3
1
Ngulpi cu Topa Pathian bawl mi ngamsa namkim sungpen a cipbel a hihhang, numei nelah nohten huan sungah a um mi hempoh thingkung a ngah cu ei pah sin hitin, a thungai in Pathian thukham pia maw tin, dong hi.
2
Numei nu in kohten huan sungah a um mi hempoh thingkung a ngah cu eih tuk thu um hi.
3
Huan a laizang ah a um mi thingkung a ngah cu nohten len kha ngawl ei ngawl in um un. Mah ahimatale thi tuk ci tin, Pathian thukham piak mi um hitin ngulpi nelah ti hi.
4
Ngulpi in, nohte a thungai in thi tuk ma hi.
5
Itahumtitale, thingngah eih ni na mit uh vakin sia le pha thei in Pathian a mahbang tuk hihnak thu Pathian in thei hitin, numei nu cu ti hi.
6
Mahmi thingkung cu eih tuk uk ol zet, a thuangmawinak, cihnak khang tik thei tuk in deihawh mi thingkung a hihnak numei nu in a muhten thingngah cu thawi in ei hi.
7
A mu panih cu a mit vak in a mun vansilhngawl thacang in a um mi cu a theih ten, a muhtei silh tuk theipi ceh khui in a tai pen het in cen tuk bawl haw hi.
8
Mahten ni dainem in huan sungah Topa Pathian a hennak aw cu Adam le a nupi in a zakten, Pathian maipen huansung thingkung lakah ngelh ung hitin, ti hi.
9
Pa thian in Adam i lai ah um cim tin, sam hi.
10
Adam in huan sungpen Topai aw ka zakten, vansilhngawl thacang in um hang ngelh ing hitin, ti hi.
11
Pathian in vansilhngawl thacang in na um cu a kon nangmah son hum? Ei pah sin tin thu ka piak mi thingkung a ngah cu ei zo uh cim maw tin, dong hi.
12
Adam in keimah na piak mi numei nu in thingkung ngah a piak hang ei kha ing hitin, ti hi.
13
Topa Pathian in Nangman itihbang in bawl cim tin numei nu a dotten, numei nu’n ngulpi in keimah a zol hang keiman ei kha ing hitin, ti hi.
14
Topa Pathian in ngulpi sam in nang cu hi thu na bawl hang a beem mi ngamsa, sahang hempoh sang in tamsiatnak thuak saw ci.
15
Nangmah le na nupi hei hihen, na miphun le numei miphun hei hihen, ka ngal in cangtik tung. A man na luhum pen su pek tuk hi. Nangman a ke cawk pen cik tuk ci tin, thupia hi.
16
Numei nu nang cUnaupai haksat cimnak tam sesem tik tuk ci. Cimzet haksatnak thuak in nau hing tuk ci. Na pasal deihnak ah zui in a uknak cotuk in thupia hi.
17
Pano vang thingngah ei pah sin tin thukham ka pia ta vang, na nupi awnkam thungai in na eih khak hang, leipi cu nangma ca tamsaitnak thuak in um hi. Leipi a ngah cu na nun ni sung cimzet in ei tuk ci.
18
Lingkung namkim hei hihen, nangma ca lei ah po tuk hi. Lo sungpen a suak mi thingnah a ceh te cu nangman ei tuk ci.
19
Na suahnak leivul ah na pin leh laklawh na maipen khawuum tul in an ei tuk ci. Itahumtitale, nang cu lei vul na hihhang, lei vul ah pin leh tuk ci tin, thupia hi.
20
Mahcengten Adam in a nupi cu Evi tin a min sa hi. Itahumtitale, a mah cu nunnak a neitu hempoh nu hi.
21
A nung mi Pathian in Adam le a nupi Evi ca kelvun tuah bawl mi cu silh tik hi.
22
Topa Pathian in mihing cu ohtei sungpen pakhat bang in a heng mi a hihhang, sia le pha theihnak nei hi. A tuin a mah cu kumkhua nunnak cotuk a khutdang in, nunnak thingkung ngah cu lain ei leh tuk ngawl toh in thupia hi.
23
Mihing in a ma suahnak lei cu na deh tuk in a nung mi Pathian Eden huan pen hawlvawk hi.
24
Mahhang mihing cu a hawlvawk cengten, nunnak lamzin cingtu tukin, a alh mi ngalhiamnam tuah Cherubim ten huan cu ni suahnak lam ah koih hi.
Kain le Abel