¹ Mah cengten Jakop in zo in a U Esau cu mihing zali tuah ngaldo tukin a hawh mi cu a muh ten, Leah, Rachel, sila panih sung pen a cate khen in pia hi. ² Sila nu panih cu a cate tuah a mai ah um tik in, Leah le a cate cu lo sungah hei hihen, Rachel le Josep cu a nunglam ah koih hi. ³ A muhtei mai ah a mah loli kal vawkin vei salih tian a bok lukun in a U bulah nek hi. ⁴ Mah cengten Esau muak tuk cu a tai hawh in a ngawng pen kawi in a nap ten a panih in kap haw hi. ⁵ Mah ceng a zoh ten numei te, naupang te a muhten na neih mi hi te cu a kua te hum tin a dot ten, topa sila cu Pathian piak mi naupang te hitin a don cengten, ⁶ Sila numei ten a cate tuah nek in a lukun in um haw. ⁷ Mah cengten Leah in a cate tuah nek in a lukun haw hi. Mah cengten, Josep le Rachel cu nek in a lukun haw hi. ⁸ Esau in ka muh mi nganhing a hon te cu a koi ta kaw tin a dot ten topai thinlung tawk tukin cang ta hen hitin, don leh hi. ⁹ Esau in ka nau aw, kei man lungkim tawk nei bok ing. Na neihnak te la leh poh in hitin, ti hi. ¹⁰ Jakop in mah tin ti pah sin. Na thinlung a kim tale ka piak mi laksawng cu la poh in hi. Pathian mitmai mu bang in topai mitmai cu mu ing. Na thinlung vang nem hi. ¹¹ Topai nelah a heng mi ka thupha cu la poh in. Pathian in kei mah cu a hehpih nak tampi bawl zo hi. Ka lungkim tawk no um hitin a sosuah nak hang la hi. ¹² Esau in khualzin tuk hung hi, na mai ah kei mah cu hawh tung hitin tiin, ¹³ Jakop in na theih bang in hi naupang te ningnat huai zet laih hi. Tuu, kel, khui a nu te cu ka nelah um hi. Nikhat sung khual a zin thei haw ta vang, neihnak hempoh te thi khawng haw tuk hi. ¹⁴ Mah hang topai sila mai ah hawh ham poh in. Kei cu ka neih mi nganhing te, naupang te, a cang thei tawp in topai umnak Seir ngamah heng tuk in dawm het no kuat tung hitin, ti hi. ¹⁵ Esau in mah ahitale ka nelah a um mi hek khat te ka nau na nelah koih hih tung hitin a tih ten, Jakop in itihbang in a kulnak um hum? Topa deihnak thinlung kim ta hen tin a don leh ten, ¹⁶ Esau in mahmi ni in Seir ngamah pin kik leh hi. ¹⁷ Jakop cu Succoth ah khualzin in a umnak tuk inn hei hihen, nganhing tei umnak tuk hei hihen ngan hing tei umnak buk sa hi. Mah hang mahmi umnak mun cu Succoth tin, ti hi.