¹ Ilyo Yesu akokele ukufuma kulupili, icintubwingi calimukonkele. ² Moneni, umulwele wafibashi aishile nokukontama kuli ena, nokulanda ati, "Kuuku, nganamutemwa, kuti mwangwanya."

³ Yesu atambike ukuboko kwakwe nokumwikata, alandile ati, "Nintemwa. Wama." Mukampampa aliwamishiwe kufibashi fyakwe. ⁴ Yesu alandile kuli ena ati, "Moona tekwesha ukwebako umuntu uuli onse. Kabiye palobe, kailange kuli shimapepo, nokupela icabupe ico Mose akokomeshe, pakuba ubunte kuli bena."

⁵ Ilyo aleisa ku Kapenamu, umukalamba wabashilika aishile kuli ena, alemupapata ⁶ nokulanda ati, "Kuuku, umubomfi wandi nalala mu ng'anda ali nobulebe kabili filekalipa."

⁷ Elo Yesu alandile kuli ena ati, "Nalaisa nokwisa muposha ena."

⁸ Umukulu wabashilika alyaswike nokulanda ati, "Kuuku, nshilingile mwebo ukwisaingila mung'anda yandi. Landenifye ishiwi nomubomfi wandi alepola. ⁹ Pantu nanebo ndimuntufye uwasontwafye mumaka, uwapelwa nabashilika. Nanda kuli umo ati, 'Kabiye,' nao aya, nokulanda kumubiye, 'Isa,' nao aisa, nakumubomfi, 'Citefi,' nao alabomba."

¹⁰ Ilyo Yesu aumfwile ifi, calimupapwishe nokulanda kuli bonse abalemukonka, "Icine cine nalanda kuli mwebo ati, Ine nshisangilemo nangu umo uwamuba Israeli uwacitetekelo icakulefi. ¹¹ Ine namyeba, abengi bakesa ukufuma kukabanga nakumbonshi, bakalya petebulo na Abulahamu, Isaki, naYakobo, mubufumu bwamumulu. ¹² Lelo abana baume ababufumu bakaposwa kunse mumfimfi, uko ukukaba ukulila nokusumanya ameno." ¹³ Yesu alandile kumukulu wabashilika, "Kabiye! Ngefyo usumine, efyo cilecitwa kuli webo." Nomubomfi apolele palikalya kene akanshita.

¹⁴ Ilyo Yesu aishile kung'anda yakwa Petulo, amwene umupongoshi mwanakashi wakwa Petulo nalwala ipepo nalambalalako. ¹⁵ Yesu amwikete ukuboko kwakwe, nempepo yalipwile. Umwanakashi alimine nokutampa ukumubombela. ¹⁶ Ilyo icungulo caishile, abantu baletelwe kuli Yesu abengi abakwetwe nengulu. Afumishe imipashi kwi shiwi nokuposha bonse abali nabalwala. ¹⁷ Ici cali icakufikilishiwa ifyalandilwe na Esaya kasesema, alanda ati, "Umwine asendele amalwele yensu nokanaka kwesu konse."

¹⁸ Nomba ilyo yesu amwene icintu bwingi nacimushingulika, apele ifyakukoka nokwabukila bushilya bwa cimana ca Galili. ¹⁹ Nomba kalemba aishile kuli ena nokulanda ati, "Kafundisha, nakulamikonka konse kuntu muleya."

²⁰ Yesu alandile kuli ena ati, "Bamumbwe balina mendo, nefyoni fyamumulu fili nefinsa, lelo umwanawamuntu takwete napakusamina umutwe wakwe."

²¹ Nabambi abasambi balandile kuli ena ati, "Kuuku nsuminisheni ndeya mbale nokuyashika tata wandi."

²² Lelo Yesu alandile kuli ena ati, "Nkonka, sha abafwa bashike abafwa banabo."

²³ Ilyo Yesu aingile mu bwato, abasambi bakwe balimukonkele mubwato. ²⁴ Moneni, kulya kwaimine umwela uukulu pacimana, elo ubwato bwafimbilwe namabimbi. Nomba Yesu ali nalala. ²⁵ Abasambi baishileisa kuli ena nokumushibusha, nokulanda ati, "Tupususheni, Kuuku; twalaloba!"

²⁶ Yesu alandile kuli bena ati, "Cinshi muletina, mweba cisumino cinono? Elo ashibwike aleseshe imyela necimana. Kwali isaba nokutalala ukukulu.

²⁷ Abantu calibapapwishe no kulanda ati, "Bushe muntu washani uyuwine, uyo nemyela necimana filamumfwila?"

²⁸ Ilyo Yesu aishile bushilya lubali naku calo ca Gadara, abantu babili abali nengulu balimukumenye. Balimukwisa ukufuma kumipolo abali abacimfulunganya, ukweba ati tapali abaleendo abengapita muli ilya inshila. ²⁹ Moneni, balilile nokulanda ati, "Bushe cinshi twalacita kuliwe, we Mwana umwaume wakwa Lesa? Mwishile kuno mukutukalifya apo inshita tailafika?"

³⁰ Nomba ibumba lyankumba lyali kulya mukulya, tapalepele sana ukufuma kuli bena. ³¹ Elyo ingulu shakonkenyepo ukupapata Yesu nokulanda ati, "Ngamwatufumya kunse, mumutume muli lilya ibumba lya nkumba."

³² Yesu alandile kuli shena ati, "Kabiyeni!" Ingulu shaishile fuma kunse nokuya munkumba; kabili moneni, ibumba lyonse lyakonkele panshi yacimana nokufwila mumenshi. ³³ Bonse abo abalesunga inkumba balibutwike nokuya mu musumba nokuyalanda fyonse, makamaka ifyacitike kubantu abali nengulu. ³⁴ Moneni, imisumba yonse yaishile kunse nokukumanya Yesu, Ilyo bamumwene, balimulombele nokusha icitungu cabo.