22

1 Mahcengten Pathian in Abraham cul tukin Abraham a sam hang, Abraham in keimah um ing hitin a don ten,

2 Nang cu na ihzet mi capa neih calam Isak keng Moriah ngam ah hawh in, ka lak mi mualhum ah a mah cu meihal biakpiaknak bawlin pia in hitin, thupia hi.
3 Abraham cu zing khawmano tho in laak van te a bawl cengten a capa Isak le sila panih sam in, meihal tuk thing a ceh cengten Pathian thupiaknak mun ah hawh hi.
4 A ni tumnak ni in a zohten, mahmi umnak khuala pi pen a muhten,
5 Sila na dektu panih te cu nohte hi laimun ah laak tuah um hih un. Kei cu ka capa tuah hi laimun ah khin hawh in biakpiaknak bawl hih tuk ung. Mahmi ka bawl cengten nangmuhtei umnak mun ah kikleh tuk ung hitin, ti hi.
6 Mahcengten meihal tuk thing kengin a capa hum ah a koih cengten, mei le nam cu a khut sungah kengin a panih in hawh ngel haw.
7 A hawh laihtak Isak cu a pa Abraham nelah pa tin a sam ten ka capa keimah um ing hitin, Abraham in don hi. Isak in mei le thing um hi. Biakpiak tuktuuno ilai ah um hum tin a dotten,
8 Abraham in ka capa biakpiaknak tuk tuuno cu Pathian a man bawmtuk hitin, ti hi.

9 Mahtihcun a mu panih hawh ngel in Pathian thupiak mi umnak mun ah a hen haw ten, Abraham in biakpiaknak taitan bawl in a thing te a dawh cengten, a capa Isak cu ken in biakpiaknak thinghum ah koih hi.
10 A khutdang in a capa that tuk in nam cu lain cawi hi.
11 Mahcengten Pathian vancung mi in Abraham, Abraham tin vanhum pen sam hi. Abraham in keimah um ing hitin a don ten,
12 Hi tangval cu tokkha pah sin. Tuah mawh pah sin. Nang cu Pathian lau ci tin a tuin keiman thei ing. Itahumtitale na sungpen capa a neih calam cu ka nget hang nangman el ma ci tin, thupia hi.
13 Mahcengten Abraham in a zohten a nung lam hampa cam sungah a ki tang in a um mi tuu cu mu hi. Mahmi tuu cu a lak cengten a capa ai in meihal biakpiaknak bawl hi.
14 Mahlai umnak mun cu Jehovah Jireh tin, Abraham in sam hi. Mah bangbok mualhum ah Pathian in bawm hitin, tuni tian in a son mi um hi.
15 Mahcengten Pathian vancung mi in vanhum pen Abraham cu sam in,
16 Nangman hi thu bawl in na capa nangma sungpen capa pakhat bek cu keimah na el ngawl hang,
17 Keiman nangmah cu a catngawl in thupha pia tung. Na miphun vang vanhum aksi bang in hihen, tuipi mawk philnel bang in hihen, a catngawl pungzai tik tung. Na miphun ten ngal tei khuapi kongka cu uktuk hi.
18 Na miphun hang miphun hempoh muicu thupha co haw tuk hitin ka awnkam thu na ngaih hang, keimah le keimah sal in thukam ing hitin Pathian thupiak mi cu hilh saw lawn hi.
19 Mahcengten Abraham cu a sila tei lamah kikleh in, a muhte cu Beershaba umnak mun ah zui haw hi. Mahlaimun ahcun Abraham um hi.
Nahor capa te

20 Mahcengten Abraham in a zak mi thuthang cu na U Nahor nupi Milcah in capa te hing zo hi.
21 Capa Upa bel Huz, a nau Buz, Aram pa Kemuel,
22 Chesed, Hazo, Pildash, Jidlaph, Bethuel, tihmi
23 Capa liat te cu Abraham U Nahor nupi hinmi hi. Bethuel cu Rebekah pa hi.
24 Reumah tihmi Nahor a nupi no cu Tebah, Gaham, Thahash, Maachah te hing hi.
Sarah thihnak