30

¹ Rachel in Jakop ca hin pih ngawl tih a theih ten Leah cu iksik nak thinlung tuah kei mah cu capa pia in hi. Mah ahima tale kei cu thi ngawn tuk poh ing hitin, Jakop cu ti hi. ² Jakop in kei cu nangmah ca neih theihnak a nei ngawl mi Pathian ai awh hi ing maw tin, Rachel cu a thinuuk in don leh hi. ³ Rachel in kei man sila Bilhah nei ing. A ma nelah lut tum in hi. A mah cu ka khuk humah ca cawi in a ma hang kei cu ca nei tung hitin a tih ten, ⁴ Sila Bilhah cu Jakop nupi cang tuk ap in a ma nelah Jakop cu lut tum hi. ⁵ Bilhah cu naupai in Jakop in capa hing hi. ⁶ Rachel in Pathian cu kei ma lam ah thukhen sak zo. Ka awnkam thu za in capa pia zo hitin, a capa cu Dan tin a min sa hi. ⁷ Mah cengten Rachel sila Bilhah cu naupai leh in Jakop in capa a panih nak cu hing hi. ⁸ Rachel in kei cu ka U tuah buan dun zo ing tin tiin a capa cu Naptali tin a min sa hi.

⁹ Leah cu cathang zo tih thu a man a theih ten, a sila nu Zilpah cu keng in Jakop nupi tuk in ap hi. ¹⁰ Leah sila nu Zilpah in Jakop tuah capa cawi hi. ¹¹ Leah in a pha mi heng hitin a capa cu Gad tin a min sa hi. ¹² Mah cengten Leah sila nu cu Jakop in capa panih cawi hi. ¹³ Leah in kei ma lam ah thupha um hi. Mihing canu in kei mah cu thupha co nu tin a sam haw tuk hang, a capa cu Asher tin a min sa hi.

¹⁴ Mah cengten sangvut cangkhop huncan sungah Reuben cu hampa lakah hawh in nau nei thei si ngah cu mu in a nu Leah tukin la hi. Rachel in na capa laakmi nau nei thei si ngah cu a hek keimah pia in hitin Leah cu a nget ten. ¹⁵ Leah in ka pasal na lak cu a neuno mi thu in ngaisung cim maw. Ka capa nau nei thei si ngah la nuam laih cim tin a tih ten, Rachel in mah a hitale na capa nau nei thei si ngah hang pasal cu tu ni zan nangmah tuah zau tuk hitin, ti hi. ¹⁶ Zan ngil huncan hampa lakpen Jakop a hen ten, Leah in muak tukin a hawh ten nang cu keima nelah luttum tuk ci. Ka capa ngah mi nau nei thei si ngah tuah nangmah sap ing hi, tihmi cu a man mi a hihhang, mahmi zan in a mah tuah zau hi. ¹⁷ Leah awnkam thu cu Pathian in ngai in, a mah cu naupai in Jakop in capa a pa nga nak cawi hi. ¹⁸ Ka sila nu cu ka pasal nelah a piak hang, Pathian in kei mah laksawng pia zo hitin a capa cu Isschar tin a min sa hi. ¹⁹ Mah cengten Leah cu naupai leh in Jakop cu capa paluk nak a cawi ten, ²⁰ Pathian in a pha mi laksawng pia zo hi. Ka pasal in capa paluk a cawi hang, a tuin kei mah tuah a cat ngawl um tuk hitin tiin, a capa cu Zabulun tin a min sa hi. ²¹ Mah cengten canu cawi in Dinah tin a min sa hi. ²² Mah cengten Pathian in Rachel cu phawk hi. A ma awnkam cu ngai in ca cawinak a piak hang, ²³ A mah cu naupai in capa a cawi hang, ka thuak mi zotsak nak thu Pathian in vawk sak zo hi, tih hei in hihen, ²⁴ Pathian in a dang capa pia bet hen hitin tiin, a capa cu Josep tin a min sa hi.

