¹ Nomba pakupwa kwe Sabata, ilyo bwaleca ubwakutendeka ubwamulungu, Maliya Mandelena na Maria umbi baishile mukumona inshinshi. ² Nomba, kwaishile icinkukuma icikulu sana, pantu kwaishile umungeli wakwa Kuuku ukufuma kumulu, aishile nokwisa kunkulushapo ilibwe, nokwikalapo pelibwe. ³ Ukumoneka kwakwe kwali ngenkuba, necakufwala cakwe icabuuta ngemfula yabuta. ⁴ Bakalinda baumfwile umwenso nokuba ngabaume abafwile. ⁵ No mungeli walangile bana mayo nokulanda kuli bena ati, "Mwitina, pantu ninjishiba ukuti mulefwaya Yesu, uwatanikwe. ⁶ Talipano, pantu nabuuka, ngefyo alandile. Iseni mumone apo Kuuku alalikwe. ⁷ Kabiyeni bwangu nokweba abasambi ati, 'Nabuuka ukufuma kubafwa. Moneni, ena namitangilila ku Galile. Kulya eko mukaya mumona.' Moneni, Nebo nimyeba."

⁸ Bana mayo bafumine bwangu bwangu kunshinshi nomwenso kabili nensasa, nokubutukisha ukuya eba abasambi bakwe. ⁹ Moneni, Yesu alibakumemye nokulanda kuli bena ati, "Mwapoleni!" Bana mayo baishile, nokufukama pankasa shakwe nokumupepa. ¹⁰ Elyo Yesu abebele ati, "Mwitina. Kabiyeni mwebe bamunyinane baye ku Galile. Uko eko balaisa mbona nebo."

¹¹ Nomba ilyo abanakashi baleya, moneni, bamo pali bamalonda baingile mumusumba nokweba bashimapepo bakulu fyonse ifyacitike. ¹² Nomba ilyo bashi mapepo bakolongene pamo nabakulu ba cilonganino nokupandashanya amano nabo, bapeele indalama ishingi kubashilika ¹³ nokubeba ati, "Mulande kuli bambi, 'Abasambi bakwa Yesu bacisa ubushiku nokwiba umubili wakwe ilyo twaciba natulala.' ¹⁴ Nga cakuti akasebo kafikile mumatwi yakwa kateka, tukamunasha nasha kanshi mwebo mwisakamana." ¹⁵ Ilyo abashilika bapokelele indalama nokucita ifyo baebelwe. Akasebo kaile konse konse muba Yuda nokutwalilila bulya bushiku.

¹⁶ Nomba abasambi ikumi naumo baile ku Galile, kulupili uko Yesu abebele ukukumanina. ¹⁷ Nomba ilyo bamumwene, balimupepele, nangu bamo batwishike. ¹⁸ Yesu alishile nokulanda kuli bena ati, "Amaka yonse yapelwa kuli nebo mumulu napano calo. ¹⁹ Kabiyeni kulya nokupanga abasambi mufyalo fyonse. Babatisheni mwishina lyakwa Tata, nelya Mwana mwaume, nelya Mupashi wa Mushilo. ²⁰ Mulebasambilisha ukunakila fyonse ifyo namikambishe. Moneni, ndinemwe lyonse, ukufikafye nakukupwa kwanshita."