31

¹ Mah cengten Laban caten ka pai neihnak hempoh Jakop in laksak khawng zo hi. Ka pai neihnak hang, a man hauhsak nak tampi nei zo hitin a tih haw mi cu Jakop in a zak ten, ² Laban mit mai a zoh ten a bosa hun bang ngawl in a danglam thu cu mu hi. ³ Pathian in na pu le pa tei um nak ngam, na miphun pih tei lakah pin in. Kei cu nangma lamah um ing tin Jakop cu ti hi. ⁴ Jakop in mihing hah in Rachel le Leah cu tuu hon umnak ngam lakah a sam ten, ⁵ Nohtei pa hi mitmai cu kei ma nelah a bosa huncan bang ma hi, a danglam in kei man mu ing hi. Mah naven, ka pai Pathian cu kei ma lamah um hi. ⁶ Napai thu cu ka tih theih tawp in keiman cingkem ing hi tih cu nohten thei uh ci. ⁷ Na pa’n kei mah cu zol in ka co taak mi thaman cu veisawm thek zo hi. Mah naven, keimah bawl siat tuk cu Pathhian in phal ma hi. ⁸ A man, a can a tial te cu nangma thamman hen hitin a tih ten tuu, kel, a um mi hempoh a can mi nganhing hempoh cawm uh ci. ⁹ Mah tihcun Pathian in na pai nganhing te la in kei mah pia zo hi. ¹⁰ Nganhing hempoh te nawh khawng ten ka zo le nganhing a nu te tuah a pawldun mi a cang te cu a can khawng a hihnak thu ka mang sung pen mu zo ing hi. ¹¹ Pathian vancung mi in Jakop tin mang in kei mah a sam ten kei mah um ing hitin, don ing. ¹² A man zo hi. Nganhing a nu tuah a nawh dun mi a cang hempoh a can in um haw hi. Itahum titale nangma nelah Laban bawl mi hempoh kei man mu ing. ¹³ Kei man, na sialsiah nak khuam cu sathau buak in kei ma nelah thukam nak bawl mi Bethel umnak Pathian ing hi. A tun ding in hi umnak mun pen na suah tul hang, na miphun pih tei umnak ngam ah pin leh in hitin Jakop a zak mi cu a son ten, ¹⁴ Rachel le Leah in kohten a ma inn cu itihbang in seng thei hum? Itihbang in lo co thei laih hum? ¹⁵ A man keimah cu ngam dang mite bang ngaisung thei hima maw. Kei muhte zuak zo hi. ¹⁶ Ohtei pai nelpen Pathian laksak mi hauhsak nak hempoh ohtei neih mi ohtei canu capa tei ta hi. Mah hang Pathian thucah nak bang a tuin bawl tuk hung hitin, don leh haw hi.

¹⁷ Mah cengten Jakop cu ding in a nupi te kalauk hum ah khung tik hi. ¹⁸ A neih mi nganhing cu Padanaram umnak pen ngah mi nganhing hempoh le a co ngah mi neih nak hempoh te keng in a pai umnak Kanaan ngam ah hawh hi. ¹⁹ Laban in tuu mul met tuk in midang tei nelah a hawh laih tak Rachel in Terah zuk milim cu ngu hi. ²⁰ Jakop in a tai nak tuk thu hilh ngawl in, Syria miphun in a cang mi Laban a zolnak hang in neh hi. ²¹ Mah tihcun a neihnak hempoh keng in a tai hang, ngun tuipi a langlam ah a manlang zet a hawh cengten, Gilead mual lam zuan in hawh hi.

Jakop nungpen Laban hilnak

²² Jakop a tai nak thu cu nithum lawi ten Laban in a theih ten, ²³ U le nau te sam in ni salih sung a hil hang, Gilead mual hum pen pha hi. ²⁴ Pathian in Syria miphun Laban nelah zan huncan ten mang in a hen hang, nang cu Jakop pha le pha ngawl cu son pah sin hi ngal ling in hitin, ti hi. ²⁵ Mah cengten Jakop in a buk cu Gilead mual hum ah sa zo hi. Laban in hil in a phat ten, a U le nau te tuah mual hum ah buk sa in um hi. ²⁶ Laban in nang cu itihbang in bawl kam? Ngaldo nakah mat ngah mite bang keimah zol in ka canu te long in hawh ma cim maw. ²⁷ Keimah zol in ita tai kuh thei kam? Kei man lungdam nak cu bawl in le lasa phaidak te tum in, nangmah hah tuk ita kei mah hilh ngawl in um kam? ²⁸ Ka capa le canu ten kei mah nam tukin ita phal ma kam? Nang cu ngal zet in um cim maw? ²⁹ A tuin nangmah cu bawlsiat thei ing. Mah naven, zan sun zan lam in na biak mi na pa Pathian cu heng in Jakop cu pha le pha ngawl cu son pah sin. Ngal ling in hitin kei mah ti hi. ³⁰ A tuin, nang cu na pai inn na phawh zet hang, hawh ci tih cu a man mi hi. Ka Pathian te ita ngu thei kam tin, Jakop cu ti hi. ³¹ Jakop in nangman na canu te neh siahnak tuah long leh hei long leh kha thei tin ka lau hang tai ing. ³² Na pathian uh te cu mihing pakhat sungah mu tale a mah cu thi hen. Kohtei U le nau mai ah na neihnak hempoh te lak in keng in hitin Laban cu don leh hi. Rachel a nguk thu cu Jakop in thei ma hi.

