah kum cu bo in a kumnih nak a hun leh haw ten, kohten sum bonak thu cu topai mai ah im ma ung hi. Kohtei nganhing te topa nangman co zo ci. Topai mai ah kei mu pumpi le leilung sial ngawl cu a dang imah tang ma zo hi.
19
Na mai ah ita hang thi in ngampi sia tuk hum? An cu pia in kei muhtei lei ngam lei in hi. Kohten leingam tuah Pharaoh kumpi sila in um tuk ung hi. Kohte thi ngawl nung tuk in hihen, ngam sung mihing dai den no um tuk ngawl in hihen, anci pia in hitin a tih haw ten,
20
Josep in Izip ngam hempoh cu Pharaoh kumpi ca tuk in lei hi. Ningkial pamtung in Izip miphun ten a lei theih ngawl hang, a mu neih mi tek lo ngam zuak in lei ngam cu Pharaoh kumpi neihnak in cang tik hi.
21
Mihing hempoh Izip ngam mawk pen a langlam a mawk tian khuapi sungah thawn tik hi.
22
Thiampi tei neih mi lei ngam cu lei ma hi.
23
Josep in nang muhte le nangmu lei ngam cu Pharaoh kumpi ca in kei man lei zo ing hi. Anci la in lo bawl ta un.
24
Ancang a ngui ten sehnga suah sehkhat cu Pharaoh kumpi pia un. Sehli lam cu nohten la in inn sungsang, naupang te cawm un hitin ngamsung mipi tei lakah ti hi.
25
A mun topan kohte pan zo hi. Hehpih nak thinlung tuah zo in. Kohten Pharaoh kumpi sila in um tuk ung hitin, ti haw hi.
26
Mah hang, Pharaoh kumpi co ngawl mi thiampi tei lei ngam cu koih in, Pharaoh kumpi cu sehnga suah in sehkhat co tik hitin tu ni tian Izip ngam sungah a um mi thu cu Josep in dan bawl hi.
27
Isarel miphun te Izip ngam Goshen umnak mun ah a um hang, a neihnak cu khang to zet in um haw hi.
28
Jakop in Izip ngam sungah kum hei salih nung in, a kum za le sawmli salih hi.
29
Isarel cu a thihnak tuk huncan nai ten a capa Josep sam in, kei mah na hehpih tale ka kawng nuai ah koih in hi. Hehpih nak, muantaak nak tuah kei mah bawl in hi. Izip ngam sungah kei cu phum pah sin.
30
Kei cu pu le pa te tuah zau nuam ing hi. Izip ngam pen kei mah pua in a muhtei khan mual ah phum un hitin, ti hi. Josep in pa aw na tih bang in bawl tung hitin, lungkim hi.
31
Mah cengten kei man thukam nak bawl tung hitin a tih ten thukam cu bawl hi. Isarel in a zaunak luhum pen bia hi.
Manasseh le Ephraim