2

1 Mahtihcun vanhum le leipi na hempoh bawl ceng khawng zo hi.

2 Ni salih ni a henten, Pathian in a bawl mi na ceng in a bawl mi hempoh a celhten ni salih ni cu daiden no cawl hi.
3 Ni salih ni cu Pathian in thupha pia in thiangtho tik hi. Itahumtitale, a bawl mi hempoh a celh hang, daiden no cawl in um hi.
Adam le Evi

4 Hi thu cu Topa Pathian in van le lei a bawl ni huancan sungah van le leipi a patnak thu hi.

5 Leihum ah thingkung a po laihngawl, lo sungah cangkung a khang laihngawl in thingkung hempoh bawl hi. Mahcengten Pathian in leihum ah nguahzu tik ma laih hi. Lo sungah na dektute vang um ma laih hi.
6 Leipen a khu a suaktul hang leihumi hempoh nom tik hi.
7 Mahcengten Topa Pathian in lei vul tuah mihing bawl in a nal sungpen nunnak haihawh a semtum ten, a nung mi mihing in cang hi.
8 Topa Pathian in ni suahnak Eden huan a bawl cengten, a bawl mi mihing cu huan sungah um tik hi.
9 Mahmi leipi sungpen a thuangmawi eih tuk a uk ol zet thingkung namkim Pathian in po tik hi. Huan a lai ah nunnak thingkung um hi. Sia le pha theih celnak thingkung vang um hi.
10 Huan nomtik tuk nguntuipi pakhat cu Eden huan sungpen a luan hang, huan pawlam ah nguntuipi pali a kak in luang hi.
11 A pakhatnak nguntuipi cu Pison hi. Mah nguntuipi cu sui umnak Havilah ngam bul hempoh ah luang hi.
12 Mahmi ngam pen a suak mi sui cu phazet hi. Bdellium thingnai le onxy suang vang um hi.
13 A panihnak nguntuipi cu Gihon hi. Ethiopia ngam hempoh ah luang hi.
14 A pathumnak nguntuipi cu Hiddekel hi. Mah nguntuipi cu Assyria ni suahnak lam ah luang hi. A palinak nguntuipi cu Eupharate hi.
15 Mahcengten Topa Pathian in mihing cu lain Eden huancingtuk in koih hi.
16 Topa Pathian in sia le pha khencelnak thingkung sialngawl, mahmi huan sungah a um thingkung a ngah te eih theihnak thu um hi.
17 Mahmi thingkung a ngah cu ei pah sin. Na eih ni in a thungai thi tuk ci tin mihing cu thukham pia hi.

18 Topa Pathian in pano pakhat bek um cu pha tingawl in, a mah tuah khawthu bawmtu numei cu a ma ca bawltung hitin, ngaisung hi.
19 Topa Pathian in lei ah a um mi ngamsa hempoh le vanhum vano hempoh lei tuah a bawl cengten, mihing cu itihbang sam tuk hum tihmi thei tuk in, mihing umnak ah keng hi. Mihing vang cu a nung mi ngamsa hempoh a sam bang in a mun min nei tek haw hi.
20 Mahtihcun mihing cu a ngilo ngawl a beem mi ngamsa hempoh hei hihen, vanhum vano hempoh hei hihen, sahang hempoh hei hihen, a min pia in sam hi. Mahnaven mihing tuah a khawthu a lemcang mi ngualcam um ma hi.
21 Mahcengten Topa Pathian in mihing cu hihbuci zet a hihbuh tik hang, a hihbuhci laihtak anguh pakhat cu Pathian in a lak cengten, mah a nguh ai in taksa peh tik hi.
22 Topa Pathian in mihing sungpen a lak minguh tuah numei a bawl hang, mihing umnak mun ah keng hi.
23 Mihing vang a tuin a mah cu ka nguh sungpen a suak mi ka nguh, ka taksa sungpen a suak mi ka taksa hi. Mihing sungpen a suak mi a hihhang, a mah cu numei nu tin sam tuk tin, ti hi.

24 Mahmi thu hang, pano in a nu le pa cu zam in a pasal tuah um ngel in, a muhte cu taksa pumpi pakhat in cangtuk hi.
25 A muhtei nupa panih cu vansilh ma naven, zahcaknak um haw ma hi.
Mihing caaknak