³³ Laban in Jakop buk, Leah buk, sila panih tei buk sungah tum in zei naven, mu ngawlin Leah buk sung pen tul in Rachel buk sungah tum hi. ³⁴ Rachel in zuk milim cu la in kalauk van bawlnak sungah a koih tum cengten, a van humah khung hi. Laban in buk pakhat sungah zei tum in a muh ngawl ten, ³⁵ Rachel in a pai maipen ka din theih ngawl hang, ngaihsut nak thinlung nei pah sin. Numei tei sung pen a cat ngawl neih theih mi dan bang kei man nei ing hitin, a pa cu ti hi. Mah tihcun Laban in zei in zuk milim cu mu ma hi.

³⁶ Mah cengten Jakop thinuuk in Laban thu a hilh mi cu kei man i sualnak neih hang, i sualnak a um hang kei mah nasezet in hil thei kam? ³⁷ Ka neihnak hempoh na zeih hang, na neih mi pakhat no hei na mu ma tale na U cu ka U le nau tei mai pen hi lai mun ah koih in. A mun ohtei panih mai pen thukhen sak hen. ³⁸ Kei cu nangma nelah kumkul sung um in na tuu a nu, kel nu te pai tik ngawl in kel cang, tuu cang te ei mang hi. ³⁹ Sahang pet thei mi nganhing cu kei man la ngawl in sung ing hi. Sun hun in ngu hei in hihen, zan hun ngu hei hihen, ka nelah eih tuk na ngen theih mi um hi. ⁴⁰ Sun hun in nisa hei hihen, zan hun in vuk khal hei hihen thuak ing. Hihbuh kham ngawlnak vang thuak ing. ⁴¹ Mah tihcun kei man kum kul sung na inn ah um in na canu panih hang kum heili, tuu le kel ca kum luk sila na deh ing. Mah hang nang cu ka thaman veisawm thek zo ci. ⁴² A tu in kapai Pathian, Abraham Pathian, Isak Pathian a lauhuai mi Pathian cu kei ma lamah a um ma tale nangman kei mah cu a thungai khut thacang in hah tuk hima cim maw. A thungai in ka haksat thuak nak, cim zet na ka dehnak cu Pathian in a muh hang zan tak in nangmah cu Pathian in thu hilh zo hitin, ti hi.

⁴³ Laban in hi canu te cu ka canu te hi. Hi naupang te cu ka cate hi. Hi nganhing te vang kei ma nganhing te hi. Neihnak muh mi hempoh kei ma ta hi. Ka canu tei sung pen hei hihen, a muhtei hin mi ka naupang tei sung pen hei hihen, a muhtei hin mi naupang tei sung pen hei hihen, itihbang in kei man bawl thei hum? ⁴⁴ Mah hang a tuin nangmah le kei ma lak lawh ah theihpih nak cang tik in, ohtei panih cu thukhaam bawl tuk hung hitin, Jakop in don leh hi. ⁴⁵ Jakop in suang cu la in sialsiah nak a phut cengten, ⁴⁶ Suang te hulawm khawm koih un hitin a U le nau te a tih ten, mahmi suang hum ah an eihnak bawl haw hi. ⁴⁷ Mahmi suang hulopkhawm cu Laban in Jegarsahadutha tin sam in, Jakop in Gilead tin sam hi. ⁴⁸ Laban in, tu ni hi suang hulopkhawm seh cu kei mah le nangma lak lawh ah theihpih nak hitin, ti hi. ⁴⁹ Mizpah tin samnak a dang um laih hi. Itahum titale, Laban in ohte cu pakhat le pakhat a khen ceng uh ten, Pathian in kei mah le nangmah lak lawh ah cingkem ta hen. ⁵⁰ Nang cu ka canu te bawl siat in hihen, ka canu te sial ngawl a dang numei te huai hei in hihen, ohtei sungah mihing theihpih tu um ma hi. Pathian in kei mah le nangma lak lawh ah theihpih nak um hi tih hei in hihen, ⁵¹ Mah cengten kei mah le nangma lak lawh ah na sak mi suang hulop seh mi le suang phut cu zo in hi. ⁵² Kei man nangmah do tuk in, hi suang hulopkhawm sialsiah nak cu kal tuk ma. Nang cu kei mah do tuk in hi suang hulopkhawm a seh sialsiah nak suang phut kal tuk ma tin, hi suangseh phut cu theihpih nak tetti in cang ta hi. ⁵³ Abraham Pathian, Nahor Pathian, na pa Pathian cu ohtei lak lawh ah thukhen hen hi tih hei in hihen, Jakop cu ti hi. Jakop in a pai lau mi Pathian cu sal in thukam nak bawl hi. ⁵⁴ Mah cengten Jakop in mual hum ah biakpiak nak bawl in a U le nau te an ei tuk in a sam hang, a mun an ei in mual hum ah zan cam tik haw hi. ⁵⁵ Zing khawma no Laban cu tho in a capa le canu te cu nam in thupha a piak cengten, a ma umnak ngam ah pin leh ta hi.

Esau tawk tukin Jakop a bawlnak