¹ Nomba yali ninshita elo Yesu apwile ukulangilila abasambi bakwe ikumi na babili, alifumineko alaya kuku sambilisha nokushimikila mu misumba. ² Nomba ilyo Yohane aumfwile mu cifungo imilimo yakwa Kristu, atuminepo abasambi bakwe kukuyamweba ³ nokulanda kuli ena ati, "Bushe niwebo uulesa, nalimo tulelolela umbi?"

⁴ Na Yesu alibaswike nokulanda kuli bene ati, "Kabiyeni kalandeni kuli Yohane ifyo mulemona nokumfwa. ⁵ Impofu shilelolesha, abafibashi balewamishiwa, naba shumfwikisha baleumfwa, nabafwa balebushiwa, nabapina bashimikilwa imbila nsuma. ⁶ Kabili alishuka uushipuntula ukupitila muli nebo."

⁷ Elo aba abaume baleya mukubwekelamo, Yesu atampile ukulanda kucintu bwingi palwa kwa Yohane, "Cinshi mwaile kukumona kumutengo - litete ililetenkana ku mwela? ⁸ Lelo cinshi mwaile kukumona- umuntu uufwele ifyabusaka? Moneni, abafwala ifyabusaka bali mumayanda yaba shamfumu. ⁹ Nomba cinshi mwailile ku kumona- kasesema? Ee, Nebo ndelanda kuli mwebo, ne wacila kasesema. ¹⁰ Uyu eo calembelwe, 'moneni, Ninebo ndimukutuma umwiminishi wandi kuntashi yenu, uyo uukapekanya inshila kuli mwebo.'

¹¹ Icine cine ndelanda kuli mwebo mubafyalwa kubanakashi, tapali nangu umo uwakucila pali Yohane kabatisha. Lelo umunono mubufumu bwa mu mulu mukulu ukucila ena. ¹² Ukufuma pashiku shakwa Yohane kabatisha ukufika pali nomba, ubufumu bwa mu mulu bwa patikishiwa, aba bupatikisha babupoka kumaka. ¹³ Pantu bakasesema bonse na mafunde yasesemwe ukufika pali Yohane; ¹⁴ nga mulefwaya ukuyapokelela, ena Eliya uo batile akesa. ¹⁵ Uli namatwi yakumfwa, omfwe. ¹⁶ Lelo ndeipashanya kuli cinshi inkulo ino? Yapala abaice abekala mumushika nokubilikisha ababiye, ¹⁷ nokulanda ati: 'Natumilishisha ifimpeta, namwebo tamucindile. Natulila imisowa, namwebo tamutukumwine.'

¹⁸ Pantu Yohane aishile talelya kabili talenwa, nabantu balandile ati, 'Ali ne ciwa.' ¹⁹ Umwana mwaume wa Muntu aisa alelya no kunwa nabena balandile ati, 'Lolesheni, uyu muntu ni cakolwa kabili cinwenwenwe, umunabo waba kasangula nababembu!' Kabili amano yapelwa insambu kumilimo yabo."

²⁰ Nomba Yesu atapile ukwebaula imisumba umwacitilwe ifipesha mano fyakwe ifingi, pantu bena tabakwete ukulapila. ²¹ "Kalanda kuli webo, Korasini! Kalanda kuli webo Betsaida! Nga ifipesha mano fyacitilwe mu Turi na Sidone cikaba eyefilya kuli mwebo, ngabalikwete ukulapila munshiku shakale mufisamu namuto. ²² Nomba, Nebo ndelanda kuli mwebo ukuti tacakawame kuli Turi na Sidone pa bushiku bwa bupingushi ukucila mwebo. ²³ Nawebo, Kapernahumu, bushe ulatotokanya ukuti ukasumbulwa mumulu? Awe, webo Ukakoshiwa kumbo. Pantu nga ficitwa mu Sodomu ifipapwa ifyacitilwe muli webo, nga waikalila ukufika kuli bunobushiku. ²⁴ Nomba Nebo ndelanda kuli mwebo ati cikaba ica anguka kumpanga ya Sodomu mubushiku bwa kupingulwa ukucila pali webo."

²⁵ Panshita ilya Yesu alandile ati, "Nebo ndemutasha mwebo, mwe Tata Kuuku wa mumulu napanshi, pakuti mwafishile ifintu ifi ukufuma kubamano naba kufwikisha, nokufisokolola kutwaice. ²⁶ Ee, Tata, pakuti efyo caba ca kusansamusha ku cinso cenu. ²⁷ Ifintu ifyo nafipelwa kuli nebo ukufuma kuli Tata; Kabili takuli uwaishibo Mwana umwaume ukufuma kuli Tata, kano wishi nangu waishiba wishi kano mwana noyo mwana atemwa ukumusokolwela. ²⁸ Iseni kuli nebo, bonse mwebacula kabili abafininwa nefisendo, na Nebo ndemipela ukutusha. ²⁹ Piteni ikonkoli lyandi nokusambilila kuli Nebo, pantu Nebo ndiuwafuka kabili uwaicefya mumutima, elo mwingasanga ukutusha kumitima yenu. ³⁰ Pantu inkoli lyandi lyalyanguka, necisendo candi calyanguka."