27

¹ Mah cengten Isak cu tek a mitthim khua a muh theih ngawl toh hang, capa U pa saw Esau cu ka capa tin sam in kei mah um ing hitin, don hi. ² A pan kei cu a tuin tek zo ing. Ituk ten thi tuk hum tih kei man thei mang hi. ³ Ka thih laih ngawl in ka hawvang nangmah thupha pia tuk in na hiamnam le na thalcang keng in ngam lakah sa vai hawh in ka eih tuk sakhi a ngah tuk zei in, ⁴ An ka eih tuk a uuk thei bel mi sakhi sa cu huan in ka eih tuk pia in hitin, ti hi.

⁵ Mah tihcun Isak in capa Esau a son mi cu Rebekah in a zak ten, Esau sakhi sa ngah tuk in ngam lakah zei tuk in a hawh laih tak, ⁶ Rebekah in capa Jakop cu sam hi. ⁷ Napa’n ka thih laih ngawl in Pathian mai ah nangmah kei man thupha a piak tuk thu, ka eih tuk sakhi sa cu keng in sakhi sa huan in hitin na U Esau a hilh mi cu kei man za ing. ⁸ Mah a hih hang, ka capa thu ka cah mi hempoh ngai in. ⁹ A tuin kel hon umnak ah hawh in a pha bel mi kel no panih cu ka nelah keng in. Napa cu a uuk zet mi sa hang tui huan tung hi. ¹⁰ Napai thih laih ngawl in nangmah thupha a piak tuk thu, mahmi an cu na pa ei tiik in nangman na pai nelah pia in hitin, ti hi. ¹¹ Jakop in ka U Esau cu mul a nei mipa, kei cu taksa mam mipa ing hi. ¹² Kapa in kei mah cu a zen hei in zen teh tuk hi. Mah a hih hang kei cu mizol pa tin kei mah cu a ngaihsut nak hang, kei man thupha co ngawl in tamsiat nak thu sia bek co tung hitin, a nu cu ti hi. ¹³ A nu Rebekah in ka capa na co mi tamsiat nak thusia cu ka nelah heng hen. Ka awnkam thu ngai in kel no cu la ten hitin a tihnak bang, ¹⁴ A mah cu hawh in kel no cu a nui nelah a ken hang, a nu in a pa cu a uuk zet mi sahang tui huan sak hi. ¹⁵ Mah cengten Rebekah cu inn sung a khut sungah a um mi capa U pa saw Esau van, a pha mi van te la in capa a nauta Jakop cu silh tik hi. ¹⁶ Kel no vun cu la in a khut ah hei hihen, a long a mam nak ah hei hihen, a silh tik cengten, ¹⁷ A huan mi sa tuihang le moh cu capa Jakop khut sungah pia hi.

