11

¹ Leihum mihing hempoh miphun pakhat awnkam pakhat bek um hi. ² Nisuah nak lam pen khual zin in Shinar ngam munlawn a muh hang mah lai ah um haw hi. ³ A mun hung un. Ukkhe pha zet hal tuk hung hitin pakhat le pakhat son in um haw hi. Mah tihcun suang ai in ukkhe hei hihen, taklei ai in a tuinai a man ngingei thei mi cu mang haw hi. ⁴ Hung un, leihum hempoh ah khenkek in um tuk launak hang khuapi hei hihen, van hum a khong tian khantiang inn sa minthan nak co tukin bawl tuk hung tin, son li haw hi. ⁵ Mah tihcun mihing tei bawl mi khuapi le khantian zo tukin Pathian cu tolh suk hi. ⁶ Pathian in zo un. Miphun pakhat awn pakhat bek a um hang, a mun hi nate cu bawl pan in um haw hi. A ngaihsut nak hempoh te a kham tu um ngawl in a mun bawl haw tuk hi. ⁷ Hung un, tolhsuk tuk hung hi. A mun pakhat le pakhat thei thiam tukin a mu awnkam buai tik tuk hung hitin, thupia hi. ⁸ Mah tihcun Pathian in a muhte leihum hempoh ah khenkek khawng in, a mun khuapi sa ngawlin um haw hi. ⁹ Mah a hih hang khuapi sungah Pathian in leihum mi hempoh tei awnkam cu buai tikin, a muhte cu hi leihum hempoh ah a khenkek tik hang, mahmi khuapi cu Babilon khuapi tin sam hi.

¹⁰ Shem tu le canawn te cu Shem in kum zakhat (100) a kim ten, tuihau tung cengin kumnih a ngei ten, capa Arphaxad hing hi. ¹¹ Arphaxad a hin cengten Shem cu kum zanga (500) nung in capa le canu te hing hi.

¹² Arphaxad cu a kum sawmthum kum nga (35) a kim ten capa Shelah hing hi. ¹³ Shelah a hin cengten Arphaxad cu a kum zali le kum thum (403) nung in capa le canu hing hi.

¹⁴ Shelah cu a kum sawmthum (30) a kim ten capa Eber hing hi. ¹⁵ Eber a hin cengten, Shelah cu a kum zali le kum thum (403) nung in capa le canu hing hi.

¹⁶ Eber cu a kum sawmthum kumli (34) a kim ten capa Peleg hing hi. ¹⁷ Peleg a hin cengten Eber cu a kum zali le kum sawmthum (430) nung in capa le canu hing hi.

¹⁸ Peleg cu a kum sawmthum (30) a kim ten capa Reu hing hi. ¹⁹ Reu a hin cengten Peleg cu a kum zanih le kumkuah (209) nung in capa le canu hing hi.

²⁰ Reu cu a kum sawmthum (30) a kim ten Serug hing hi. ²¹ Serug a hin cengten Reu cu a kum zanih le kum salih (207) nung in capa canu hing hi.

²² Serug cu a kum sawmthum (30) a kim ten Nahor hing hi. ²³ Nahor a hin cengten kum zanih (200) nung in capa le canu hing hi.

²⁴ Nahor cu a kum kul luankuah (29) a kim ten capa Terah hing hi. ²⁵ Terah a hin cengten Nahor cu a kum za le heikuah (119) nung in capa le canu hing hi.

²⁶ Terah cu a kum sawm salih (70) a kim ten capa Abram hing hi.

²⁷ Terah tu le canawn te cu Terah in Abram, Nahor, Haran te hing hi. ²⁸ Haran in Lot hing hi. Haran in a pa Terah a thih laih ngawl a suah keh nak mun Chaldean ngam mitei umnak Ur khuapi pen thi hi. ²⁹ Abram le Nahor cu nupi huai in Abram nupi cu Sarah hi. Nahor nupi cu Kanaan numei nu Milcah hi. Kanaan in Milcah le Iscah tei pa hi. ³⁰ Sarah cu a cing mi numei a hih hang, ca cawi thei ma hi.

³¹ Terah in capa Abram hei hihen, Haran capa a himi a tupa Lot hei hihen, capa Abram nupi a mo nu Sarah cu sam in a mun Kanaan ngam ah hawh tuk in Chaldean ngam ah a um mi Ur khuapi pen tul in, Haran khuapi ah heng in um haw. ³² Terah cu a kum zanih le kum nga (205) a kim ten Kanaan khuapi pen thi hi.

Abram Pathian samnak