¹ Mengo mahwile Yesu binywa bibyo byose, kusambile bakikiwa bake. ² Mugide hanyuma ha masugu mopi noo Pasaka na mwana gwa Adamu gwihananywa gasusulwe.

³ Hanyuma bibuli bya byata na baulu ba batu basambene ubushamo bwa ibuli ya yata, china liage kayafa. ⁴ Bahungile hamwechi, bululi babwate Yesu wa ndilakia lulimi, na uumaga. ⁵ Haho baganine, mashibe mengo ma usumbila, binaleta midodo u batu.

⁶ Nage Yesu hebele Betania m'ndu gya Simoni gwa bushando, ⁷ Gumwe m'machana guchwile na chupa lya malashi ma bunana bwingi, gumbangile guli huya ubulilo, gumongo lwele mo mswe gwake. ⁸ Bakikiwa bage habamo nine, bachikililwe, baganine, yulu ya ii uchiminya bino? ⁹ Bululi nano malashi mabaguchiwa wa bumona bwingi na ubahaba mbuchu.

¹⁰ Yusu gumanine gubasambile, yulu yai mulihumdegia gugu m'machana? Bululi ii mkilo gubenju gwakangilila nene. ¹¹ Yulu bambuchu mwinabo masugu mose, nene mushibi nanyi masugu mose. ¹² Bululi hagapongololela malashi ha mbili gwanyi ii yuumonya uchiwa wanyi. ¹³ Bibyo nihusambila, ose wine wilisambwa guno mwano mnda ibaloo yose ino ihisho yakahisha, ibi huganywa na umengelecha.

¹⁴ Mamo mengo, gumwe gwa baya umi na bopi, china liage, Yuda Isikaliyote, gukile uu bibuli bya byata. ¹⁵ Guganine, mwipa ii na nene nammanane wa mli? Bambalile bihindi maumi matatu ma bumona. ¹⁶ Utula mamo kubele huenga biyeli mmanana.

¹⁷ chuba lya litangilya mikate kishi kyakibiwe mshimi, bakikiwa bage bamkilile Yesu, bamsambile, ii uhi oli hubenja tuulongeche uye Pasaka?

¹⁸ Gubasambile giwe m'mbuka wa gumwe mtu, mumsambile, mgigia guakana, mengo manyi nasili hoka, obe niita Pasaka hamwechi na bakikiwa banyi. ¹⁹ Bakikiwa bagilile nahi byene bielibalagile, na balongiche iliwa ya Pasaka.

²⁰ Mengo ma igolo kushamine uya na baya bagigiwa bage umi na bopi. ²¹ Hababelu huya, guganine, bibyo, nihumsambila gumwe gwenyu kuipana.

²² Bachikililwe abisa, batulile umbucha gumwechi gumwechi iinene mlume?

²³ Gugaile na udokoma, gee mine gwibya uboo wage hamwechi nanyi mmilego noo gwipana. ²⁴ Mwana kwa Adamu kulihulikila, nahi biabalimgolele, luhanga lubi wa guya mtumine gwimmanamwana kwa Adamu! Byesuba wage bibenju kushibele buswa. ²⁵ Yuda, mine gulihummana, kugaile linene mgigya? Gumsambile gogwe wagana.

²⁶ Hababele huya, Yesu guguhile mkate, guheleleche na uguhya, gubahele bagigiwa bage, gukanine, guhwe, liwe; guku noo m'bili gwanyi. ²⁷ Guguhile isengo, guganine buswachi, nubaha, kuganine, nyuwe benywe bose mmiino; ²⁸ Bululi mama ii mashi nanyi ma malagano, malihugesea yulu ya uleelela bubi bwa bengi. ²⁹ Abisa nihumsambila, nishinywa iyaka biguma bya mizabibu utua hano, mpaka luya lusuku lwandinywa guhya hamwechi nenyu m'buolo.

³⁰ Nabo habahwile ugimba, batoboile hambuga na ukia u lonoo lwa mizeituni.

³¹ Yesu kubasambile, benywe bose mwimioa yulu yanyi buno busugu, bululi bigolilwem niimmula mmushi, na miyoo kya ihichi yage kiihalingana. ³² Hanyuma ha uchuwa wanyi, nibungwa ukya Galilaya.

³³ Pedelo kumgaile, na udogoma binauonywa bose, nene nishiuonywa ata.

³⁴ Yesu kumsambile, nihusambila winene, buno busuku koo kishinaduka wii nichingula nyendo chitatu.

³⁵ Pedelo kumsambile, ata biyelingiye uwa nobe nishiushika, na bakikiwa bose badogomine bioka biya.

³⁶ Hanyuma Yesu kugile hamwechi nabo uu lubala lulihukiswa Gesetemane na kusambile bakikiwa bake, shamwe hano nena nakye uya usaba. ³⁷ Gumkuhile Pedelo na baya bana babili ba Zebedayo, kutulile uchikililwa na ununa. ³⁸ Haho kubasambile, mtima gwanyi ikonogebu uhima uwa; shamwe hano muyeshe hamwechi nayi ³⁹ Kugilile umbele, gugwile mmachwi, kusabile, kuganine tata, wahubyosha, isengo ino ipume, bishibe byene biando hubenja nene, bibe bioli hubenja gogwe. ⁴⁰ Gubachwilile baya bakikiwa, gubabangile balachu, gumsambile Pedelo, musaosha uyesha nanyi ata mengo mamwechi? ⁴¹ Muyeshe, sabwe, mushichwe ukingila mmutonjwa; uhemena wina ulitolecha, m'bili gwina buwongo.

