¹ Bibyo buolo bwa hegulu bwilingilishwa na binyundu umi, bakuhile byaa byabo, bahumine na ugia usambana Mlume kwa huhwa. ² Batano babele bahuukee, na batano babele na lweenyi. ³ Baya bene babele bahugi bakuhile byaa mabo, nangu ukuha na mauta. ⁴ Baya bene babele na lweenyi bakuhile mauta m'bibiilo hamwechi na byaa byabo. ⁵ Na Mlume kwa buye hesingile, bose bahongele na ulala.

⁶ Mkundu kya busungu, habele mdodo, benywe, Mlume kwa buya, tobowe mukye umpokela. ⁷ Babywile baya binyundu byose na ulamya byaa byabo.

⁸ Baya bahuki babasambile baya ba lweenyi, mutuhe mauta menyu macho; bululi byaa metu machima. ⁹ Haho baya ba lweenyi babagaile, badogomine, bishibyo, mashituwilila beswe na benywe, iibibenju mukye ubaukucha, mukye ulikulila. ¹⁰ Naba bilibele hukya ngua, Mlume kwa buya nuchwa, na bene babele na mauta nukingila hamwechi naage m'buya; mchango noo ububalwa.

¹¹ “Nabo nuuchwa baya bange bawamisiha, baganine, Mlume, Mlume utubugulile. ¹² Gugaile, gudogomine, bibyo, nihumsambila, benywe nishibagidee.

¹³ Bibyo, muyeshe, bululi mushikidi lusugu na mengo.

¹⁴ Bululi ni mlingilisho kwa mtu mine kubendiche ukya inge ebaloo, kwebakitile bacha bake, kubahele bumona bwake. ¹⁵ Guhele kumwe talanta chitano, kunge talanta chibelee na gunge talanta gimwechi, kila mtu ulamana na uwosha wage, kee noo ukya. ¹⁶ Guya kuhelwa talanta chitano kukile nacho ubusulu, chubushile chinge chitano. ¹⁷ Byoka biya na kuuya kwa chibelee, nage gubushiche chinge chopee. ¹⁸ Guya mine kuhelwe lumwechi kukile naloo na udabaiina, gubisile bumona bwa Mlume yake.

¹⁹ Hanyuma ha masugu meengi Mlume kwa baya bakichi nuuchwa, na ubalana nabo. ²⁰ Kuchwile guya guhelwe talanta chitano, guchwile na chinge chitano, kugamine Mlume upele talanta chitano, lola, chinge chitano cha ubusulu.

²¹ Mlumiake gumsambile bushwachi, mkikiwa m'benju na gwamliwatiliche ubele mliwatiliche ubicho bicho niubiya hekulu ha bingi, gingila ii m'bwolo bwa saso bwa Mlumiobe.

²² “Guchwile guya kuhelwe talanta chopee, nugana, Mlume, upele talanta chopi, lola chingi talanta chopee nichipashile ubusulu.

²³ Mlumiaku kusambile, buswachi, nkichi m'benju, na guamliwatiliche; ubele mliwatiliche ubicho bicho niubiya hekulu ha bingi, gingila u m'buolo bwa saso bwa Mlumiobe.

²⁴ Guchwile na guya guhelwe talanta gimwechi, guganine, Mlume, niumanine ubagagwe wu mtu mguumu, usuusola ushiunine, usuuongola oshisambaleche. ²⁵ Bibyo, nimonine boba, nikile na udaba iina na ubisa talanta kyobe, lola guha bumona bobe.

²⁶ Mlumiake gugaile, nudogoma, gogwe nkichi m'iina alema, umanine na usoola biandishi unine, na nisuuongola byande shisambache. ²⁷ Bibyo biyesuba lingie gogwe ubaha bumona bwanyi baya ba busulu, na nene handachwa nabapata bumona bwanyi na bwine bwababusua. ²⁸ Wa bibyo, msapwe gigyo talanta mmewe guya mine guina talanta umi. ²⁹ Yulu gegese mine gwina ibya kuihewa, na ukiluchiwa bee; nine gushina ibya, ataiya ibya yeli nayo kuisapua. ³⁰ Na mcha guya kushilingiye, mtelwe koo uu mdo kwa hambuga, ubi lilo na ulitauna meno.

³¹ Haho helichwa mwana gwa Adamu na bukengeda bwake, na bamalaika bahaha bose hamwechi nage, noo helishama wiisuba yage ya ugengeda. ³² Na mioga gose gisumbila weliim nage gwibabagula nahi biene biisubagula m'mushi ubagula mioo na mabuchi. ³³ Gwibabya mioo uboo wage wa ulume, na mabuchi uboo wage wa uwachi.

³⁴ Hanyuma olo gwibasambila baya bali uboo wage wa ulume, chuwem benywemuhehelichiwa na tata, muhiane uwolo bwa mlibabiilwe ala utula ubumbwa wa ibalo. ³⁵ Bululi nibele na ndala, mupele iliwa, nibele na yuma, mupele madi munywa, mibele mgenyi, mundubwile wenyu. ³⁶ Nibele buchi munjiiche, nibele msumwa muchwile undola, nibele mambwe, muchwile wandi.

³⁷ Haho batu ba kiine bingaa, na udogoma, mlume ii mengo nai tuumonine wina ndala, tuuchele iliwa wina yuma tuumwishiche? ³⁸ Iyaka ii mengo nai tuumonine uli mgenyi tulubwile, ulibuchi, tuuchwiche? ³⁹ Ii mengo nai tuumonine uli msumwa, ulimambwa tuchwile oli?

⁴⁰ Na olo kwibagaa, naubasambilam biino, nihumsambila, wa bia biamugilile gumwe gwa bano bashiwetu batulela, mungilile nene.

⁴¹ Haho kubasambila baya bene bali uboo wage wa uwachi, humwe wandi, mulogilwe, giwe mmahia a milumbu, abiilwe ala ihingili na bamalaika bake. ⁴² Bululi nibele na ndala, mushipele iliwa nibele na yuma mushipele madi munywa. ⁴³ Nibele mgenyi mushindubwile, nibele buchi mushinjwiche, nibele msumwa, na nibele m'mambwa, mushichwile undola.

⁴⁴ Babo nabo bumgaa, na udogoma, Mlume ii mengo nai tuumonine wina ndala, wina yuma uli mgenyi, ulibuchi, uli msumwa na wii m'mambwe, tushibauhodelele?

⁴⁵ “Nage kwibagaa nabasambila, bibyo, nihusambila, wiinene byamushikilile gumwe gwa bano ba tulela, mushibangilile nene.

⁴⁶ Na babo biikya ukingila m'mahya a milumbu na baya ba kiine bikya ukingila m'mweko gwa milumbo.