¹ Sarah cu a kum za le kul luan salih a kim ten thi hi. Mah zong tian a kum tam naven, ² Kanaan ngam, Hebron ngam, Kirjathaba pen thi hi. Abraham in Sarah hang khuangai kap in hung hi. ³ Abraham in a nupi luang mai ah ding in Heth miphun ten, ⁴ Kei cu nohtei lakah mikhual ing. Ka nupi luang mu ngawl phum tuk in nohtei lakah phum tuk in ngen ing hitin, ti hi. ⁵ Heth miphun ten ka Topa aw ngai in. ⁶ Topa’n kei muhtei lak pen Pathian tuah a seng mi kumpi hi ci. Kei muhtei khan mual te teng in Topa aw na nupi luang cu phum in. Topa aw na nupi luang cu phum tuk ngawl in kei muhtei sung pen a kuamah in a mah phumnak pia ngawlin um tuk ma hitin, Abraham cu hilh leh haw hi. ⁷ Abraham cu ding to in mahmi ngam Heth miphun tei mai ah a lu kun in, ⁸ Ka nupi luang cu ka muh ngawl phum tuk in, nohten deihnak na nei uh tale ka awnkam thu ngai hih un. ⁹ Nang muhtei sung pen ka co taak mi khan mual phumnak um tuk in, Zohar capa Ephron lo mawk ah a um mi Machpelah leikua cu a man khawthu sum tuah kei mah zuak tuk in kei ma ca a mah cu ngen un hitin, otpih hi. ¹⁰ Mah cengten Ephron cu Heth miphun tei sungah um hi. Mah hang khuapi kongka sungah a tum mi Heth mipi tei sungah Hit miphun Ephron cu mah tihbang hima hi. ¹¹ Ka Topa aw, ka awnkam ngai hih in. Mahmi lo hei hihen, lo sungah a um mi leikua hei hihen, Topa’n kei mah pia hi. Ka miphun tei mai ah Topa cu kei man pia ing. Topa nupi luang cu phum in hitin, Abraham nelah hilh leh hi. ¹² Abraham in mah miphun tei mai ah a lukun in ka awnkam thungai in. ¹³ Mahmi lo ngam man cu kei man pia tung. Sum la in. Mah tin a hitale mah lai mun ah ka nupi luang cu kei man phum tung hitin, ngam sung mipi tei mai ah Ephron nelah hilh hi. ¹⁴ Ephron in ka Topa aw ngai in. ¹⁵ Mahmi leilung a man cu sum cuai li man kim hi. Topa le kei ma sungah a koi ca um hum? Topai nupi a luang cu phum in hitin, Abraham cu hilh leh hi. ¹⁶ Ephron awnkam cu Abraham in a ngaih hang, Heth miphun mai Ephron man a talh bang in sum bawl tei man sum bang mi sum cuai li cu teh in a mah pia hi.