¹ "Ubufumu bwamumulu bwapalanishiwa kwati ni bana cisumgu ikumi limo ababulile amalampi nokuyasengela shibwinga. ² Basano pali abo bali fiwelewele nabambi basano bali abamano. ³ Lelo banacisungu abawelewele basendele amalampi, tabasendele amafuta awe. ⁴ Nomba banacisungu abamano basende ifipe umwali amafuta elo namalampi. ⁵ Nomba ilyo shibwinga akokwele ukwisa, bonse bayambile ukushipula nokulala. ⁶ Nomba pakati kabushiku kwaumfwikike umusowa, 'Moneni, Shibwinga aisa! Kabiyeni mukumukumanya.'

⁷ Nomba banacisungu bonse baimine nokwasha amalampi yabo. ⁸ Elyo abawelewele balandile kubamano, 'Tupeleniko amafuta pantu amalampi yesu yalashima.'

⁹ "Nomba abamano balyaswike nokulanda ati, 'Pamulandu tayatukumane mwebo nafwebo, kanshi kabiyeni kubashitisha nokuyashita mwebene.' ¹⁰ Ilyo bena baile mukushita, Shibwinga alishile, nabonse abaipekanishishe baile nashibwinga kung'anda yamatebeto, necibi caliselwe.

¹¹ "Napanuma banacisungu bambi babwele nokulanda ati, 'Shikulu, shikulu, twiswileniko,' ¹² "Nomba ayaswike nokulanda ati, 'Mucishinka ndimukulanda kuli mwebo, nebo nshimishibe.' ¹³ Eico mwishipula, pantu tamwishibe ubushiku nangu akashita.

¹⁴ "Pantu caba ngomuntu uwalefwaya ukuya kucalo cimbi. Aitile ababomfi bakwe nokubapela bena ifyuma fyakwe. ¹⁵ Kuli umo apele amatalanta yasano, naumbi yabili, nakuli umbi apele italanta limo. Naumo apokelele ukulingana namaka yakwe, naulya muntu alimine ubulendo. ¹⁶ Ulya uwapokelele amatalanta yasano palyapene aliya sandulwile nokulundapo nayambi yasano. ¹⁷ Mumusango umo wine ulya uwapokelele amatalanta yabili alundilepo yabili. ¹⁸ Nomba umubomfi uwapokelele italanta limo aile, nokwimba icikulo mumushili, nokufisa indalama shakwa shikulu wakwe. ¹⁹ Napanuma yanshita iitali Shikulu wabalya babomfi abwelele nokukwisa bepusha pafyo abashilile. ²⁰ Umubomfi uwapokele amatalanta yasano aishile nokuleta nayambi yasano. Alandile, 'Shikulu, mwampele amatalanta yasano. Moneni, ninundapo amatalanta nayambi yasano.'

²¹ "Shikulu wakwe alandile kuli ena, 'Wacita bwino, wemubomfi wacishinka kabili umusuma! Wali uwacishinka napafintu ifinono. Ndekubika bukasunga bwafintu ifingi. Ingila mukusansamuka kwakwa shikulu obe.'

²² "NOmubomfi uwapokele amatalanta yabili aishile nokulanda ati, 'Shikulu, mwampele amatalanta yabili. Moneni, ninundapo nayambi yabili.'

²³ "Shikulu wakwe alandile kuli ena, 'Wacita bwino wemubomfi wacishinka kabili umusuma! Wali uwacishinka namufintu ifinono. Ndekucita bukasunga bwafintu ifingi. Ingila mukusansamuka kwakwa shikulu obe.'

²⁴ "Nomba umubomfi uwapokele italanta limo aishile nokulanda ati, 'Shikulu, nalishiba ati muli muntu uwashupa. Musepa umo tamwabyele, nokusombola umo tamwatandile. ²⁵ Nalyumfwile umwenso ecalengele ukuyafisa italanta lyenu mumushili. Moneni, italanta lyenu ili.'

