43

¹ Kanaan ngam sungah ningkial pamtung nak a nasezet hang, ² Izip ngam pen puak mi ancang a bo ten a pa in hawh leh in ohtei eih tuk an dawm lei tuk hung hitin, ti hi. ³ Judah in a man kohte cu nasezet thum in nohtei naupa a tel ma tale ka mitmai mu tuk ma uh ci tin, hilh ham zo hi. ⁴ Ohtei naupa a hawh tik tale pai eih tuk an cu lei tuk. ⁵ Naupa a hawh tik ma tale hawh tuk ma. Itahum titale a man nohtei nau a tel ma tale ka mitmai muh tuk ma uh ci tin hilh ham zo hitin, a pai nelah son leh hi. ⁶ Isarel in nohtei lakah na naupa a um thu cu a mah na hilh hang, ita kei mah bawl siat uh cim tin a tih ten, ⁷ A mun, a mah cu kei muhtei thu miphun thu te nasezet dong in na pa uh nung laih maw, na nau um laih maw tin a dot ten, kohten a ma awnkam bang don leh ung hi. Na naupa cu pui un hitin a son tuk cu kohten thei ung maw tin, ti haw. ⁸ Judah in naupa cu kei muhte tuah hawh tik in. Mah tin bawl tale pa nangmah pen pan kei muhte le naupang te thi tuk ngawl in kohten hawh tuk toh ung hi. ⁹ Kei cu a mahkhaan tu hi tung hi. Keima sung pen a mah cu ngen in hi. A mah cu pai mai ah pui leh ma tale a cat ngawlin sualnak cu kei man thuak hen. ¹⁰ Ohten huncan ngeipi a um uh tale, a tuin a thungai a veinih nak heng zo hitin a pa Isarel nelah in ti hi. ¹¹ A pa Isarel in mah ahitale hitin bawl un. A mah piak tuk nohtei dip sungah Kanaan ngam sung a pha bel mi thing ngah te, balm dawm laih no, khuai tui dawm laih no, ngimnam tui, myrrh, khil ngah, a hawngsah mi a ngah te keng un. ¹² Nohten na khut sungah sum a let nih in keng un. Dip sungah ken mi sum cu laksawng tuk in keng leh ta un. Hi thu cu ngallin tuk mi thu um hi. ¹³ Na nau uh vang cu keng in a ma nelah hawh leh ta un. ¹⁴ A man nohtei U pakhat le Benjamin hawh tik tuk in nohten a ma thinlung kim nak thu cu thawmngeng Pathian in pia ta hen. Mah hang kei cu capa thih nak thuak tale thuak tung hitin, a catei lakah a tihbang in, ¹⁵ A mun laksawng hei hihen, a muhtei khut sungah sum a let nih hei hihen, Benjamin hei hihen, keng in a hawh ten, Izip ngam ah hawh in Josep mai ah ding haw.

¹⁶ A muhte tuah Benjamin a tel mi cu Josep in a muh ten, lai ngan tupa sam in a muhte cu innsung ah sam in. Nganhing te that in an eih tuk bawl in. A muhte cu kei mah tuah sun siah an ei tuk ung hitin thu a cah bang in, ¹⁷ Lai ngan tupan bawl in a muhte cu Josep inn ah pui hi. ¹⁸ Josep inn ah a pui ten a mun a muhtei dip sungah a masa in a piak mi sum hang sam zo hi. A man sual zei tuk hi. Ohtei sual bawlnak hang sila cang tikin laak te kem tik tuk hitin a son ceng haw ten, ¹⁹ Josep lai ngan tupai bulah nek tik in, inn kongka bul pen otpih hi. ²⁰ Topa aw, a bosa huncan in kohten ancang lei tuk in a thungai heng ung hi. ²¹ Ngiahbuk ah heng in dip te ka hon uh ten, keimu venghawng ka sum tek uh cu kiam ngawlin dip sungah um hi. Mahmi sum cu keng leh ung hi. ²² A tu ah vang ancang lei tuk in a dang sum cu keng tek ung hi. Mahmi sum cu kohtei dip sungah a kon koih sak hum tih thei ma ung hitin a tih haw ten, ²³ Lai ngan tupan na nun sau ta hen, laupah sun. Nohtei Pathian, nohtei pai Pathian, nohtei dip sungah sum cu hehpih in pia zo hi. Nohtei sum cu keiman ngah ing hitin a tih ten, Simeon cu suah in ap hi. ²⁴ Josep inn ah a pui cengten lai ngan tupan tui pia in a ke som hi. Laak te vang an pia hi. ²⁵ Sun huncan ten Josep heng tuk hitin, a mun muansan nak tuah laksawng cu ngalling ham haw zo hi. A innsung ah a muhte cu an ei tuk uh ci tin a mun za haw hi.

²⁶ Josep cu inn a hen ten, a mun a muhtei ken mi laksawng cu Josep nelah a piak hang a mai ah lukun in um haw. ²⁷ Josep in a otpih cengten, nohtei pa cu nohtei son mi bang kum a ham zo hang dam heng maw. Dam laih heng maw tin a dot ten, ²⁸ A mun, topa sila kapa uh cu a dam heng hi. A nung laih heng hitin tiin a lukun in bia haw hi. ²⁹ Mah cengten Josep in zo in a nui capa, a U nau suahpih loli Benjamin a muhten hi mipa cu nohtei a masa son mi nohtei nau hi maw tin a dot ten, na Pathian in bawm ta hen ka capa tin a tih cengten, ³⁰ A nau suahpih loli mu in ningnat nak thinlung a neih hang, a man lang ding in hawh hi. A kahnak tuk mun zei in zaunak khan sungah tum in kap hi. ³¹ Mah cengten a mai phiat a thinsup in a pawlam ah a tul leh ten ankuang bawl un hitin, ti hi. ³² Josep tuk kuang khat, a U tei ca tuk kuang khat, Josep tuah ei tu Izip miphun tei ca kuang khat tek in bawl haw hi. Izip miphun ten Hebru miphun te tuah munkhat ah an ei ma hi, mahmi thu cu Izip miten nawngkai sa haw hi. ³³ U le nau te cu a ngeng bel pen pan a neu bel tian Josep mai ah khung haw. A mun pakhat le pakhat cu zo in thasiah zet haw hi. ³⁴ Josep in a muhte tuah ei tuk mi hempoh a man pia hi. Benjamin co mi cu a U tei co mi sang in a let nga in tam hi. A mun in le ei nop zet in um haw hi.

Dip sung pen sum