¹⁸ Jakop in a pai nelah hawh in pa tin sam hi. A pa in ka capa nang cu a kua kam tin, dong hi. ¹⁹ Jakop in kei cu capa U pa saw Esau ing hi. Pa aw nangma thucah mi bang bawl zo ing. Tho in khung in hi. Pa na hawvang kei mah thupha piak tuk mi thu ka sakhi cik cu ei in hitin, ti hi. ²⁰ A pa Isak in ka capa, hi tih loli a manlang in na muhnak thu cu itihbang hum tin a dot ten, na pai Pathian in ka umnak mun ah a ken zo hang manlang zet in mu ing hitin, don leh hi. ²¹ Isak in ka capa nang cu ka capa Esau a man le man ngawl ka theih nuam hang, nangmah cu zen teh tuk in ka nelah nek in hitin, ti hi. ²² Jakop in a pai nelah cun nek in a pan zen teh in, na aw cu Jakop aw na khut cu Esau khut hitin, ti hi. ²³ Mah tihbang a khut te cu Esau khut bang a mul te a um hang, Jakop a hihnak cu a pa in thei ngawl in, thupha pia hi. ²⁴ Mah hang veikhat cu nangmah ka capa Esau nga ngai cim tin a dot leh ten a man ing hitin, ti hi. ²⁵ A pa’n kei mah nek tik in hi. Ka capa hi cik tui hang ka eih tuk in tin a tih ten, Jakop in a pai nelah nek in a pa in ei hi. Cabit tui vang pia in a pa’n in hi. ²⁶ Mah cengten a pan ka capa kei mah cu nek in kei mah nam in hitin a tih ten, Jakop cu nek in a pa nam hi. ²⁷ A pa Isak in a van silh a ngim cu nam in zo in hi, ka capa hi a ngim nam cu Pathian thupha piak mi khut suah ngim nam tui tuah bang ve hi. ³⁰ Jakop in a pa Isak a piak mi thupha co in a pai nelpen a suah tul a ngei ngawl in, a U Esau cu savai nak pen heng hi. ³¹ A man satui hang a uuk zet mi cu huan in a pai nelah keng hi. Kapa na hawvang keimah thupha na piak tuk thu na capa hi cik cu tho in ei in hitin, ti hi. ³² A pa Isak in nang cu a kua kam tin a dot ten, kei cu capa Upa saw Esau ing hitin a tih ten a pa Isak cu can tawtok in a kua kam? ³³ Sa ngah in kei ma nelah a keng tupa cu ilai ah um hum? Na hen laih ngawl in ka eih ceng khawng zo hang, a mah cu thupha pia zo ing. A mah cu thupha mui cu a thungai in co tuk hitin, ti hi. ³⁴ A pai tih mi cu Esau in a zak ten aw nging zet tuah kap in, aw kapa kei mah vang thupha pia in hi, pia in hitin a tih ten, ³⁵ A pan, na nau cu cip zet hung in na thupha mui cu la zo hitin, ti hi. ³⁶ Esau in, a mah cu Jakop tih mi min tuah a man zet mi min sa zo hima maw. Kei mah veinih zol in neh zo hi. Capa U pa saw hihnak cu a masa in la zo. A tuin ka thupha lak sak leh leu hi tih hei in hihen, ka ca in thupha pakhat no hei zam ngawl tih hei in ti hi. ³⁷ Isak in a mah cu na bawipa in cang tik zo ing. A U hempoh te cu a ma nelah sila na dek tu in cang zo. Ancang, cabit tui tuah a mah cu bawm zo. Mah hang ka capa, nangman itihbang in bawl theihnak nei thei tuk cim tin, Esau cu a don leh ten, ³⁸ Esau in, ka pa aw, thupha mui cu pakhat no hei um ma zo maw. Ka pa aw, kei mah vang thupha pia in hi, pia in hitin a pa cu son in mah cengten aw nging zet tuah kap hi. ³⁹ A pa Isak in zo in. Na umnak leipi thau hei hihen, vanhum dai tui hei in dim tuk hi. ⁴¹ A pa in Jakop thupha mui cu pia in Esau in Jakop a huat hang, kapai thasiat kahnak ni cu heng awn zo. Mah cengten a nau Jakop cu kei man that tung hitin a ngaihsut nak tuah son hi. ⁴² Mah tihbang in capa U pa saw hi son mi awnkam cu a nu Rebekah in a zak ten, a capa Jakop cu sam in na U Esau in nangmah that in nangma thu hang a thinnem tuk hi. ⁴³ Mah hang ka capa, ka awnkam thu ngai in. Ka nau Laban umnak Haran khuapi ah tai in. ⁴⁴ Na U a thinnem tian a ma nelah dawm laih pial in um hih ten hi. ⁴⁵ Na U a thinnem in nang cu a bawl mi thu a phawh ngilh ten kei man cah in mah lai mun pen nangmah pui tik tung hi. Ka capa a panih cu nikhat sungin ita kei man sia tik tuk hing ngim tin, ti hi.

⁴⁶ Mah cengten Rebekah in Isak nelah lut tum in, kei cu Heth numei tei hang ka nunnak ciatzet zo ing hi. Hi ngamsung numei bang mi Heth miphun numei te tuah Jakop in nupi a nei tale ka nun hang i nemcuam nak um hum tin, ti hi.