26
1
Abraham uk sung mahmi ngam sungah a cang mi ningkial pamtung nak sial ngawl, ningkial pamtung nak heng leh in, Isak cu Philistine kumpi Abimalek umnak Gerar khuapi ah hawh hi.
2
Pathian in a ma nelah langzet in nang cu Izip ngam ah hawh pah sin. Ka hilh mi ngam ah um in.
3
A tu in hi ngamah cam in. Nangma lamah kei mah um in thupha pia tung. Itahum titale, nangmah le na miphun te hi ngam umnak hempoh kei man pia tung. Napa Abraham ka thukam bang kei man bawl tung.
4
Na miphun te vanhum aksi bang in pungzai tik tung. Na miphun tei hang miphun hempoh thupha co haw tuk hi.
5
Itahum titale Abraham in ka thu awnkam ngai in, ka thucah mi thukham hempoh cingkem hitin, thupia hi.
6
Isak cu Gerar khuapi ah a um laih tak khua sung miten a nupi thu a dot haw ten, Rebekah cu a mawi zet mi a hih hang, hi ngam pano ten a ma thu hang kei mah that tuk launak hang,
7
A man ka nupi tin son ngam ngawl in ka nau nu hitin, son hi.
8
Mahmi khuapi ah huncan ngeipi a um cengten, nikhat ni in Isak in a nupi Rebekah tuah a pawldun mi cu Philistine kumpi Abimalek in kongka pi pen a muh ten,
9
Isak cu sam in, hi numei nu cu a thungai in na nupi hi. Mah hang, a man ka nau nu hitin ita son thei hum tin a dot ten, Isak in a ma hang kei mah thi tuk ka lau hang hitin, don hi.
10
Abimalek kumpi in kohtei sungah na bawl mi thu cu itihbang hum? Mihing pakhat na nupi tuah sualnak a um pang a hin, kohtei hum ah nangman sualnak heng tik hima cim maw tin a tih cengten,
11
Hi nupa te a sualpih tu cu thihnak thuak tuk hitin miphun hempoh thucah hi.
12
Mahmi ngam ah Isak cu anci vawh in kumkhat sung a let zakhat in ancang ngui te ngah hi. Pathian in thupha a piak hang,
13
A mah cu khangto hausa milian tuk tian khangto in a neihnak tampi pung hi.
14
Tuu hon, khui hon, sila tampi nei hi. Mah hang, Philistine miphun ten a mah cu iksik haw hi.
15
A pa Abraham uknak sungah a pai sila tei cawh mi tuikhuk hempoh lei dip sak haw hi.
16
Abimalek kumpi pan nang cu kei muhte sang huham nei saw ci. Kei muhtei lakpen tul in hitin Isak cu thu a piak ten,
17
Isak cu mahmi khuapi pen a suah tul cengten, Gerar munlawn nak ah buk sa in um hi.
18
Mah cengten Isak cu a pa Abraham sila tei cawh mi a pai thih cengten, Philistine miphun tei leidip mi tuikhuk te co leh in a pai min saksa bang a min sam hi.
19
Isak sila ten munlawn co in ciktui khuk mu haw hi.
20
Gerar miphun khui khal tu ten, hi tui khuk cu kei mu tui hitin Isak khui khal tute tuah cuh in a lon mi cu son haw hi. Mah tihcun pakhat le pakhat a londun hang, mahmi tui khuk cu Esek tin a min sa hi.
21
Mah cengten a dang tuikhuk co leh haw. Mahmi tuikhuk cu a lonsak leh leu hang, Sitnah tin sam hi.
22
Mah lai umnak pen thawn in a dang tuikhuk co haw. Mahmi tuikhuk cu a kuamah in a lonsak ngawl hang, kohte um tuk phalnak a pia tu Pathian in a piak zo hang, hi ngam sungah kohten khangto tuk ung hitin ti in, mahmi tuikhuk cu Rehaboth tin sam hi.
23
Mah cengten mah lai munpen Beersheba umnak mun ah thawn hi.
24
Mahmi ni zan ah Pathian lang in kei cu nangma lam ah um ing. Kei cu thupha pia tuk hi. Ka sila Abraham ca na miphun cu kei man pungzai tik tung hitin, thupia hi.
25
Mah lai umnak mun ah biakpiak nak taitan dawh in Pathian min thangphat hi. Buk cu sa in sila ten tuikhuk co haw.
26
Mah cengten Abimalek kumpi cu a ngualcam Ahuz le ngalkap bawi Phichol te sam in, Gerar khuapi pen Isak umnak ah hawh hi.
27
Isak in nohte kei mah mu nap ngawl in hawlvawk cengten ita hung uh kam tin a dot ten,
28
A mun, Pathian cu nangma lam ah a umnak thu kohten a man in theihnak hang,
29
Kohten nangmah khengkha tuk ngawl lungdam thu bek bawl daiden no a hah leh bang in, nangman kei muhte phat ngawlnak bawl tuk ma ci tin kohtei lam pen hihen, nangma lam pen hihen, a panih uh in muantak nak thukam in pawlkom nak bawl tuk hung hi. Nang cu Pathian thupha piak mipa hi ci tin a tih ten,
30
Isak in a muhtei eih tuk an cu bawl in langkhat ei haw.
31
Zing khawma no tho in pakhat le pakhat thukam nak a bawl cengten, Isak in a muhte hah in a muhte cu daiden no hawh haw ta.
32
Mami ni in Isak sila te heng in a muhtei cawh mi khuk tui a muh haw nak thu a son haw ten,
33
Mahmi tuikhuk cu Sheba tin a min sa hi. Mah hang mah lai umnak ah a um mi khuapi cu Beersheba khuapi tin tu ni tian in sam hi.
34
Esau cu kum sawmli a kim ten Hit miphun Beeri canu Judith, Hit miphun Elon canu Bashemath cu huai hi.
35
Mah a nupi te cu Isak le Rebekah in a thinkham nak thu in cang hi.
Isak nelpen Jakop thupha a conak