¹ Ishmeel miphun ten Josep cu pui in Izip ngam ah a hen ten, Izip miphun Pharoah kumpi cing tu Portiphar nelah zuak haw hi. ² Pathian cu Josep lamah a um hang a mah cu a ngaihsut nak tuang zet hi. Izip miphun a topa inn ah um hi. ³ A ma lamah Pathian a um hang, a bawl mi hempoh tuang zet in a um mi thu cu a topa in mu hi. ⁴ Mah hang, Josep cu a topa mai pen mitmai pha co hi. A topa’n a innsung ah innsang hotu in a piak ten a neihnak hempoh ap hi. ⁵ Mah tihcun inn le a neihnak hempoh a uk tik ni pen pan Pathian in Josep ca Izip miphun pai inn cu thupha a piak hang, a piak mi mui cu thupha cu a sunglam le a pawlam, neihnak hempoh hum ah heng hi. ⁶ Topa’n a neihnak hempoh te Josep khut sungah ap in, a eih tuk an sial ngawl a dang a neihnak hempoh thei ma hi. Josep cu a umdan ziaza a thuang vang a mawi zet mipa hi. ⁷ Mah cengten topa nupi in Josep deihnak thinlung a neih ten kei mah tuah zau in hitin, ti hi. ⁸ Josep in ka topa cu innsung ah a um mi neihnak hempoh ka khut sungah ap zo hi. Kei man aizong nei hum tih hei thei mang hi. ⁹ Hi innsung ah kei mah sang a ngeng saw mi um ma hi. Ka topai nupi nangmah sial ngawl ithu hei kei mah a kham tu um ma hi. Mah a hih hang, sualnak a ngeng mi hi thu cu kei man bawl in Pathian cu itihbang in sual tik thei hum tin, a topai nupi cu el in don leh hi. ¹⁰ Mah tihcun a to nu in nisial sualsoh naven, Josep in a thu ngai ngawlin a mah tuah zau tukin a um tuk thu pen pial hi. ¹¹ Nikhat ni in Josep cu na dek tuk innsung ah luh tum in, innsung ah pano pakhat no hei a um ngawl ten, ¹² A tonu in kei mah tuah zau in hitin tiin, Josep angki pen dok in Josep cu a angki zam a pawlam ah tai tul hi. ¹³ Mah tihcun a tonu khut sung pen a van cu zam in, a pawlam ah tai tul hi tih cu a tonu in a theih ten, ¹⁴ Innsung pano te sam in nohten zo un. Ohtei sungah Upat tuk ngawl in Hebru miphun pa cu topa hihnak ah koih zo hi. A mah cu kei mah tuah zau tuk in a luh tum hang, kei man aw nging zet tuah au ing hi. ¹⁵ Aw ngingzet tuah au mi cu a zak ten a man a puan zam in a pawlam ah tai tul hitin a tih cengten, ¹⁶ A topai hen tian a puan cu a ma nelah koih hi. ¹⁷ Topa a hen ten, topa na koih mi Hebru sila pa’n kei mah Upat ngawl in lut tum hi. ¹⁸ Kei man ngingzet aw tuah ka au ten a puan zam in a pawlam ah tai tul hi tih mi awnkam thu son hi.