45

1 Mah ten Josep cu a ma nelah a um tu hempoh tei mai ah a sup theih ngawl hang, mihing hempoh ka nelpen tul un hitin au in, a ma hihnak a U te cu a lak ten mi dang a kua mah um ma hi. 2 A mah cu ngingzet au in kap hi. Izip miphun kumpi umnak sung tian in za haw hi. 3 A U tei lakah kei cu Josep ing hi. Ka pa nung laih maw tin, ti hi. A U ten don leh in son thei ngawl tian a mai ah thasiah zet in um haw. 4 Josep in kei mah nek un hitin a U te a tih ten a mun a bulah nek haw. A man, kei cu Izip ngam ah na zuak mi nohtei nau pa ing hi. 5 Mah hang nohten kei mah cu na zuak khak uh hang, thin nau in um pah sun. Mah le mah hei thinuuk in um pah sun. Itahum titale Pathian in mihing tei nunnak bawm tuk in nohtei mai ah kei mah cu hah zo hi. 6 Leihum ah kumnih sung ningkial pamtung nak heng zo hi. Lo bun nak, cangah nak um ngawl mi kum nga tang laih hi. 7 Pathian in nohte cu leihum ah um hih tuk in hihen, a nasezet mi nunpat nak hang nang muhte nung tuk in hihen, nohtei mai ah kei mah cu hah zo hi. 8 Mah hang, nohten kei mah cu hi umnak mun ah hah tu hima hi, Pathian hah mi hi. Kei cu Pharaoh kumpi in pa hihnak sungah hei hihen, kumpi uktu hinak sungah hei hihen, Izip ngam hempoh uktu topa hihnak sungah hei in ap zo hi. 9 A man lang ding in pai nelah hawh ta un. Pa nelah vang capa Josep in, Pathian in kei mah cu Izip ngam sung hempoh tei topa in cang tik zo hi. Ka nelah hung un. Hei leng pah sun. 10 A pa cu Goshen ah um tuk hi. Ka bulah um tuk hi. A pa pen pan tu le ca, tuu, kel hempoh te tuah um tuk hi. 11 Mahmi umnak mun ah cun kei man cawm tung hi. Mah ahima tale a pa pen pan innsung sang hempoh haksat nak ah heng haw tuk hi. Ningkial pamtung nak tuk kum nga tang laih hitin, hilh ta un. 12 Kei mah loli in nang muhte otpih hi tih cu nohtei mit, ka nau Benjamin cu mit loli in mu ing hi. 13 Izip ngam sungah ka neih mi hauhsak nak pen pan nohtei muh mi hempoh cu pai nelah hilh un. Aman lang bawl in pa cu hi ngam ah keng un hitin a tih cengten, 14 A nau Benjamin ngawngpen kawi in kap hi. Benjamin vang a ngawng kawi nak pen kap bok hi. 15 A U hempoh te nam in a muhte tuah a kah cengten, pakhat le pakhat otpih dun in um haw.

16 Josep U te heng leh haw hitin kumpi inn sung pen thuthang a zak hang, Pharaoh kumpi le sila ten deih zet haw. 17 Pharaoh kumpi in Josep sam in, na U te cu itihbang in otpih hum tih mi nohten hi tihbang in bawl ta un. Laak te cu a van thuang in Kanaan ngam ah hawh leh haw. 18 Nohtei pa le inn sungsang hempoh te keng in kei ma nelah hung un. Izip ngam leilung a pha bel cu kei man pia in, nohten leipen hauhsak nak an ei tuk uh ci. 19 Nohte cu a tuin a thupiak nak a um hang, hi tibang in bawl ta un. Nohtei numei te, naupang te cu Izip ngam sung pen leng tuah puak cengten na pa cu keng in hung un. 20 Nohtei neihnak te pamhei pah sun. Izip ngam a pha bel lei ngam hempoh cu nang muhtei ta hitin a tih cengten, 21 Isarel caten bawl in Josep cu khualzin nak tuk leng te, ancang te Pharaoh kumpi thupiak nak bang pia hi. 22 A U hempoh te a vansilh thek tuk vang pia hi. Benjamin in sum zathum tuah a vansilh thek tuk cen nga cu pia bet hi. 23 A pa vang Izip ngam a pha bel hempoh a ken mi laak leng sawm, lamzin khualvah nakah a pai eih tuk ancang, moh, eih tuk namkim te pua in laak leng sawm cu pia hi. 24 Nohten lamzin ah haudun pah sun hitin thucah in a U te hah in a muhte hawh haw hi. 25 Mah tihcun Izip ngam pen tul in Kanaan ngam ah a pa Jakop nelah a hen haw ten, 26 Josep cu nung laih hi. Izip ngam hempoh uktu hitin a hilh ten Jakop cu a thinkiam hi. A muhtei awnkam cu sang thei ma hi. 27 A mun Josep son mi awnkam hempoh hilh leh haw hi. A pa cu a ma khun tuk Josep piak mi leng te cu a muhten a thinlung thazang dim leh hi. 28 Isarel in ka ca tawk zo hi. Ka capa Josep cu nung laih hi. Ka thih laih ngawl in a mah zo tukin hawh tung hitin, ti hi.
Izip ngam ah Jakop a hawhnak