35
1
Mahcengten Pathian in, tho in Bethel na umnak mun ah hawh in um in hi. Nang cu na U Esau nelpen na tai ten na nelah a lang mi Pathian ca biakpiaknak taitan bawl in hitin, Jakop cu ti hi.
2
Mahcengten Jakop in a innsung sang te tuah a nelah a um mi hempoh sam in, nohtei sungah a um miphun dang tei pathian cu vawk ta un. Vansilh te vang thek in a thiangtho in um ta un.
3
A tu tho in Bethel umnak mun ah hawhtuk hung hi. Kei cu haksat cimnak ka thuak hun sung hempoh keimah sam in, ka hawhnak lamzin ah a heng mi Pathian ca Mahlaimun ah biakpiaknak taitan bawl in hitin, ti hi.
4
A mun a muhtei neihmi miphun dang pathian hempoh le a beng ah a bet haw mi hempoh Jakop pia in Jakop in, Shechem khuapi bulah a um mi oak thingkung nuai ah phum hi.
5
A muhte a thawn khawng haw ten, a elkim khua mihing ten Pathian lau in Jakop cate cu hil ngam ngawl in um haw hi.
6
Jakop in a neihmi hempoh tuah Kanaan ngam Luz khuapi tihmi Bethel umnak mun ah a hen haw ten,
7
Biakpiaknak taitan bawl in Mahlai umnak mun cu Bethel tin a min sam leh leu hi. Itahumtitale a U nelpen a tai ten Mahlaimun pen Pathian lang hi.
8
Rebekah kep mi Deborah cu thi in Bethel umnak mun oak thingpi nuai ah phum hi. Mahmi thingkung cu Allonbachut tin sam hi.
9
Jakop cu Padanaram umnak pen a kih leh cengten, Pathian cu lang leh in thupha a piak celhten,
10
Nang cu a tuin Jakop min in um hi. Tunungten na min cu Jakop tin sam ngawl in Isarel tin sam tuk hitin a tihten, Isarel tin a min sam hi.
11
Mahcengten Pathian in kei cu thawmngeng Pathian ing hi. Khangto in pungzai ta un. Miphun pakhat bek ngawl in ngam hempoh na sungpen cangtuk hi. Kumpi hempoh na miphun sungpen in cang haw tuk hi.
12
Abraham le Isak ka piak mi ngam cu nangmah le na miphun te keiman pia tung hitin, ti hi.
13
Mahtihcun Jakop cu a otpih munpen Pathian heng hi.
14
Pathian cu otpih in thupiak mi umnak munpen Jakop in suang khuam cu phut in suanglek humah a buak in a piak mite hei hihen, sathau hei hihen buak hi.
15
Thuphuan a conak mun cu Jakop in Bethel tin sam leh leu hi.
Rachel le Isak a thihnak
16
Mahcengten Bethel umnak munpen khualzin leh in, Epharath khuapi a nai ten Rachel cu ca hinnak tuk hun heng in nasezet haksat cimnak thuak hi.
17
Mahtihcun haksa cimzet a thuak laihtak naudomtu samah in laupah sin capano neituk citin, ti hi.
18
Rachel cu thi tuk in a um ten a hawvang a tul laihtak a capa cu Benoni tin sam hi. A pa in Benjamin tin sam hi.
19
Rachel cu thi in Bethlehem tihmi Epharath khua hawhnak lamzin ah phum hi.
20
Jakop in khan humah sialsiahnak khuamphut hi. Mahmi sialsiah khuam a phut mi cu tuni tian Rachel khan sialsiahnak khuamphut in cang hi.
21
Isarel cu khualzin leh in Edar khantiannak a kal ah buk sa hi.
22
Mahlaimun ah a um ten Reuben cu hawh in a pai Zino Bilhah cu zaupih hi. Mahmi thu cu Isarel in za hi.
23
Jakop capa heinih um haw hi. Leah cawimi capa cu Jakop capa Upa bel Reuben, Simeon, Levi, Judah, Issachar, Zebulun te hi.
24
Rachel hinmi capa cu Josep le Benjamin hi.
25
Rachel sila nu Bilhah hinmi capa cu Dan le Naptali hi.
26
Leah sila nu Zilpah hinmi capa cu Gad le Asher hi. A muhte cu Padanaram ngam pen a hinmi Jakop cate hi.
27
Mahcengten Jakop cu Abraham le Isak camnak Mamre umnak mun Hebron khuapi Arbah ah a um mi a pa Isak nelah heng hi.
28
Isak a kum cu kum za le sawmliat a kim ten,
29
A kumham zet huncan kim in a thihhang, a miphun tei hulopkhawmnak munah heng hi. Capa Esau le Jakop ten phum haw hi.
Esau tu le canawn