¹ "Mwipingula, pakuti namwebo mwikapingulwa. ² Pantu ubupingushi mupingula, namwebo mukapingula, necipimo upiminako, namwebo eco mukapinwako. ³ Cinshi taumwena akapande akali mulinso lyakwa munonko, elo ninshi taumona umulando uuli mulinso lyobe? ⁴ Nomba nicinshi wingalandila kuli munonko ati, 'Nkufumye umulando uuli mulinso lyobe,' ninshi cibe naukwata umulando mulinso lyobe? ⁵ Mwebambikishi! Mbale fumya umulando uuli mulinso lyobe, elyo wingafumya umulando uuli mulinso lyakwa munonko. ⁶ Mwipela icili icamushilo kumbwa, nangula ukuposa imikate yenu kuntanshi yabakapoli. Pakuti bafishonaula kumakasa, nokubwela kukumiputaula mutupimfya tupimfya.

⁷ "Lombeni, mukapelwa. Fwayeni, mukasanga. Konkonsheni, neciibi cikeswilwa kuli mwebo. ⁸ Pantu onse uulomba, alapokelela; naonse uufwaya, alasanga; nakumuntu onse uukonkonsha, iciibi cikeswilwako. ⁹ Nangula ninaani pali mwebo, uuyo umwana wakwe umwaume engepusha umukate, amupela ilibwe? ¹⁰ Nangu nga ena aipusha isabi, amupeela insoka? ¹¹ Eico, nga mwebo mwebabifi mwaishiba ukupela ifyabupe ifisuma kubaana benu, ngacinshi ifyofine mukufusha Tata uwamumulu engafilwa ukupela ifyabupe ifisuma kuli abobonse abamwipusha? ¹² Eico, ico conse ufwaya abantu ukucita kuli webo, efyo nawebo ulingile ukucita kuli bena, pantu ici efunde kabili cabakasesema.

¹³ "Ingileni pamwinshi uunono. Pantu umwinshi uukulu nokukula kwanshila kutwala kubonaushi, nabengi abantu emo bapita. ¹⁴ Lelo umwinshi uunono nenshila yalyafya iitungulula ku bumi, elo banono abaisanga.

¹⁵ "Mube abasalapuka kuli bakasesema ababufi, ebesa kuli mwebo mufyakufwala fyamikoko lelo mukati mimbulu iisumaula. ¹⁶ Kufitwalo fyabo eko mukabeshibila. Nalimo abantu kuti bakolonganya imyangashi ku mwunga nangu imikunyu kuli ba cilasa? ¹⁷ Munshila imo icimuti icisuma cisekesha ifisabo ifisuma, nomba icimuti icabipa cisekesha ifisabo ifyabipa? ¹⁸ Icimuti cawana tacisekesha ifisabo fyabipa, nangu icimuti icabipa ukusekesha ifisabo ifisuma. ¹⁹ Icimuti conse icishisekesha ifisabo ifisuma cilatemwako noku upomya panshi no kuposwa mumulilo. ²⁰ Elo mukabeshibila kufisabo fyabo. ²¹ Teuli onse ulanda kuli nebo ati, Kuuku, Kuuku ukengila mubufumu bwa mumulu, Nomba kano ulepanga ubufwayo bwakwa Tata wa mumulu. ²² Abantu abengi bakalalanda kuli nebopali bulya ubushiku, 'Kuuku, Kuuku, bushe tatwasesemene mwishina lyenu, mwishina lyenu twalefumishamo imipashi yangulu, namwishina lyenu twapangilemo sana ifipeshamano?' ²³ Nomba nkalanda kuli bena ati, 'Nebo nshamishiba! Fumeni pali nebo, mwebakacita bamisamwe!'

²⁴ "Eico, uyo onse uulekutika kumashiwi yandi nokuyakonka abango muntu wamano wakulile ng`anda yakwe pamulu welibwe. <sup>25</sup> Ilye mfula yalokele, icibunshi calishile, necipupu caponene pa ng`anda, nayo tayaponene panshi, pantu yakulilwe pebwe. ²⁶ Nomba uyo onse ulekutika amashiwi yandi no kukana yakonka abango muntu icinangwa uwakulile ing`anda yakwe mumucanga. <sup>27</sup> Imfula yalilokele, necibunshi calishile, necipupu caponene no kusunkanya ing`anda, nokupona, nokutobeka kwa ng`anda kwalibipishe."

²⁸ Ilyo califi Yesu apwile ukulanda amashiwi, elyo icintubwingi capapile imifundile yakwe, ²⁹ Pakuti ale bafunda ngo waba na maka, ukucila pali ba kalemba wabo.