14

¹ Mah laih tak in Shinar kumpi Amraphel, Elarsar kumpi Arioch, Elam kumpi Chaldolaomer, ngam hempoh kumpi cu Tidal hi. ² Sadom kumpi Bera, Komorrah kumpi Birsha, Admah kumpi Shinab le Zeboiim kumpi Shemmaber, Zoar ah a um mi Bela kumpi te do haw hi. ³ Mah ngam ah a um tu hempoh Saddim hawkluam ci tuipi bul el ah um haw. ⁴ Kum heinih sung Kedorlaomer kumpi nelah sila a um ceng a kum heithum nak ten do haw hi. ⁵ A kum heili nak a kim ten Kedorlaomer kumpi cu a ma lam ah a um mi kumpi te tuah hung in, Ashteroth khuapi sung pen Rephaim mite hei hihen, Ham khuapi sung pen Zuzim miphun te hei hihen, Kariathaim munlawn ah Emim miphun te hei hihen, ⁶ Se’ir mual hum pen Hor miphun te hei a thah hang, ngam mawk lam ah a um mi El Paran khuapi tian hil haw hi. ⁷ Mah cengten hung leh in Kadesh ngam, Enmish’pat khua ah a hen cengten, Amalek ngam ah a um mi hempoh te hei hihen, Haezontamar khua ah a um mi Amor miphun te that khawng haw hi.

⁸ Mah cengten, Sadom kumpi, Komorrah kumpi, Adamah kumpi, Zeboiim kumpi, Zear tih mi Bela kumpi ten ngal do tuk hawh in Siddim munlawn pen do un haw hi. ⁹ Mah tihcun Ela kumpi Kedorlaomer, ngam hempoh kumpi Tidal, Shinar kumpi Amraphel, Ellasar kumpi Arioch tih mi kumpi pali le kumpi panga te cu do un haw hi. ¹⁰ Siddim munlawn ah tuinai a man ngingei tuah a dim mi tuikhuk tampi um hi. Sadom kumpi, Komorrah kumpi te tai in mahmi khuk sungah cak hi. A tang laih mi a muhte cu mual hum ah tai haw hi. ¹¹ Nehnak co tu kumpi te cu Sadom le Komorrah sungah a um mi hauhsak nak hempoh le khuapi ancang a um mi hempoh te keng haw hi. ¹² Sadom khua sungah a um mi Abram U hi capa Lot le a ma neihnak hempoh te keng in hawh hi.

¹³ Mahmi haksat nak pen luat in a tai mi mihing pakhat cu Hebru miphun Abram tuah pawlkom nak a nei tu Eshcol le Aner U a hih hang, Mammre tupi umnak bul ah a um mi Amor miphun te hi. ¹⁴ Abram in a U capa cu man zo hi tih thu a zak ten, a inn sung pen hin mi a hih hang hilh tu mihing zathum le heiliat te thukhen in Dan khuapi tian hil haw hi. ¹⁵ Zan hun ten a miphun te khen in a do tik hang, a thah cengten Damaska khuapi saklam Hobah khuapi tian hil vawk leh leu haw hi. ¹⁶ Ngal tei lonsak mi neihnak hempoh te hei hihen, numei te le mihing te hei hihen, laksak leh hi.

¹⁷ Khedorlaomer le a ma lam ah a um mi kumpi hempoh a thahnak pen Abram a kik leh ten, Sadom kumpi cu muak tuk in Shaveh munlawn tihmi kumpi tei huak luam ah hawh hi.

¹⁸ A sang belnak mun ah a um Pathian thiampi a himi Salem kumpi Melkhizadek cu moh le cabit tui keng hi. ¹⁹ Van le lei kumpi a sang belnak ah a um tu Pathian in Abram cu mui cu thupha pia ta hen tin, Abram cu thupha pia hi. ²¹ Sadom kumpi in mihing hempoh te kei mah pe leh in. Neihnak te cu a mah loli in la hen hitin Abram cu a hilh leh ten, ²² Abram in Sadom kumpi cu van le leihum ah a um mipa a sangbel mi Pathian mai ah ka khut dang to in thukam nak bawl zo hi. ²³ Abram cu hauhsak nak co tik zo ing hitin na son tuk um ngawlin, kumpi pai neihnak nimzang khat no hei hihen, ke sihnak khau zangkhat no hei hihen, pakhat no hei la nuam mang hi. ²⁴ Kei mah tuah a zui tu Aner, Eshcol le Mamre te cu a muhtei co vo la tik in tangval tei eih bang sial ngawl cu imah kei man la nuam mang hitin, ti hi.