¹ Nomba ilyo bwacele ulucelo, bashimapepo bakalamba bonse na bakalamba babantu bapangene amano pakuti bepaye Yesu. ² Peka bamukakile, bamutungulwile, nokumutwala kuli kateka Pilato.

³ Nomba ilyo Yuda, uwamunshingulwike, pakumona ukweba ati Yesu nasekwa, alilapile abweseshe amakumi yatatu aya Silfere kuli bashimapepo bakalamba nabakalamba, ⁴ nokulanda ati, "Nimbembuka pakunshinguluka umulopa uwakaele." Nomba bena balandile ati, "Bushe mulandu wesu? Kaimwene wemwine." ⁵ Nomba ena aposele utupimfya utwa Silfere mucilonganino, afumineko, nokuya ikulika umwine. ⁶ Awe bashimapepo bakalamba babulile isha Silfere nokulanda ati, "Tecamwifunde ukubika ici mucipao pantu camutengo wa mulopa." ⁷ Lelo bapandene amano bonse, elyo impiya bashitilemo impanga yakwa kabumba umwakushika abeni. ⁸ Pantu pali uyu umulandu eico impanga itwa ati, "Impanga ya mulopa" ukufika napali nomba. ⁹ Nomba cilya calandile Yeremia kasesema, alandile ati, "Babulile ifiputulwa fyama Silfere amakumi yatatu, nomutengo wabikilwe paliena kubana bakwa Israele, ¹⁰ nokushipela kulikabumba webala, ngefyo Kuuku akambishe."

¹¹ Nomba Yesu aliminine pamenso yakwa kateka, nakateka alimwipwishe ati, "Bushe webo uli mfumu yaba Yuda?" Yesu alimwaswike ati, "Naulanda."

¹² Nomba ilyo ashininwe nabashimapepo abakulu na bakulu ba cilonganino, taaswike nangu cimo. ¹³ Nomba Pilato alandile kuli ena, "Bushe webo taumfwile ifintu fyonse ifyo bakushinine?" ¹⁴ Kabili tamwaswike inshiwi nangu limo, eico Kateka alipapile apakulu. ¹⁵ Nomba pa mutebeto ngo mwabelele umwata kateka alefumyapo umufungwa umo uwalesalwa ne cintubwingi. ¹⁶ Pali ilya inshita kwali umufungwa uwayafya uyo baleita ati Baraba. ¹⁷ Eico ilyo bakolongene ca pamo, Pilato alandile kuli bena ati, "Bushe kuti mwatemwa ukumikakwila nani pali Baraba, nangula Yesu uwitwa Krisitu?" ¹⁸ Alishibe ati bapele Yesu kuli ena pamulandu walupato.

¹⁹ Nomba ilyo ena ali naikala pacitebe cakwe icabupingushi, umukashi wakwe atumine ishiwi kuli ena nokulanda ati, "Nshikwete umulandu noyu muntu wakaele. Pantu Nebo nincula sana mubushiku bwelelo paciloto Nebo nacilota pali ena."

²⁰ Nomba bashimapepo bakulu nabakulu ba cilonganino bapapatile icintubwingi ukuti bapusushe Baraba, nokuleka Yesu epaiwe. ²¹ Kateka alibepwishe ati, "Bushe ninani pali aba babili mulefwaya mwebo mikakwile?" Balandile ati, "Baraba."

²² Pilato alandile kuli bena ati, "Bushe nalacita cinshi kuli Yesu uwitwa Kristu?" Bonse baalyaswike ati, "Mutanikeni."

²³ Nomba ena alandile ati, "Kanshi, cibi nshi ena acitile?" Nomba bena bali pundishe nokubilikisha, "Mutanikeni."

²⁴ Ilyo Pilato amwene ukuti tapali nangu cimo ico engacita, nomba icimfulunganyafye ecatampile, abulile amenshi, nokusamba iminwe yakwe pantanshi yacintubwingi, nokulanda ati, "Ndiwakaele kumulopa wauyu muntu. Mushininkishe ici."

²⁵ Awe abantu bonse balyaswike ati, "Umulopa wakwe ube pali fwebo, napabana besu." ²⁶ Nomba akakwile Baraba nokumupela kuli bena, amufopawile Yesu nokupela kukutanikwa.

²⁷ Nomba abashilika bakwakateka batwele Yesu kumusumba uukulu uwabutekeshi nokukolonganya abashilika bonse. ²⁸ Balimufulile nokumufwika umukansu uwakashika. ²⁹ Balimupangile icibalika camyunga nokumufwika kumutwe, nokumupela inkonto kukuboko kwakwe ukwa kulyo. Bamufukamine nokumupunika, ati, "Uyo, Imfumu yabaYuda!" ³⁰ Bamufwishile amate, babulile inkoto nokulamutunkaula kumutwe. ³¹ Panuma nabamupunika, bamufulile umukansu nokumufwika insalu yakwe, nokumutungulula kukumutanika.