Jakop nganhing ngulh a pungzai nak

²⁵ Rachel in Josep a cawi cengten, Jakop in kei cu umnak ngam ah hawh tuk in kei mah hah in hi. ²⁶ Kei cu sila na dek lawh in ka co mi nupi le cate keng in hawhnak tuk thu pia in. Ka na dehnak thu cu nangman thei ci tin Laban nelah a tih ten, ²⁷ Laban in na mit mai pha um ta hen. Pathian cu nangma thu hang kei mah thupha a piak nak thu kei man thei zo ing. ²⁸ Ka piak tuk mi a man hilh in. Keiman pia tung hitin a tih ten, ²⁹ Kei cu na nelah itihbang na dek hum tih hei hihen, na inn ngulh nganhing te kei man itihbang um hum tih hei hihen, pa nangman thei poh ci. ³⁰ Ka hen laih ngawl in na neih nak dawm no hi. A tu cu tampi khang to zo. Ka hennak hang, Pathian in pa cu thupha pia hi. A tuin ka innsung sang ituk ten bawm tuk cim tin, ti hi. ³¹ Laban in a man i pia tung kaw tin a dot ten Jakop in imah pia pah sin. Ka nelah lungdam nak pakhat na bawl nuam tale tuu hon, kel hon te khal in cingkem hih in hi. ³² A tu ni in tuu hon, kel hon hempoh cu kei mah hawh in kel a can te, tuu a hang hempoh te teng in khen tung hi. Mah cengten a can mi kel, a hang mi tuu te ka thaman in cang tik in hi. ³³ Mah a hih hang, tunung ten ka thaman cu na nelah a hen ten, ka dikcang nak cu kei man cingkem tung hi. A can ngawl mi kel, a hang a hi ngawl mi tuu hempoh kei ma nguk mi tin ngaisung in hitin, ti hi. ³⁴ Laban in, na son mi bang hi ta hen tin lungkim in mah ni penpan a can mi kel cang, a can mi kel nu, ³⁵ A ngo tel mi kel hempoh te le a hang mi tuu hempoh te teng in, a capa khut sungah ap hi. ³⁶ Ka umnak mun le Jakop umnak mun cu nithum khuala tuk in thukhen nak um laih hi. Jakop in a tang mi Laban tuu, kel te khal in um hi.

³⁷ Mah cengten Jakop in a hing mi Poplar thingkung, khil thing, mawng kung, a kangkak cu la in, a ngo, a hing, a ngolh kang kung lang tukin a hawng khawh cengten, ³⁸ Tui in mi tuu, kel a cang a nu nawh tik tuk ngaihsut nak a um hang tui a in ten, a hawng khawh sa mi a ngolh kang kung cu tui in nak kuang, tui in nak khuat sungah tuu, kel tei mai ah phut in hi. ³⁹ Tuu, kel te cu ngolhkang kung mai ah a nawh tik hang, a can tihbang in hing haw hi. ⁴⁰ Jakop in tuu, kel no te cu a khen tum koih in, Laban tuu hon, kel hon a can te a hang a um mi hempoh a mai ah tuu le kel te hekdun tik hi. A ma neih mi ngan hing le Laban neih mi nganhing te vang tokhel kha tik ngawlin, pakhat no tek a khen in koih hi. ⁴¹ Thacak mi nganhing te cu nawh dun tik in ngolhkang kung mai ah nawh dun tik tuk in, Jakop in ngolhkang kung te tui kuang sungah a mai hek in koih hi. ⁴² Tha nei ngawl mi nganhing te a mai ngolhkang kung cu lak ma hi. Mah hang tha nei ngawl mi nganhing te cu Laban hi neih mi hi. Tha nei mi nganhing te cu Jakop neih mi hi. ⁴³ Mah tihcun Jakop cu a neih nak khang to in tuu, kel, sila pano numei, kalauk, laak tampi nei hi.

Laban nelpen Jakop a tainak