¹ Yesu aingile mubwato, alyabukile bushilya, no kwisa mumusumba wakumwabo. ² Moneni kwaletelwe uwaume uwabulebe naba mulalika pabutanda. Amwene icitetekelo cakwe, Yesu alandile kuwabulebe, "Wemwana umwaume, ba uwakoseleshiwa. Imembu shobe na shelelwa."

³ Moneni, bamo abamuli bakalemba batendeke ukula ipushanya ati, "Uyumuntu aleponta." ⁴ Yesu alishibe ifyo baletontonkanya nokulanda ati, "Fishi muletontonkanya ifya bipamutima yenu? ⁵ Pantu ici cili icayanguka, ukulanda ati, Imembu shobe nashelelwa; nangula ukulanda ati, 'Ima nokwenda'? ⁶ Nomba kuti mwaishiba ukuti Umwana umwaume wa muntu ali namaka muno calo aya kwelela imembu, ..." Alandile kuwa bulebe, "Iminina, senda ubutanda bobe, nokuya kung'anda yobe." ⁷ Nomba umwaume alimine nokuya kung'anda yakwe. ⁸ Ilyo icintubwingi camwene fi, bali no mwenso no kupela ubukata kuli Lesa, uwapela amaka yabefi ku bantu. ⁹ Elo Yesu alepita ukufuma kulya, amwene umuntu weshina Mateo naikala alesonkesha imisonko mwi teti. Alilandile kuli ena ati, "Nkonka." Alimine no kumukonka.

¹⁰ Elo Yesu aikele mung'anda mukulya, moneni, bakasonkesha wamisonko naba bembu abengi baishile mukulya na Yesu nabasambi bakwe. ¹¹ Ilyo aba Faliseyo bamwenefi, balandile kubasambi bakwe ati, "Cinshi kafundisha wenu alelila nabakasonkesha naba bembu?"

¹² Ilyo Yesu aufwilefi, alandile ati, "Abantu bakonsa imibili tabakabila shing'anga, kano fye abalwala. ¹³ Kabiyeni nokusambilila umo ifi filolele: 'Nebo fwaya uluse ukucila amalambo.' Pantu Nebo shaisa mukwita abololoke ukulapila, kano ababembu."

¹⁴ Nomba abasambi bakwa Yohane baishile kuli ena nokulanda ati, "Cinshi fwebo na bafaliseyo lyonse tulekela kulya, nomba abasambi benu, tabafunga ukulya?"

¹⁵ Yesu alandile kuli bena ati, "Bushe kuti abana ba bwinga bengalosha icibi ilyo umwine wabwinga bacili na bena? Nomba inshita shikesa elo shibwinga akasendwa pali bena nomba bali nokulafunga. ¹⁶ Tapali umuntu uwingabula icikamba icipya nokubika pansalu yakale, pantu icikamba ngacale puka kufuma pansalu, icipunda kukulilako. ¹⁷ Tapali umuntu uwinga bula umwangashi upya nokubika munsupa iyakale, ngabacitefi, insupa kuti yalepuka, nomwangashi kuti waitika, nensupa kuti waonaika. Apalingile, babika umwangashi munsupa iituntulu, na fyonse kuti fyasungika."

¹⁸ Ilyo Yesu alelanda ififintu kuli bena, moneni, kateka aishile nokufukama kuli ena. Alandile ati, "Umwana wandi mukashana nomba ali mukuleka ubumi, kuti mwaisa nokubika amaboko pali ena, nao aleba nobumi." ¹⁹ Nomba Yesu alimine nokumukonka, pamona basambi bakwe.

²⁰ Moneni, umwanakashi uwalwele umukunko pamyaka ikumilimo naibili aaishile kunuma yakwa Yesu no kwikata pampela yamukansu wakwe. ²¹ Pantu alandile fye umwine ati, "Nga naikatafye ku nsalu yakwe, ndebafye bwino."

²² Nomba Yesu apilibwike nokumumona, nokulanda ati, "Wemwanakashi, icitetekelo cobe; nacikulenga ukuba bwino." Nomwanakashi aliposhiwe ukufuma palikalya kene akashita. ²³ Elyo Yesu aingile mung'anda yakwa kateka, amwene abalelisha imitolilo necintu bwingi cilepanga ifyongo. ²⁴ Alandile ati, "Fumeni apo, pantu umukashana tafwile, nomba alelefye." Nomba bena bali mupunike nokumususha. ²⁵ Ilyo cintu bwingi nacifumishiwa panse, alingile mumuputule nokumwimya kukuboko, nao umukashana alimine. ²⁶ Imbila yaici yakumene konse kuli cilya citungu.

²⁷ Elo Yesu apitile ukufuma kulya, impofu shibili shalimu konkele. Shalepunda nokulanda ati, "Tubeleleni uluse, Wemwana umwaume uwakwa Davidi!"

²⁸ Ilyo Yesu aleingila mung'anda, impofu shalishile kuli ena. Yesu alandile kuli bena ati, "Namu sumina kuti napangaci?" Nabo balandile kuli ena ati, "Emukwai, Kuuku."

²⁹ Nomba Yesu abakwete pamenso nokulanda ati, "Lekeni cipangwe ukulingana ne cisumino cenu," ³⁰ elo na menso yabo yaliloleshe. Nomba Yesu abakonkomeshe nokulanda ati, "Moneni peba wakwishiba pali ifi." ³¹ Nomba balya baume baile panse nokusalanganya ilyashi palifyo mucintungu conse.

³² Elo abaume babili baleyafye, moneni, kwaletelwe bacibulu babili abali nengulu batwelwe kuli Yesu. ³³ Ilyo ingulu shafumine, umuntu uwali cibulu alilandile. Icintu bwingi calipapile nokulanda ati, "Ici tacatala cibamo muno mu Isreali!"

³⁴ Nomba aba Faliseyo balelanda ati, "Nimuli kateka wafibanda, emo afumisha ingulu."

³⁵ Yesu aile monse mumisumba namumishi. Ali konkenyepo ukufundisha muma Sinagoge yabo, alebila mbilasuma yabufumu nokundapa amalwele ayapusana pusana nokulwala ukwapusana pusana. ³⁶ Ilyo amwene icintu bwingi, ali uwankumbu kuli bena, pantu bale cushiwa nokukana koseleshiwa. Bali nge mikoko yabula kasunga. ³⁷ Alandile kuba sambi bakwe ati, "Ukusombola nakukula, lelo aba kasombola naba cepa. ³⁸ Eico pepeni kuli Kuuku umwine kasombola, pankweba ati akatume abakusombola mwibala lyakwe."