17

¹ Mahcengten Abram cu kum sawmkuah a kim ten, Pathian cu Abram nelah lang in kei cu Topa Pathian ing hi. Ka maiah hawh in cangkim nei in.

² Ka thukhaam cu nangmah tuah bawltung hi. Nang cu keiman tu le canawn tampi pungzai tik tung hitin, thupia hi.

³ Abram cu bopkhup in a um ten Pathian in,

⁴ Ka bawl mi thukhaam cu na sungah um hi. Nang cu miphun hempoh pa hi tuk ci.

⁵ Mahcengten na min cu Abram tin sam tuk ma toh hi. Na min cu Abraham tin sam tuk hi. Itahumtitale keiman nang cu miphun tampi tei pa cangtuk in bawl zo ing.

⁶ Keiman nangmah cu tu le canawn tampi pungzai tik tung. Nangma hang miphun tampi cangtik tung. Na miphun te vang kumpi in cang haw tuk hi.

⁷ Kei cu na Pathian, na nungpen na miphun tei Pathian hi tung hitin nangmah le na miphun hum ah a catngawl in ka thukhaam cu kumkhua thukhaam in cangtik tung.

⁸ A tuin nang cu mikhual na hihnak tuah a um mi Kanaan ngam hempoh cu na nelah hei hihen, na nungah a um mi na miphun te hei hihen, a catngawl in pia tung. Kei cu a muhtei Pathian vang hi tung hitin, ti hi.

⁹ Mahcengten Pathian in mah a hihhang, nangmah tuah na nungah a um mi na miphun a catngawl in ka thukhaam cingkem tuk uh ci.

¹⁰ Nangmah le na nungah a um mi na miphun cu ka maiah a cingkem tu ka thukhaam cu nohtei sungah capa hempoh vunlek talhnak thupha bawltuk ci.

¹¹ Vunlek talhnak thupha cu keimah tuah nohtei bawl mi thukhaam sialsiahnak hi tuk hi.

¹² Nohtei miphun sungah a catngawl in pano hempoh na innpen a hing mi hei hihen, na miphun a hi ngawl miphun dang sungah sum tuah lei mi hei hihen, ni liat a kim ten vunlek talhnak thupha bawltuk ci.

¹³ Na innsang pen hinmi na sum tuah in lei mipa cu vunlek talhnak thupha bawltuk ci. Ka thukhaam cu nangmuhtei sungah kumkhua thukhaam hi tuk hi.

¹⁴ Vunlek talh laihngawlin vunlek talhnak thupha a co ngawl mi pano hempoh cu a miphun pen vawk hi. A mah cu ka thukhaam siatsuah zo hitin, Abraham cu thupia hi.

¹⁵ Mahcengten Pathian in na nupi Sarai cu Sarai tin sam tuk ma toh hi. Sarah tin sam tuk hi.

¹⁶ A mah cu thupha pia in a ma hang nang cu capa pia tung hi. A thungai in a mah thupha a piak hang, a mah cu miphun namkim tei nu hi tuk hi. A miphun sungah ngam hempoh kumpi in cangtuk hitin, Abraham cu thupia hi.

¹⁷ Mahcengten Abraham cu bopkhup in kum zakhat a kim mipa in capa neituk maw. Kum sawmkuah a kim mi Sarah cu capa hing tuk hitin nui thah in a thinlung sungno ah a ngaihsut ten,

¹⁸ Abraham in Ishmael cu a maiah nung hen hitin Pathian nelah a tihten,

¹⁹ Pathian in na nupi Sarah cu nangman capa hing tuk ci. Mahmi capa cu Isak tin sa tuk. A ma sungah hei hihen, a nungpen a miphun sungah hei hihen, ka thukhaam cu kumkhua thukhaam in cangtuk hi.

²⁰ Ishmael in na awnkam thu cu keiman ngai tung. A mah cu keiman thupha pia tung. A miphun tampi khangto tik in a mah cu tu le canawn tampi pungzai tik tung. A mah cu kumpi heinih tei pa in cangtuk hi. Miphunpi cangtuk in keiman bawltung.

²¹ Mahnaven, mai kum huncan a tiap mi a kim ten, Sarah nang cu a hing tuk mi capa Isak sungah ka thukhaam cu keiman kho tik tung hitin thu a piak cengten,

²² A thupiak mi aw cu dai in Pathian cu Abraham nelpen hawh ta hi.

²³ Abraham in capa Ishmael pen pan a innsang pen hinmi hempoh a sum tuah lei mi hempoh cu Abraham innsang tuah a seng mi pano hempoh keng in, Pathian thupiak mi bang ni khat sung in vunlek talhnak thu cu pia hi.

²⁴ Abraham a mah loli in vunlek talhnak thupha a co ten a kum sawmkuah hi.

²⁵ Capa Ishmael cu vunlek talhnak thupha a co ten a kum heithum kim hi.

²⁶ Ni khat sung in Abraham le a capa Ishmael cu vunlek talhnak thupha cu co hi.

²⁷ A innsang pen a hinmi, miphun dang tei sungah a ma sum tuah a lei mi a innsang tuah a seng mi pano hempoh cu a mah tuah vunlek talh thupha co haw hi.

Mikhual pathum