²⁶ "Nomba shikulu wakwe alimwaswike nokulanda kuli ena ati, 'Uli mubomfi uwabipa kabili umunang'ani, waishibe ukweba ati nsombola umo nshabyele nokusepa umo nshatandile. ²⁷ Kanshi ngawapele indalama shandi kuli bakasunga bandalama, pakweba ati nganaisa naisasanga indalama shandi nashilundyapo. ²⁸ Eico pokeni italanta kuli ena nokupela kumubomfi uyo uukwete amatalanta ikumi limo. ²⁹ Pantu kuli onse uwakwata, akapelako ifingi-kabili mukufusha. Nomba kuli uyo uushakwata icili shonse, naconse ico akwata cikapokwa kuli ena. ³⁰ Poseni umubomfi uwabula umulimo kunse ukuli imfimfi, ukukaba ukulila nokusumanya ameno.'

³¹ "Ilyo Umwana mwaume wa Muntu akesa mululumbi lwakwe pamo nabangeli, akekala pacitebe cakwe icalulumbi. ³² Kuli ena kukakolonganikwa ifyalo fyonse, akalekanya abantu umo nomunankwe, ngefyo umucemi alekanya imikoko nembushi. ³³ Akabika imikoko kukuboko kwa kukulyo, nembushi nasho kukuboko kwakwe ukwa kukuso. ³⁴ Nomba imfumu ikalanda kulya abo abakaba kukuboko kwakwe ukwakulyo, 'Iseni, bonse mwebapalwa bakwatata, pyaneni ubufumu ubo bamipekanishisha ukufuma kukutampa kwacalo. ³⁵ Pantu Nebo ilyo nalinensala mwalimpele ifyakulya; Nebo nali necilaka mwali mpele icakunwa; Nebo nali umweni mwalimpokelele; ³⁶ Nebo nali uwabwamba mwalimfwikile; Nebo nali umulwele mwalinsungile; Nebo nali mucufungo mwalishile mukumbona.'

³⁷ "Abalungami bakasuka nokulanda ati, 'Shikulu, nilisa mwali nensala twamipala ifyakulya? Nangu nilisa mwali necilaka twamipala icakunwa? ³⁸ Nilisa twamimwene ngabeni nokumipokelela? Nangu bwamba twamifwika? ³⁹ Nilisa twamimwene abalwele nangu umufungwa nokumitandalila?'

⁴⁰ "Nemfumu alinokwasuka nokulanda kuli bena, 'Cine cine ndelanda kuli mwebo, ifyo mwacitile kuli uyo uwacepasha muli bamunonko, ninebo mwabombele.' ⁴¹ Nomba alandile kuli abo abali kukuboko kwakwe ukwa kukuso, 'Fumeni kuli nebo, mwebatipwa, ingileni mumulilo wape uyo bapekanishisha ciwa nabangeli bakwe, ⁴² pantu Nebo nali nensala, tamwampeleko ifyakulya; Nebo nali necilaka, tamwampele icakunwa; ⁴³ Nebo nali umulendo, tamwampokelele; uwabwamba, tamwampele ifyakufwala; umulwele nomufungwa, nomba nebo tamwansungile.'

⁴⁴ "Nomba bakasuka nokulanda ati, 'Kuuku, nilisa twamimwene abansala, nangu abacilaka, nangu abalendo, nangu ababula ifyakufwala, nangu abalwele, nangu umufungwa, nokukana myangwa?'

⁴⁵ "Nomba ena akabasuka nokulanda kuli bena ati, 'Cine cine ndelanda kuli mwebo, ico conse ico tamwacitile kubacepesha muli aba, ninshi tamwacitile kantu kuli nebo.' ⁴⁶ Aba bali nokuya kukukandwa kwamuyayaya, lelo abaololoka kubumi bwa pe na pe."