15
1
Mahcengten muhnak tuah Pathian awnkam cu Abram nelah heng in ngualcam pa Abram aw, laupah sin. Kei cu nangmah humhim tuing. Na cotuk mi cu ngeng zet hitin a tihten,
2
Abram in a nung Pathian aw, Damaska khua mi Eliezer cu ka lo luah tu tuk in cang ni maw. Kei cu ca nei mang hi. Keimah i pia tuk cim tin, ti hi.
3
Mahcengten Abram in kei cu miphun nam piaknak um ma hi. Ka inn pen hinmipa cu ka lo luah tupa hi zo ma maw tin, ti hi.
4
Mahcengten Pathian awnkam a heng mi hi mipa cu na lo luah tupa hi tuk ma hi. Nemcuamnakmpi taksa sungpen a suak mipa cu na locotuk hitin thu a piak cengten,
5
Abram cu a pawlam ah kaitul vanhum zo in. Aksi te na sial thei tale sial in. Na miphun cu Mahtihbang tuk hitin, thupia hi.
6
Abram in Pathian a up hang, a upnak cu midikcang hihnak in sialsiah hi.
7
Mahcengten keiman hi ngam cu lo na cotuk nangmah pia tuk in, Chaldean ngam ah a um mi Ur khuapi pen lamhuai tu Pathian ing hitin, thupia hi.
8
Pathian in hi ngam locotuk mi cu itihbang in thei tuk hing ngim tin, dong hi.
9
Pathian in kum thum a kim mi khuinu pakhat, kum thum a kim mi kelnu pakhat, kum thum a kim mi tuucang pakhat, khulo pakhat, laileng pakhat cu keima ca tuk keng in hitin thu a piak bang in,
10
Nganhing hempoh keng in pumkhat nung pumkhat a laizang pen a phel cengten, a phelsa mi sa te cu a lang le langah a khen in koih hi. Vano cu phel ma hi.
11
Vano te a thisa luanghum ah a kop ten, Abram in hawlvawk hi.
12
Nitum in Abram cu hihbuhci zet a hihbuh laihtak khuamthim pi sahzet a tawh hang candalh in um hi.
13
Pathian in na miphun cu miphun dang tei neihmi ngamsung ah mikhual a hihnak hang, miphun dang tei lakah sila umnak, bawlsiatnak kum zali sung a thuak haw tuk mi cu a thungai hi tih cu thei in.
14
A muh a tik tu miphun te vang keiman thukhen tung. Mahcengten, a muhte cu hauhsaknak tampi tuah suaktul haw tuk hi.
15
Nang cu pu le pa tei lakah daiden no in hawhtuk ci. Kum Upa ham zet in phum cotuk ci.
16
Miphun khangli cengten a muhte cu hi ngam ah pin kikleh haw tuk hi. Amor miphun tei sualnak cu cangkim ma laih hitin, Abram cu thupia hi.
17
Mahcengten nitum in khua a thim ten meikam pen meikhu suaktul in a alh mi meikhuam pakhat cu a phelsa mi sa laizang ah langzet in hawh hi.
18
Mahmi ni ah Pathian cu Abram tuah thukhaam bawl in, Izip nguntui pen pan Euphareth nguntuipi tian hi ngam hei hihen,
19
Ken miphun, Kenniz miphun, Kadmon miphun,
20
Hit miphun, Periz miphun, Rephaim miphun,
21
Amor miphun, Kanaan miphun, Girga miphun, Jebus miphun te hei hihen, na miphun te cu keiman ap zo ing hitin, thupia hi.
Hagar le Ishmael