¹ Muli shilya nshiku Yohane kabatisha alishile mukubilikisha mu mutengo uwa Yudea aletila ati, ² "Lapileni, lekeni ifibi fyonse pantu ubufumu bwamumulu buli mupepi." ³ Pantu ifi efyalandile kasesema Esaya ati, "Ishiwi lya ulebilisha mu mutengo, 'Pekanyeni umusebo umwakwendamo Kuuku. Lungamikeni umusebo wakwe ube uwaololoka.'"

⁴ Nomba Yohane uyo alimukufwala insalu iya masako ya ngamila no mushipi wamukupo wanama mumusana wakwe. Ifilyo fyakwe fyali fipaso nobuci bwa mumpanga. ⁵ Abamu Yerusalemu, bonse mucitungu ica shinguluka Umulonga wa Yordani balefuma baleya kuli ena. ⁶ Bonse baleibishiwa kuli ena Mumulonga wa Yordani, baleilondolwela ububifi bwabo. ⁷ Nomba ilyo amwene aba Falise abengi naba Saduki baleisa kuli ena kukubatishiwa, alandile kuli bena ati, "Mwebufyashi bwansoka mwe, nani uwamucenjeshe pakuti mufulumuke kubukali ubuleisa? ⁸ Eico twaleni ifitwalo ifyawama ubulapilo. ⁹ Mwila ituntumba nokuilandila palwenu ati, 'Twalikwata Abraham etata wesu.' Pantu Ndemweba nati Lesa nakwata amaka aya kwimya abana bakwa Abraham ukufumya mulyaya mabwe. ¹⁰ Nakuba isembe lyalibikwa ukutengelesha ku mushila wafimuti. Kanshi icimuti conse icishitwala ifitwalo filingile ukutemwa nokuposwa mumulilo. ¹¹ Nebo ndimukumibatisha mwebo mumenshi kukulapila. Uyo uuleisa kunuma yandi nakwata amaka ukucila Nebo, na Nebo nshilingile ukukakula intambo pamakasa yakwe kabili nshilingile ukusenda insapato shakwe. Akamibatisha kumupashi wamushilo nakumulilo. ¹² Ena nakwata ulupe muminwe yakwe mukupepwilako imisungu ukuleka iponene panshi napeka nokukolonganya ingano shakwe ukushibika mubutala. Lelo ali kubula imisungu nokuiposa mumulilo icakuti tekuti ifumemo nakalya."

¹³ Nomba Yesu afumine ku Galile nokuya kumumana wa Yodani mukuya batishiwa na Yowane. ¹⁴ Lelo Yowane alyeseshe ukuti amuleshe, alandile ati, "Ndekabila ukubatishiwa nawebo, bushe nomba waisa kuli nebo? ¹⁵ Yesu alyaswike nokulanda kuli ena ati, "Cisuminishe nomba, pantu ecilingile fwebo ukufikilisha ubulungami." Lelo Yowane alimusuminishe. ¹⁶ Panuma yakubatishiwa, Yesu peka alifumine mumenshi palyapene, moneni, umulu walimwisukile. Alimwene Umupashi wakwa Lesa ulekoka nge nkunda nokwisa ikala pali ena. ¹⁷ Mona, neshiwi lyafumine mumulu ukulanda ati, "Uyo emwana wandi Umwaume. Uyo natemwisha. Nebo uyo eombekelwamo."