³² Ilyo balefuma, basangile umuntu uwafumine ku Kurene uwaleitwa Simoni, uyo bapatikishe ukuya nao pakuti amusendeleko ulupanda. ³³ Baishile kuncende iyaleitwa ati Gologota, icilepilibula ati, "Incende yakapanga." ³⁴ Bamupele umwangashi kukunwa uwasankanishiwa na muri. Nomba ilyo ena asondele, alifililwe ukunwa. ³⁵ Nomba ilyo nabamutanika, ba akenye insalu yakwe nokwamba ukuposelapo ifyakupendwilapo, ³⁶ balikele nokulamulonda. ³⁷ Napamutwe wakwe bapopelepo icakumushinina, icalebelengwa ati, "Uyu ni Yesu, imfumu yaba Yuda." ³⁸ Utupondo tubili twatanikwe na ena, kamo kuboko kwa kulyo nakambi ku kuboko kwa cipiko. ³⁹ Abantu bonse abalepitapo balemutuka, balepukumya imitwe yabo ⁴⁰ nokulanda ati, "Webo wewingonaula icilonganino nokucikula munshiku shitatu, ipusushe wemwine! Ngauli Mwana mwaume wakwa Lesa, wikonshe ukufuma palupanda!"

⁴¹ Mumusango umo wine bashimapepo bakulu balemupunika, pamopene naba kalemba nabakulu ba cilonganino, nokulanda ati, ⁴² "Alepususha bambi, nomba tekuti aipusushe umwine. Nimfumu ya ba Israeli. Naikoshe ukufuma palupanda, elo fwebo twalamusumina muli ena. ⁴³ Acetekele muli Lesa, kanshi Lesa wine amupusushe nomba, nga cakuti Lesa natemwa ukumupususha. Pantu alelanda ati, 'Ninebo Umwana mwaume wakwa Lesa."' ⁴⁴ Ifyo fine notupondo utwatanikwe nao twalemutuka insele.

⁴⁵ Nomba ukufuma panshita yakasuba pakati kwali imfifi pacalo conse ukufika ilyo akasuba kawa. ⁴⁶ Kabili apepi napo akasuba kawa, Yesu alilile nomusowa uukalamba nokulanda ati, "Eli, Eli, lama sabakatani?" Icilepilibula, "Lesa wandi, Lesa wandi, nicinshi mwandekelesesha?"

⁴⁷ Ilyo bamo abaiminine palya baumfwile fi, balandile ati, "Alimukwita Eliya."

⁴⁸ Palyapene umo pali bena abutwike nokuyabula umwepu, aisushamo nomwangashi uwalula, nokubika kwitete, nokupela kuli ena ati anwe. ⁴⁹ Bamo pali bena balandile ati, "Mulekeni eka. Natumone ngacakweba ati Eliya alaisa mupususha." ⁵⁰ Nomba Yesu alilile neshiwi ilikalamba nokufwa afwa.

⁵¹ Kabili moneni, insalu ya mucilonganino yalilepwike ukufuma pamulu ukufika pesamba, nesonde lyonse lyalitentele, namabwe yonse yasalangene. ⁵² Inshinshi shaliswike, nemibili yabantu bamushilo abalele utulo yabukile kubafwa. ⁵³ Bafumine munshinshi pakubuka kwakwe, nokwingila mumusumba wamushilo, nokumonekela kubengi. ⁵⁴ Nomba umukulu wabashilika nabonse abaletamba Yesu bamwene ukulepuka nokutenta kwamushili nokucitika kwafintu, balyumfwile umwenso nokulanda ati, "Cine cine uyu Mwana umwaume wakwa Lesa." ⁵⁵ Nabanamayo abalekonka Yesu abafumine ku Galile ukwisa musunga ninshi baleloleseshafye apatali. ⁵⁶ Palyaba pali na Maria Magadelena, Maria nyina wakwa Yakobo na Yosefu, nanyina wabana baume bakwa Sebede.

⁵⁷ Elyo cali icungulo, kwaishile umwaume umukankala ukufuma ku Arimatea, ishina lyakwe ali ni Yosefu, uwali musambi wakwa Yesu. ⁵⁸ Akumenye Pilato nokumwipusha palwamubili wakwa Yesu. Napilato akambishe ukutila umubili wakwa Yesu upelwe kuli ena. ⁵⁹ Yosefu abulile mubili wakwa Yesu, nokuupombelesha munsalu iyabusaka iyakolokondwe, ⁶⁰ nokuilambalika munshinshi yakwe iyiipya iyobafonkwele mwilibwe. Akunkulwishe ilibwe ilikulu nokushinka pamanda ilya nokuya aya. ⁶¹ Maria Magadelena na Maria umbi bali kulya, nabekala bushilya nemanda.

⁶² Ubushiku bwakonkelepo, bwali bushiku bwakupekanishisha, bashimapepo bakulu naba Falise bakolongene bonse ca pamo na Pilato. ⁶³ Balandile ati, "Mwekateka, tuleibukisha uyu kabepa ilyo ali umumi, alandile ati, 'Panuma yanshiku shitatu Nebo nkabuka peka,' ⁶⁴ Kanshi shininkisheni ukuti imanda yakwe yacingililwa ukufika kubushiku bwalenga shitatu, pantu limbi abasambi bakwe kuti baisa nokumwiba nokulanda kubantu ati, 'Nabuka kubafwa,' nokutumpikwa kwakulekelesha kukabipa ukucila ukutumpikwa kwa kutampa."

⁶⁵ Pilato alandile kuli bena ati, "Shininkishe ukuti yalondwa. Kanshi kabiyeni nokulonda imanda pamaka." ⁶⁶ Efyo baile nokucingilila imanda, bashinkile ilibwe nokubikapo abakulonda.