21
1
Pathian in a thupiak nak bang Sarah cu zo tukin a hawh ten, thukam a neih mi bang a ma nelah a bawl hang,
2
Sarah cu naupai in Pathian huncan a tiap mi sungah Abraham cu a kum ham sawng ten a mah cu capa hing hi.
3
Abraham in a capa, Sarah hin mi capa cu Isak tin a minsa hi.
4
Pathian thucah mi bang Abraham in ni liat a kim ten a capa Isak cu vun lek talhnak thupha cu pia hi.
5
A capa Isak cu a muhten Abraham cu a kum zakhat kim hi.
6
Sarah in ka nuih theihnak thu Pathian in pia zo hi. Hi thuthang a za tu hempoh ten kei mah tuah nui haw tuk hi tih hei in hihen,
7
Sarah in a capa nawi tulh tuk hitin Abraham cu a kon hilh ham kaw? A mah cu a kum ham sawng ten kei cu capa hing zo hi tih hei in son hi.
8
Naupang no Isak cu khangto in nawi tawp hi. Nawi a tawp ni in Abraham in puai pi bawl sak hi.
Hagar le Ishmael a hawlvawk nak
9
Izip miphun Hagar in Abraham tuah capa liat tih Sarah in a theih ten,
10
Hi sila nu le a capa cu hawlvawk in. Hi sila nui capa cu ka capa Isak tuah lo co thei tuk ma hitin, Abraham cu hilh hi.
11
Abraham in a capa a hih hang, mahmi thu cu haksa zet in ngaisung hi.
12
Mah hang, Pathian in mahmi naupang le a sila nui hang hi thu haksa in ngaisung pah sin. Sarah son mi hempoh a thu ngai in. Itahum titale Isak sung bek ah na miphun kho tuk hi.
13
Sila nui capa cu na miphun a hih hang, a mah vang miphun pi in cang tuk hitin, Abraham cu thupia hi.
14
Abraham cu zing khawma no tho in moh le tui thawl a ken hang, Hagar ko hum ah a koih cengten, nauno ap in sila nu cu hawh tik hi. A mah vang hawh in Beersheba ngam lakah vak kawkawi in um hi.
15
Thawl sung tui cu bo in nauno cu hampa cam nuai ah koih hi.
16
Kei man nauno thi cu mu nuam mang hitin, khuala kang saili kap bat tuk mun ah a hawh cengten nauno mai ah khung ing. Mah tihcun a khun laih tak a man aw nging to in kap hi.
17
Pathian in naupang aw a zak ten Pathian vancung mi in Hagar nangman ai sualnak nei cim? Lau pah sin. Naupang umnak munpen a ma aw cu Pathian in za zo hi.
18
Tho in. Nau cu pompai in na khut tuah dom in. Kei man a mah cu miphun pi in cang tik tung hitin vanhum sung pen sam in Hagar nelah hilh hi.
19
Mah cengten Pathian in Hagar mit a honsak hang, a man tuikhuk a muhten hawh in thawl dim tui a koih cengten naupang no cu tui in tik hi.
20
Naupang no lam ah Pathian um hi. A mah cu khang to in ngam lakah a um hang, thal kapthiam pa in cang hi.
21
Paran ngam sungah a um hang a nu in Izip ngam pen numei pakhat sam in a mah tuah nupa tik hi.
Beerhseba ah thukhaam a bawlnak
22
Mah cengten, Abimalek kumpi le ngalkap bawi Phichol ten Abraham sam in, nang cu na bawl mi hempoh ah Pathian um hi.
23
Mah a hih hang nang cu kei mah tuah in hihen, ka capa tuah in hihen, ka tu te hei hihen zol ma ci. Kei cu nangma nelah hehpih nak ka bawl bang kei ma sungah hei hihen, na camnak mun ka ngam sungah hei hihen, hehpih nak bawl tung hitin Pathian cu sal in kei mah thukam pia in hitin, ti hi.
24
Abraham in a tihnak bang kei man thukam pia tung hitin, don leh hi.
25
Abimalek sila ten neh siah in a lon mi tuikhuk thu hang, Abraham in Abimalek kumpi cu sonsia hi.
26
Abimalek in hi thu a kon bawl hum tih cu kei man thei mang hi. Nangman kei mah son ma ci. Kei mah vang in tu ni tian za mang hitin, ti hi.
27
Abraham in tuu, khui te keng in Abimalek a piak hang a mu panih cu thukhaam bawl haw hi.
28
Abraham in tuu no a nu salih te cu tuuhon pi sung pen a khen in koih hi.
29
Abimalek in a khen sa mi tuu no a nu te cu ilai ah hum tin a dot ten,
30
Abraham in hi tuikhuk cu kei man co zo ing hitin, hi tuu no a nu salih te kei ma lam ah sialsiah theihpih tu tuk in a muhte cu nangman ka khut sung pen co tuk ci tin, ti hi.
31
Mah a hih hang, mah lai mun ah a mu panih thukam bawl in mah lai mun cu Beersheba tin, sam haw hi.
32
Mah tihcun Beersheba umnak ah thukhaam bawl haw. Abimalek le ngalkap bawi Phichol te cu Philistine ngam ah pin leh haw hi.
33
Abraham in Beersheba umnak mun ah makeng kung phut in a cat ngawl a kho mi Pathian cu kumkhua a min thangphat nak bawl hi.
34
Philistine ngam ah ni tampi um hi.
Abraham a culnak