29

1 Mahcengten Jakop cu khualzin in ni suahnak ngam ah a henten,

2 Zo in, ngamlak a patnak pen tuikhuk pakhat mu hi. Mah tuikhuk cu tuuhon te tui in tuk a piak hang, tuikhuk bulah tuuhon pathum a pawl a pawl in hihbu zau leng haw hi. Tuikhuk kongkapi hum ah suang ngengpi um hi.
3 Tuu khaltuten Mahlaimun ah a hulopkhawm ten, tuikhuk kongka a sin suang cu lumlet in tuu te tui a piak cengten, suang a umnak kel tuikhuk kongka hum ah delh in sin leh hi.
4 Jakop in ka U le nau te aw, nohte i laimun pen heng uh kam tin a dotten, kohte cu Kanaan khuapi pen heng ung hitin, ti haw hi.
5 Mahcengten Jakop in Nahor capa Laban cu thei kha cim tin a dotten thei ing hitin a tihten,
6 A mah cu dam a maw tin a dot leh ten dam hi. A canu Rachel cu tuu te tuah heng tuk hitin, son haw hi.
7 Jakop cu sun huncan tampi nei laih hi. Tuu te hulopkhawmnak hun ma laih hi. Tui piak cengten hawh in cing hih ta un hitin, ti hi.
8 A mun, tuukhaltute cu hullawmkhawm in tuikhuk kongka sin suang cu a lumlet ceng bek ten, tuu te tui piak theih hi. Mahngawlcun tui piak theih ma hitin, son haw hi.
9 Mahtihcun pakhat le pakhat otpih dun a um haw laihtak, Rachel in a pai tuu te a khalh hang tuu te cu pui in hung hi.
10 Jakop in a pu Laban canu Rachel le a pu Laban tuu te a muhten, a bulah nek in tuikhuk a sin suang cu a lumlet cengten a pu Laban tuu te cu tui pia hi.
11 Mahcengten Jakop in Rachel cu nam in ngingzet in kap hi.
12 A mah cu Rachel pa hi tupa, Rebekah capa a hihnak thu a zakten Rachel cu tai in a pa nelah son hi.

13 Laban in a tupa Jakop thu a zakten, muak tuk a manlang hawh in pompai thah nam in a ma inn ah pui hi.
14 Laban in a thungai in nang cu ka thi le sa hi ci tin, ti hi.
Leah le Rachel cu Jakop huainak

15 Jakop cu ha khat hawng a um cengten Laban in nang cu ka tupa na hihhang, a thawnthong sila in um tuk cim maw. Na co nuam mi man cu keimah hilh in hitin, ti hi.
16 Mahcengten Laban in canu panih nei hi. Upa saw cu Leah hi. A nau ta saw cu Rachel hi.
17 Leah cu mawi ngawl saw hi. Rachel cu a um dan le a cthuangmawizet hi.
18 Jakop in Rachel a ih hang Laban cu a pu canUnau ta saw cotukin, kum salih sila na dektung hitin a tihten,
19 Laban in midang te piak tuk sang nangmah piak cu pha saw hi. Keimah tuah langkhat um in hitin, ti hi.
20 Jakop in Rachel cotuk in kum salih sung na dek hi. Rachel cu a ihzet hang, kum salih cu ni demno bang ngaisung hi.

21 Jakop in a huntek cu kim hi. Kei cu nupi tuah pawldun tuk pia in hitin Laban nelah a hilh ten,
22 Laban in mahmi umnak sungah a um tu hempoh hullawmkhawm tikin puai bawl hi.
23 Zanngil huncan a henten a canu Leah cu keng in Jakop nelah hawhtik hi.
24 Laban in Zilpah tihmi sila nu cu a canu Leah laksawng pia in, a canu cu puitum in Jakop tuah pawldun hi.
25 Zinglam huncan a henten Jakop in zo in Leah tih a theih ten, Laban nelah hawh in ka nelah na bawl mi thu cu itih bang hum? Keiman Rachel cotuk in sila na dek ma ing maw. Keimah cu ita zol kam tin a tihten,
26 Laban in kohtei ngam ah canu Upa saw pia masa ngawl in a nau ta piak cu ngah ma hi.
27 Kum salih a kim tian ngak hih in hi. Mahcengten kum salih na dek sak leh in Rachel cu nangma tuk in pia tung hitin a tihbang,
28 Jakop in lungkim in kum salih a kim cengten,
29 Laban in Bilah tihmi sila numei pia in a canu Rachel cu pia hi.
30 Jakop in Rachel tuah pawldun in Leah sang in it saw hi. Laban nelah kum salih sila na dek hi.
Jakop canu capa te

31 Leah cu huat co hitih Pathian in a theih ten capa hinnak thupia hi. Rachel cu mi cing hi.
32 Leah cUnau a pai hang capa hing in Reuben tin a min sa hi. Itahumtitale, Pathian in ka haksat cimnak cu a thungai in mu zo hi. Mah a hihhang a tu kapasal cu keimah it tuk hitin, ti hi.
33 Mahcengten naupai leh in capa a hin ten, keimah huat co mi Pathian in a theihnak thu a theih hang, hi capa vang a hehpih in pia hitin a tih cengten capa cu Simeon tin a min sa hi.
34 Mahcengten naupai leh leu in capa a hin ten, kapasal in capa pathum keimah a hin tik hang a tu veikhat a mah cu keimah phial tuk hitin tiin a capa cu Levi tin a min sa hi.
35 Mahcengten naupai leh leu in capa a hin ten, Pathian a tuin keimah thangphat tuk hitin a tih hang, a capa cu Judah tin a min sa hi. Mahcengten ca nei ngawl in um hi.