⁴² Gugile iyaka luendo lwa bubili, gusabile, guganine, tata, nambo bisahuwechegana isengo ino ipume nisahwinywa, ubenjo ube ukiliye.

⁴³ Guchwile iyaka gubabangile balachu; yulu meso mabo mabele manyemu na tulo. ⁴⁴ Gubashikile iyaka, gugile, usaba, gudabile mwendo lwa butatu, gudogomine binywa bioka biya. ⁴⁵ Hanyuma gubachilile bakikiwa bake, gubasambile lalwe, mlituche, lolwe, mengo mahuhia, mwana gwa Adamu gwabiwa mmaboo ma babii. ⁴⁶ Biuwe, tulikile! lolwe, guya gulihupana kwahuhiya.

⁴⁷ Gwilibele hudogoma, lola, Yuda gumwe gwa baya umina bopi nuuchwa, na hamwechi nage ihichi yata bina tuhilu na tubundo, babele huhuma uu bibuli bya biata na baulu ba batu. ⁴⁸ Na guya gu mmanana guhahile bilaya, gukanine, guandiumbatila, gugo noo gee, m'bwaswe. ⁴⁹ Haho gumkilile Yesu, gumkanine, moyoo, mgigia, numumbatila.

⁵⁰ Yesu gumsambile, genda, ubeita biuchwisha. Bakile, bagolole maboo boo num'bwata Yesu. ⁵¹ Nalala, gumwe gwebo gubele hamwechi na Yesu gugolole uboo wage, na uhunya aele age mluhao gummulile mchagua ibuli yata gumkedile letu. ⁵² Haho Yesu gumsambile, kiwicha aele obe mluhao bose bene bali huwata twele bihagwa natuwele. ⁵³ Mulihulanga nene nishi na msambila tata nage nupilila hano bino bihichi unina bibili bya bamalaika ba bita? ⁵⁴ Giewilila wii migolo, bino noo biliingie uba?

⁵⁵ Maya mengo Yesu gwisambile ihichi, yulu ya iimwachwa nahi umbwata msapi mwina tuhilu na tubundo, yulu ya umbwata? Masuku mose mbele hushama mmiihuile nihugigia mushi mbwashile. ⁵⁶ Bino byose bili bululi migolo gya bambwa giigiliye. Hoka haho bakikiwa bake bamshikile basinine.

⁵⁷ Nabo bene babwashile Yesu bammilile wa Kayafa, Ibuli yata, wababele busambane bakuchi na baulu. ⁵⁸ Pedelo gumlamine lembalemba hanyuma nda na ilubunga bunga ya ibuli yata, kungungile mnda, bushamine na bakiche, gamone isula yage.

⁵⁹ Bibuli bya biata na sumbila lyose baengile binywa bya umchinga bya lulimi wa Yesu yulu bammage. bashibimonine inangwa bachwile bengi ⁶⁰ udogoma bya lulimi. ⁶¹ Hanyuma hachwile bapi, baganine gugu guganine, ninaosha wibele ihwile ya Abetcha Pungu, na wigubaa umasugu matatu.

⁶² Haha ibuli yata gukimene numsambila, ushi na inywa ya ugaa? Bano balihubangishya ii? ⁶³ Yesu gushamine pii. Ibuli yata gumsambile, Nihulahya wa Abetcha Pungu ali mwego, utusambile nambo gugwe nao Keleshitu, mwana gwa Abetcha Pungu.

⁶⁴ Yesu gumsambile, gogwe wagana, nuhumganina uhula mano mengo mwimona mwana gwa Adamu gwashama uboo wa ulume wa uoma, gulihucha na matemba ma hekulu.

⁶⁵ Ibuli yata yagula bichwalaganywa biage, gwagana, gwasebulula, tuli hwenga inge ii ya ugana? Holwe mwahulicha guga msebululo gwage. ⁶⁶ Mwamona wii benywe? Bangaile, badugomine, gulingiye uhagwa. ⁶⁷ boo numsulila mayenyi, bammulile maone, bange mammulile pei. ⁶⁸ Baganine, gogwe Kelesitu, tusambile nanyu guuhula?

⁶⁹ Pedelo kubele mshame hambuga m'ibungabunga gumwe mcha gwa mmachana gugile weli, numsambila, na gogwe waba hamwechi na Yesu gwa Galilaya.

⁷⁰ Guhaninye u meso ma bose, guganine nishigidi ulihudogoma ii.

⁷¹ Hetoboile hambuga ha ukumbini, gunge mmachana gummonine, gubasambile batubene babele uya, gugu gwaba hamwechi na Yesu Munazaleti.

⁷² Pedelo guhaninye iyaka wa ulaha, gugo mtunishi mgidi.

⁷³ Mengo macho, baya bene babele huhulicha bambilile, bamsambile Pedelo, wa winene na gogwe wi gumwe gwabo, yulu ata midogome nyi kiobe igilimonye.

⁷⁴ Gutulile uloga na ulaha guganine, nishigidi mtu, koo noo uduga.

⁷⁵ Pedelo gwengeleche iya inywa ya Yesu yedogomine, koo kibi kishina duga wii panya nyendo chitatu. Gutoboile hambuga, kulilile wa biyosochi.