¹ Yesu aitile abasambi bakwe ikumi na babili nokuba pela amaka pamipashi yangulu, ukula tamfya, nokuposha amalwele ayalekana lekana na malwele yonse. ² Nomba amashina yabasambi nyaya. Uwantanshi Simon (uwaleitwa Petelo), na Adeleya munyina; Yakobo umwana mwaume wakwa Sebede, na Yohane munyina; ³ Filipo, na Bartolomeo; Tomashi, Na Mateo uwali kasokesha; Yakobo umwana mwaume wakwa Alfeo, na Tadeo; ⁴ Simon umwina Sealoti, na Yuda Iskariote, uukamufutuka.

⁵ Aba ikumi na babili Yesu aliba tumine. Naena ali balangilile nokulanda ati, "Takuli kuya pancende apali mukusangwa abashaishiba Lesa, nangula ukwingila mu musumba wabena Samaliya. ⁶ Kabiyenifye kumikoko iyaluba iya ba ng'anda yakwa Israeli; ⁷ napeka ngamuleya, bileni nokulanda ati, 'Nabufika ubufumu bwakwa Lesa.' ⁸ Muleposha amalwele, nokwimya abafwa, ukuposha ababulebe, nokufumya ingulu. Mwapokelele ubupe, peleni ubupe. ⁹ Mwisenda nangu Golde, Silfele, nangu ni Kopa mumishipi yenu. ¹⁰ Mwisenda nangula cola mubulendo bwenu, nangulafye imikasu yapambali, nangulafye nisapato, nangula nikonto, pantu umubomfi abikilwa ukulya icakulya cakwe. ¹¹ Nangula musumba atemwa umushi untu mwaingilamo, fwayeni ukusuma, eko mwikale pakafye nokufuma. ¹² Elo mwaingila mung'anda, posheni. ¹³ Mung'anda ngana muwama, lekeni umutende ubepo. Nomba ngatamu weme, lekeni umutende umibwelelele. ¹⁴ Elo kulyabo abatakamipokelele nangu ukukutika kwishiwi lyenu, ilyo mulefuma mung'anda nangula mumusumba, kunteni ulukungu kumakasa yenu. ¹⁵ Icine cine ndelanda kuli mwebo, cikabipisha ukucila impanga ya Sodoma na Gomola muli bulya bushiku bwabu pingushi.

¹⁶ "Moneni, Nebo na mituma ngemikoko mukati kaba mumbwe, elo mube abacenjela nge nsoka na bakaele ngenkunda. ¹⁷ Mubale mumone kubantu! Bakamitwala mufilye, nokumyuma mu masinagoge yabo. ¹⁸ Baka mitwala ku buteko na kuli bakateka pamulandu weshina lyandi, bukaba bunte kuli bena na kubena fyalo. ¹⁹ Ilyo baka mitwalako mwikasakamana pafintu mukalanda, ifyo muka landa fika pelwa kuli mwebo pali kalya kene kashita. ²⁰ Pantu temwebo mukalalanda, nomba umupashi wakwa Wishinwe eukalanda muli mwebo. ²¹ Munyina akatwa munyina kukwipaiwa, ba wishi nomwana. Abana ba kemina abafyashi babo nokuleka batwalwe mukwi paiwa. ²² Muli nokupatwa kuli bonse pamulandu weshina lyandi. Nomba ukakosafye mpaka na kumpela, ulya muntu akapusuka. ²³ Nga bamupakasa mumusumba, butukileni kumbi, icine cine nalanda kuli mwebo, tamwakapite mumisumba yakwa Israele kanofye Umwana mwaume wa Muntu akese.

²⁴ "Umusambi tacila kafundisha wakwe, nangu umubomfi ukuba pamulu wakwa shikulu wakwe. ²⁵ Kuti cawama musambi ukuba nga kafundisha wakwe, umubomfi nga shikulu wakwe. Nga baita shikulu wa ng'anda Beelsebuli, cabulanda kuli balya abekalamo mung'anda! ²⁶ Eico mwibatina, pantu tapali icintu icafisama icishakasokololwe pambilibili. ²⁷ Ifyo namweba mubushiku, fikalandwa mukasuba, ico mwaufwa mu matwi yenu, cikabilishiwe pamulu wa ng'anda. ²⁸ Mwilatina abo abepaya umubili nomba abashipaya umweo. Mutine, uuleonaula fyonse umubili nomweo mu mulilo. ²⁹ Nenseba shibili kuti shashitwa pali koini umo umunono? Tapengaba pali ulu lwingapona ukwabula amano yakwa Tata. ³⁰ Nomba imishishi yakumutwe obe yonse yalipendwa. ³¹ Mwilatina. Mwali cindama ukucila inseba ishingi. ³² Eico uyo onse ukanumbula pamenso ya bantu, Nanebo kamulumbula pa menso yakwa Tata uwaba mu mulu. ³³ Uwankana pa menso ya bantu, Nanebo ndino kumukana pamenso yakwa Tata uwaba mulu.

³⁴ "Mwitontokanya ukuti Nebo naisa pano calo kukuleta icibote. Nebo nshaisa mukuleta icibote, nomba umupanga. ³⁵ Pantu Nebo naisa mukupusanya umwana na wishi, umukashana naba nyina, nafyala naba nyina fyala.

³⁶ Abalwani ba muntu nibalya abali mu ng'anda yakwe. ³⁷ Uwatemwisha wishi nangula nyina ukucila nebo tali na mutende na nebo; uwatemwisha umwana umwaume nangu umwana umukashana ukucila nebo tali namutende na nebo. ³⁸ Uwakana kuitwika icapindama cakwe nokunkonka nebo tali na mutende na nebo. ³⁹ Uyo uwasanga ubumi bwakwe akabulufya, nomba uwalufya ubumi bwakwe pamulandu wandi akabusanga.

⁴⁰ "Uyo uwamipokelela mwebo, apokelela nebo, nowapokelela nebo apokelela nowantumine. ⁴¹ Uyo uwapokelela kasesema mwishina lya kwa kasesema akapokelela icilambu cakwa kasesema, uwa pokelela umuntu umololoke mwishina lya muntu umololoke akapokelela icilambu ca mololoke. ⁴² Uyo onse uwapela uwamulya aba abanono nangula kapu wa menshi ayatalala mwishina lya musambi, icine cine Ndelanda kuli mwebo ati, ena takalufye icilambu cakwe."