46

¹ Mah ten, Isarel cu a neihnak hempoh tuah khualzin in Beersheba umnak mun a hen ten, a pa Isak Pathian biakpiak nak cu bawl hi. ² Zan huncan ten thuphuan muhnak tuah Pathian in, Jakop, Jakop tin a sam ten, Jakop in kei mah um ing hitin, ti hi. ³ Pathian in kei cu Pathian ing hi. Na pai Pathian ing hi. Izip ngam ah hawh tuk cu lau pah sin. Kei cu mahmi ngam sungah na miphun pi in cang tik tung hi. ⁴ Izip ngamah nang cu kei mah tuah hawh tuk ci. Mah cengten kei man pui leh tung hi. Josep in a ma khut cu na mit hum ah nga tuk hitin, ti hi. ⁵ Mah cengten Jakop cu Beersheba umnak mun pen tul in, a ma khun tuk Pharaoh kumpi piak mi leng tuah Isarel caten a pa pen pan numei hempoh te le naupang hempoh keng in, ⁶ Kanaan ngam sung pen neih mi nganhing hempoh te le neihnak hempoh keng in Izip ngamah hawh haw. ⁷ Jakop cu a mah pen pan a tu le ca a miphun hempoh Izip ngam ah keng hi.

⁸ Izip ngam ah a heng tu Isarel catei min cu Jakop le a cate, capa U pa bel Reuben, ⁹ Reuben ca Hanoch, Phal lu, Hez ron, Car’mi hi.

¹⁰ Sim eon ca Jemuel, Jamin, O had, Jachin, Johar, Kanaan numei nui capa Sha’ul hi.

¹¹ Levi ca Gershon, Kohath, Mera ri hi.

¹² Judah ca Er, O nan, She lah, Pha rez, Za rah, a mu sung pen Er le O nan cu Kanaan ngam sung pen thi hi.

¹³ Issachar cate cu To la, Phu vah, Job, Shim’ron hi.

¹⁴ Zebulun cate cu Se’red, E’lon, Jah le el hi. ¹⁵ Hi a muhte cu Jakop nupi Leah in Padanaram umnak pen a hin mi ca hi. Canu Dinah tuah canu le capa a venghawng in sawmthum hi.

¹⁶ Gad cate cu Ziph’i-on, Hag gi, Shu ni, Ez bon, E ri, Aro di, Are’li hi.

¹⁷ Asher cate cu Jim nah, Ish u ah, Is ui, Be ri ah, He ber, Mal chi el hi. ¹⁸ A muhte cu Laban in a canu Leah laksawng a piak mi Jakop nupi Zil Pah hin mi ca hi. A venghawng in sawmluk hi.

¹⁹ Jakop nupi Rachel cu Josep le Benjamin hi. ²⁰ Izip ngam sung pen On khua thiampi Portipherah canu Ase nath in Josep tuah a hin mi ca Manasseh le Ephraim hi.

²¹ Benjamin ca Belah, Be cher, Ash bel, Ge ra, Na a man, E hi, Rosh, Mup pim, Hup pim, Ard hi. ²² Hi a muhte cu Jakop nupi Rachel hin mi ca hi. A venghawng in hei li hi.

²³ Dan cate cu Hu shim hi.

²⁴ Naphtali cate cu Jah ze el, Gu ni, Je zer, Shil lem hi. ²⁵ A muhte cu Laban canu Rachel laksawng a piak mi Jakop nupi Bil hah hinmi cate hi. A venghawng in salih hi.

²⁶ Jakop mo te son ngawl in Jakop sung pen suak a mah tuah Izip ngam ah a hawh mihing a venghawng sawmluk le paluk hi. ²⁷ Izip ngam sungah Josep ca hin mi capa panih um hi. Mah hang Izip ngam ah a heng mi Jakop miphun hempoh cu sawm salih hi.

²⁸ Josep nelah Goshen ngam hawh tuk in Judah cu a masa hah cengten, Goshen ngam ah heng haw hi. ²⁹ Josep in leng te ngalling in a pa Isarel cu khual muak tuk Goshen ngam ah a hawh ten a pai mai ah a heng, a pai ngawng pen kawi in ngeipi kap hi. ³⁰ Isarel in a tuin kei mah cu thi ngawn hen. Na mitmai cu kei man mu zo ing. Nang cu nung laih ci tin Josep cu ti hi. ³¹ Josep in Pharaoh kumpi nelah kei mah hawh tung hi. Kanaan ngam sungah a um mi ka U te, ka pai inn sungsang te ka nelah heng haw zo. ³² A muhte cu tuu khal hi. Tuu le khui ngul mite haw hi. A muhtei tuu le khui te pen pan a neihnak hempoh keng haw zo hitin, ti tung hi. ³³ Nang muhte Pharaoh kumpi in a sam leh ten, nohte cu itihbang na dek thiam uh cim tin thu a dong tale, ³⁴ Topa sila ten pu le pa te tuah naupang laih penpan a tu ni tian tuu le khui te ngul in um ung hitin, ti tuk. Mah a hih hang Goshen ngam ah umnak tuk cu ngah tuk uh ci. Tuu khal pa cu Izip miphun ten nawngkai sa thei haw hitin a U ten, a pai inn sungsang te cu hilh hi.