34

1 Jakop nupi Leah hinmi canu Dinah cu mah ngam miphun numei te zo tuk a hawh laih in,

2 Mah ngam uktu Hiv miphun, Hamor kumpi capa Shechem cu Dinah a muhten lain a zaupih hang, a mah cu sualpih hi.
3 Mahcengten a mah a itnak bo ngawl in a ih hang itnak thinlung tuah zo hi.
4 A pa Hamor nelah luttum in hi numei nu cu ka nupi tuk in dong in hitin, ti hi.
5 Jakop in a canu Dinah cu zonsak bawlsiatnak thu thei naven, a catei cu ngamlak nganhing te tuah a um haw hang, a muhte ngak in daiden no um hi.
6 Mahcengten, Shechem pa Hamor kumpi cu Jakop otpih tuk hung in,
7 Jakop caten thuthang a zak haw ten ngamsung pen heng haw hi. Mah kumpi capa in Jakop canu Dinah cu a zaupih hang, Isarel miphun sungpen sualnak thu, bawltuk ngawl mi thu a bawl hang a mun a thin na in, a thinuukzet haw hi.
8 Hamor kumpi in a muhte otpih in, ka capa Shechem in na canu it lei ta hi. Huaitik in hitin, ti hi.
9 Nohten Keimuhte tuah pakhat le pakhat huaidunnak bawl in na canu te cu huaitik un hitin, ngen haw. Keimuhtei canu te vang huai bok un.
10 Nohte cu Keimuhte tuah munkhat ah um in, hi ngamsung ah khamnak um ngawl khua sa nung in, sum bawl lei dun in le zuak dun te bawl la un in um tuk hung hitin, ti hi.
11 Shechem in nangmuhtei thinlung kim ta hen. Na nget mi hempoh pia tung hi.
12 Piak tuk mi neihnak hei hihen, laksawng hei hihen, a dawm a tam ti ngawl in na ngetnak uh bang in pia tung. Hi numei bek cu huaitik un hitin a numei nui pa le a nau tei nelah in ti hi.
13 Jakop caten a U nu Dinah cu Shechem in a sualpih thungaisung in kumpi capa le a pa Hamor cu zol in a son mi cu,
14 Ka U nu cu vunlektalh ngawl mite huaitik thei ma ung hi. Huaitik vang sonsiatnak thu in cang hi.
15 Nohten keimu sakhua bawl mi bang bawl in pano hempoh vunlek talhnak thupha co tale kohten lungkim tuk ung.
16 Mah ahitale, kohtei canu cu Nangmuhte huaitik in nangmuhtei canu te vang huaidunnak hang, Nangmuhte tuah langkhat um in miphun khat in cangtuk hung hi.
17 Mahtihbang bawl ngawl in le Keimuhtei awnkam thungai ngawl in, vunlektalh ma tale kohtei canu te keng in hawhtuk ung hitin, ti haw hi.

18 Mahmi awnkam thu cu Hamor kumpi le a capa Shechem ten deih in,
19 Mahmi capa in Jakop canu cu a ih leita hang in hihen, a pai miphun pih te sang in innpi a neih hang in hihen, lungkim cop hi.
20 Mahcengten Hamor kumpi le a capa Shechem cu a khuapi kongka ah hawh in khuasung mite tuah otpih dun in,
21 Ngulcam te aw, a muhte cu eimuhte tuah lemcang zo. Ohtei ngam ah um in sum bawl vanzuak in um haw ta hen. Ohtei ngam cu a muhtei um nop tuk in zalzet poh hi. A muhtei canu te tuah huaidun tuk hung hi. Ohtei canu te vang a muhte huaitik tuk hung hi.
22 Mahhang vunlek talhnak thupha a co bang, ohtei pano hempoh vunlek talhnak thupha co bek ten, a mihing ten ohtei sungah um in miphun pakhat cangtuk in lungkim haw hi.
23 A muhtei tuu, khui pen pan nganhing te, a neihnak te ohtei ta hi tuk ma maw. A muhtei deihnak ah zuituk hung hi. A bawl uh tale a muhte cu ohtei sungah um haw tuk hitin,
24 Hamor kumpi le a capa Shechem son mi awnkam cu khuapi kongka pen a tul mi hempoh in ngai in pano hempoh vunlek talhnak thupha co haw hi.
25 Mahtihcun coin ni thum a kim ten na zet um haw in Jakop capa, Dinah naupa Simeon le Levi, Unau panih te cu ngalhiamnam pakhat veve keng in ngallinnak nei ngawl mi khuapi cu do in pano hempoh that haw hi.
26 Hamor kumpi le a capa Shechem cu nam tuah that in Dinah cu Shechem inn pen dawktul in pin pih haw hi.
27 A U nu a sualpih hang, Jakop caten a thah sa mitei lakah hawh kikleh in khuapi cu a siatsuah hang,
28 A muhtei tuu, kel, khui, laak, khuapi sungah a um mi hempoh lo sungah a um mi neihnak hempoh hei hihen,
29 A muhtei nupi, naupang hempoh long in a innsung ah a um mi hempoh long in siatsuahkhawng haw hi.
30 Mahcengten Jakop in nohten keimah cu bawlsiat zo uh ma cim maw. Kanaan miphun, Periz miphun, hi ngam mi hempoh keimah cu hua tuk bawl haw zo hi. Kohten miphun a dawm hang, a mun hulawm in keimah do in a thah hang, keimah le ka innsung sang hempoh siatsuahkhawng tuk hitin Simeon le Levi cu a tihten,
31 A mun kohtei U nu cu suzuak te bang ngaisung in bawltuk mi maw tin, don leh haw hi.
Bethel ah Jakop a kihlehnak