¹ Yesu kukiile uhumina m'mihuilo, bakikiwa bake bamkilile bululi bammonye bigubailwe ihuilo. ² Nage gugaile gubakanine, mushi humona bino byose? Bibyo nihumsambila, lishishikala liwe hekulu haliwe liene lishibelwa.

³ Yesu heshamine uloona Mizeituni, babikiwa bage bamkilile wa bubisa, bagamine, tusambile, bino biechwa mengo nai? Nauchwa obe wiiba wii, na isula ya ibaloo?

⁴ Yesu gugaile, kubasambile, lolwe mtu gashi m'biche. ⁵ Bululi bengi biicha wa china lianyi, bigana, nene noo Kelesitu; na babicha bengi. ⁶ Na benywe mwihulicha mwano gwa bita na uchwa wa bita, lolwe nanga udigila, bibyo byose isula yage iibyo ukiliya; haho ishi naba isula. ⁷ Yulu mmoga kwiikia ulua na mmoga, buolo ulua na buolo; habi na ndala, na bititicha bya sii hano na haya. ⁸ Bibyo byose noo itula wa busungu.

⁹ mengo biimana benywe m'be na asusu, nabo biimaga, benywe mubi batu ba uonyiwa na mioga byose yulu ya china lianyi. ¹⁰ Haho bengi bilihiatala, bihana bange nabo, na uonywana. ¹¹ Na mbua chingi cha lulimi chiichwa, na ubabicha beengi. ¹² Na yulu ya ubula wa luemo, luundo lwa bengi luihola. ¹³ Bululi mine kilitolelecha na wiisula noo guihona. ¹⁴ Iyaka mwano gubenju kwa buolo kwilisambwa mmibalo yose, na umonywa na mioga kyose, haho noo iya isula hayichwa.

¹⁵ Na hamwimona uchikilichwa wa udogu, uya uganinywe na mbua Danieli, wakimiwa hene hahachiwe (guligigiche na gamane). ¹⁶ Noo bene bali ubaya hudi basinine u kono, ¹⁷ na mine guli ha butato gashisale ukuha bibia byake bili mndu mwage. ¹⁸ Na guha kuli ulubala kushikiwila uguha ngubo chake. ¹⁹ Luhanga lubi wa bene bina bushito na bali hukokya mamo masuku! ²⁰ Sabwe, bululi osina wenyu ushibe mengo na peho, wala lusugu lwa ulihocha. ²¹ Yulu memo mengo ubi asusu aata, ashi namonea tangu utula wa ibaloo ndaa na hano, na shibiho. ²² Nambo masuku mamo masaba swihiwa, hasabahona mtugegese, na yulu ya basobolwa masuku mamo miswihiwa.

²³ Mamo mengu mtu gabemsambila, lola, Kelesitu guli hano au guli uya, nangu uubwasha. ²⁴ Na bichwa makelesitu ma lulimi, na mbua cha lulimi, bimonya biloya biata na bisaga; yulu bachiminye, ha biahuwechegana ata na basobolwa. ²⁵ Lolwe, nahuhwa umsambila ala. ²⁶ Haho babemsambila, guli mluanaganywa, mushikiye, guli mndu, nangu uwasha. ²⁷ Yulu nahi biya ahenyuhenyu uhuma mlugulu na umonea na mmanda, bibyo na bibi uchua wa mwana gwa Adamu. ²⁸ Bululi hene hali itumba ya nyama noo ususala maubi.

²⁹ Manywe, hanyuma ha asusu a masugu maya, chuba lyiisua mdo, na mwechi gushimonya luenge lwake, tumbalambala twiigua uhuma hegulu, na uoma wa gulu widigila. ³⁰ haho himoneya biloya bya mwana gwa Adamu hegulu, haho mioga kyose kya batu hano ha mgala habilila, nabo bimmona mwana gwa Adamu uchua hekulu ha matimba ma higulu hamwechi na uoma na bugengeda bwingi. ³¹ Nagee gwibatuma bamalaika bake hamwechi na lidi lyata ya asiba, nabo biasumbicha basobo lwa bake uhuma masunga mana ma ibaloo, uhuma isula ii ya gulu mpaka isula ii.

³² Bibyo wa buungo muligigye mlingilisho, tabilya hutipuka na umena byanyi bihya, mwamana mengo na usola mahuhya. ³³ na benywe byoka biya, hamwimona bibyo byose, manywe kusili alibu, mmichango. ³⁴ Winene, namsambila, ibushi ino ishihita, na bino byose bigiliye. ³⁵ Gulu na sii byehita, lakini binywa byanyi bishihita.

³⁶ Mwano gwa luya lusuku na maya mengo hashu gubikidi, ata bamalaika bene bali hekulu, ata mwana, ila tata gee buchima. ³⁷ Bululi nahi bibele masuku na nuhu, bibyo noo bibii uchua wa mwana gwa Adamu. ³⁸ Bioka bya nahi masuku maya ma hambele ha imbi ludi batu babele huya, na unywa, babele hugonda na ugonjwa, na bigingile nuhu mnda bweto. ³⁹ Bashibamone, na bichuile imbi - ludi, na ubahaka bose, noo bibi uchua wa mwana gwa Adamu. ⁴⁰ Maya mengo batu bopi babi ulubala; gumwechi guikuhua, gumwechi guishikala. ⁴¹ Baachana bopi babi huhela uu msamba, gumwechi guikuhua gumwechi guishikala. ⁴² Muyeshe, yulu mushigidi ulusugu nai luicha mlumyenyu. ⁴³ Manywe ino inywa; nime na ndu gubamana maya mengo michwa miibi, guabashama mitende, gusaba lea ndu giake gibelwe. ⁴⁴ Byoka bibyo na benywe mube luenge lulume, yulu mengo ma mshi hulanga mwana kwa Adamu kuichwa.

⁴⁵ M'nanyi guya mcha mmudakilwa kuina lwenyi, mine hichwa mlumiage gubiile ulola byose bya ndu kiake, gabahe batu biliwa mengo ma boo uya. ⁴⁶ Luhanga wii mcha guya, mine mlumiake gui m'banga kuli huita bibyo. ⁴⁷ Wa bibyo, nihumsambila, gugo mtu guibiwa uba hegulu habitundu biake byose. ⁴⁸ Nambo mcha guya m'bii gabegana mnda mtima guage, mlumeanyi, kuahusinga; ⁴⁹ gutilile uhula bachanage, na uya na unywa na hamwechi na baolwa; ⁵⁰ mlumiake guya mcha guihwa lusugu lweshihulanga na mengo meshikidi. ⁵¹ Guingenda bihindi bibele, na ubya ihichi imwehi na ba - lububa umeso; ubo na ubi lilo na ulitauna meno.