32

¹ Jakop cu khualzin leh in vancung miten muak tuk a hen suk haw mi cu, ² Jakop in a muh ten Pathian ngalkap te hitin tiin, mah lai mun cu Mahanaim tin a min sa hi.

³ Mah cengten Jakop in a U Esau umnak Edom ngam tih mi Seir ngam ah thuthang puak tu kamtai te a mai hah in a cah mi thu cu, ⁴ Topai sila Jakop in kei cu Laban nelah cam in a tu tian um laih ing. ⁵ Kei man khui, tuu, kel, sila pano le numei tampi nei ing. Kei cu topai thinlung tawk tuk in ngen ing hitin ka topa Esau cu ngen in hitin, thucah hi. ⁶ Thuthang puak tu kamtai ten Jakop nelah pin leh in kohten topa na U Esau nelah heng zo ung. A mah cu topa tawk tuk in mihing zali tuah hawh tuk hitin, son leh haw hi. ⁷ Mah cengten Jakop in lau zet thinkham a nelah a um mihon, tuu hon, khui hon, kalauk te cu khennih ah khen in koih hi. ⁸ Itahum titale, a honkhat cu Esau in a mu tale that in a tanglaih mi a honkhat cu luat tuk hitin, ti hi. ⁹ Mah cengten Jakop in kapa Abraham Pathian, kapa Isak Pathian, Topa in na ngam, na miphun pih tei lakah pin ten hi. Kei cu nangmah nelah hehpih nak bawl tung hitin, ti zo hi. ¹⁰ Topa sila nelah na lak mi lainat nak thukam a neu bel hei kei cu co taak mang hi. Kei cu a bosa huncan ah hi Jodan ngun tuipi cu thiangkhut tuah bek hawh ing. A tucun ngualcam khennih in um hi. ¹¹ Mah a hih hang, kei cu ka U Esau khut pen pan tuk in thungen ing hi. A mah cu hung in kei mah hei hihen, ka nupi te hei hihen, that tuk hitin launak um hi. ¹² Topa in kei cu na nelpen a man mi hehpih nak tuah sialzawh ngawl in a tam mi tuipi mawk philnel bang na miphun cang tik tung tin thupia zo hitin, thungen hi.

¹³ Mah lai umnak mun ah zan khua um in ka khut suah neihnak sung pen ka U Esau laksawng piak tuk, ¹⁴ Kel a nu zanih, kelcang kul, tuu a nu zanih, tuu a cang kul, ¹⁵ Nawi in laih a no tuah kalauk a nawi suuk a nu sawmthum, khui a nu sawmli, khuicang sawm, laak nu kul le laak no sawm cu keng in, ¹⁶ Pakhat le pakhat a tuam tum no tek a khen koih in, ka khut sungah a ap cengten nohte cu ka mai ah hawh in honkhat le honkhat cu a kang in hawh un hitin a sila te thucah ta hi. ¹⁷ A masa bel in a hawh tute vang, ka U Esau cu nangmah a tawh ten nang cu a koi mihing kam tin dong hi. Ai lai ah hawh tuk kam? Na mai ah a um mi nganhing te a koi ta hum tin a dot ten, ¹⁸ Topai sila Jakop ta hi. Topa Esau a piak tuk mi laksawng hi. A mah cu nungah um hitin hilh tuk in thucah hi. ¹⁹ Mah bang bok a panih nak mihing, a pathum nak mihing, a hon a hon in a zui tu mihing te cu nohten Esau na tawk uh tale hi tihbang cun son un hi tih hei in hihen, ²⁰ Topa sila Jakop cu nung ah um hitin son tuk in thucah ta hi. Jakop in a tun ka mai ah a hawh mi laksawng tuah a thinlung kei man dai tik tung hi. Mah cengten mit mai cang tawh dun ten, kei mah sang hei sang kha thei hitin, ngaisung hi. ²¹ Mah tihbang in Jakop mai ah laksawng cu hawh masa tik in, a mah cu zan ten mihon pi te cam in um hi.

Pathian le Jakop a buan dunnak

²² Zingkhua vak laih ngawl tho in a nupi panih, sila panih, capa heikhat te keng in Jabbok lui tui a dai nak mun cu tan haw hi. ²³ Mah tihcun a muhte keng in a neihnak hempoh tuah lui langlam ah a tan cengten, ²⁴ Jakop cu a mah bek um in mihing pakhat tuah vak tian buan un hi. ²⁵ A mah cu a man a neh ngawl nak thu a theih ten, Jakop kawng sawh in a buan dun laih tak in a khom pel hi. ²⁶ A man kei mah hah in, khuavak awn zo hitin a tih ten Jakop in Topa aw kei mah thupha na pia ma tale hawh thei tuk ma ci tin, ti hi. ²⁷ A man, na min a kua hum tin a dot ten Jakop ing hitin, don leh hi. ²⁸ Na min cu Jakop tin sam leh ngawl toh in Isarel tin sam tuk hi. Itahum titale nang cu Pathian tuah hei in hihen, mihing tuah hei in hihen, nangmah tuah zuam dun in neh zo ing hitin, thupia hi. ²⁹ Jakop in na min cu a kua hum? Kei mah lak in hitin a doten ka min cu ita dong thei cim tin a dot hang, mah lai mun cu thupha pia hi. ³⁰ Mah lai mun cu Peniel tin Jakop in sam hi. Itahum titale kei cu Pathian mitmai cang ka mu ta vang, ka nunnak cing tu hitin, ti hi. ³¹ Peniel mun pen Jakop a hawh cengten nisuak zo hang, a mah cu a ke bai lawlok thah in hawh hi. ³² Mah tihcun Jakop kawng thangui pi cu a sawh hang, Isarel miphun ten a kawngah a um mi thangui pi cu tu ni tian ei ngawl in cang haw hi.

Esau le Jakop a tawhdun nak