44
1
Josep in lai ngan tupa cu sam in a muhtei dip sungah ancang a dim pek in than sak hi. Mi hempoh tuah a seng mi sum cu a muhtei dip sungah hei hihen,
2
Ancang man sum le ka sum khuathai cu a nau tabel dip sungah hei hihen koih in hitin, a thucah nak bangin lai ngan tupan bawl hi.
3
Zingkhua a vak ten a muhte cu laak tuah hawh tik hi.
4
Khuapi pawlam khuala zet ngawl ah heng in, Josep in lai ngan tupa a sam ten a muhte cu a manlang in hil ten hi. A phat ten nohten lungdam nak cu phat ngawl nak tuah ita lul thei uh cim?
5
Ka topai in nak khuathai hima maw. A lamdang cuang mi cihthiam theihnak a nei tik thei mi khuathai hima maw. Nohtei bawl mi thu cu a pha ngawl mi hima maw tin hilh in hitin a tihnak bang,
6
Lai ngan tupa cun hil in a phat ten liat hi. A mun, hi awnkam cu topan ita son thei kam?
7
Topa aw sila ten hi tihbang mi thu cu um ma hen.
8
A masa in dip sungah muh mi sum cu Kanaan pen topai nelah keng leh zo ung. Mah tihbang in a hi tale topai inn sung pen sui le ngun te ita ngu hum?
9
Topa sila tei sungah a man a mu tale a mah cu thi hen. Kohten topai sila in thuak tuk ung hitin, ti haw hi.
10
Lai ngan tupan nohtei awnkam bang cang ta hen. Mah naven, a kua popawh sungah mu tale a mah cu ka sila in cang hen. Nohte cu sual pen luat tuk uh ci tin a tih ten,
11
A mu venghawng in a mutei diptek cu lei ah koih in hong haw hi.
12
Lai ngan tupan a ngeng bel pen pan a neu bel tian a zeih ten, Benjamin dip sungah khuathai cu mu hi.
13
Mah ten a mun a puan cu botkek in mi hempoh in a mu laak hum ah van cu koih leh in khuapi sungah kik leh haw hi.
14
Judah le a U nau te Josep inn ah heng in a mah cu innsung ah a um laih hang, a mai ah a bop in bia haw.
15
Josep in nohten i bawl nak nei uh kam? Kei mah bang pano cu a danglam cuang mi theihnak a um mi thu nohten thei ma uh cim maw tin, ti hi.
16
Judah in, kohten topa cu itihbang awnkam tuah ngen tuk hum? Itihbang in son tuk hum? Hi thu pen itihbang in luat thei tuk hum? Topa aw kohtei sualnak cu Pathian in cek in mu zo hi. Mihing pakhat sungah khuathai cu mu zo. A mah pen pan kohtei venghawng topai sila in cang zo ung hitin a tih ten,
17
Josep in mah tihbang in keiman bawl mang hi. Mihing pakhat khut sungah ka khuathai cu mu hi. A mah cu ka sila in cang ta hen. Nohte cu pai nelah daiden no in hawh ta un hitin, ti hi.
18
Mah ten Judah in nek in Topa Pathian, topa sila in awnkam khat no ot theih nak can pia in hi. Topa cu Pharaoh kumpi bang hi.
19
Topa in nohten pa nei uh cim? Na nau um maw tin ohte a dong tale,
20
Kohten, kum a ham mi kohtei pa um hi. Kum ham sawng ten neih mi capa pakhat um hi. A U cu thi zo hi. A nui hin mi ca sung pen a mah pakhat bek um hi. Mah hang a pa in a mah cu itzet hitin topa cu a don leh ten,
21
Topa’n a mah cu kei man mu tuk in ka nelah sam un hitin topa sila ten ti hi.
22
Kohten, naupa cu a pa tuah khen thei ma hi. Pa tuah in khen tale pa cu thi tuk hitin topa cu a tih ten,
23
Topa’n nohtei nau a tel ma tale nohten ka mitmai mu leh tuk ma uh ci tin, topa in kei muhte ti hi.
24
Mah cengten kei mun topa sila cu kohten pai nelah ka hen uh ten, topai awnkam cu pai nelah hilh leh tuk ung hi.
25
Kohtei pan ohtei eih tuk an dawm laih no lei leh ta un hitin a hawh leh tik ten,
26
Kohten hawh thei ma. Ka naupa keng tale hawh thei. Nau pa tel ngawl cun a mitmai mu thei tuk ma ung hitin, don leh hi.
27
Topa sila kohtei pa in nohtei theih mi bang ka nupi in capa panih cawi hi.
28
Ka nelpen pakhat cu tul ta hi. A thungai in a mah cu a tum a tang pet tawng in um zo hi. Mahmi huncan pen pan a mah cu kei man mu mang hi.
29
A mah vang ka nelpen laksak in a mah cu haksat nak a heng tale nohten ka sam ngo cu thasiat nak tuah thihnak ngam sungah heng tik tuk uh citin kohtei lakah in, ti hi.
30
Mah hang topai sila kapai nelah ka hen uh ten, naupa tel ngawl cun pai nunnak cu naupai nunnak sungah a um hang,
31
Nau pa mu ngawlin a um tacun pa cu thi tuk hi. Topai sila ten topai sila kohtei pai sam ngo cu thasiat nak tuah thihnak ngam sungah heng tik tuk hi.
32
Topa sila in ka naupa cu pai nelah pui kik leh thei ma tale, a cat ngawl in pai mai pen sualnak cu thuak hen hitin tiin, topa sila cu a pai nelah a naupai amahkhan tu in cang hi.
33
Mah a hih hang topa sila in a naupa ca um tik in topai nelah sila in um tung hi. Naupa cu a U te tuah hawh tuk in thupia in hi.
34
A naupa cu kei mah tuah a tel ma tale ka pai nelah itihbang in kei man hawh ngam tuk hing ngim? Mah tihbang in bawl tale ka pai nelah a heng tuk mi haksat nak cu kei man mu tung hitin, ti hi.
A mah le mah Josep a langnak