Icipande 24
1
Yesu alifumine mucilonganino alaya. Abasambi bakwe balishile kuli ena mukumusontelela ifikulwa fya cilonganino.
2
Nomba alyaswike nokulanda kuli bena ati, "Bushe tamulemona ifi fyonse? Mu cine cine ndelanda kuli mwebo, takuli ilibwe likashala pali libwe ilishakaposwe panshi."
3
Ilyo aikele palupili lwa Miolifi, abasambi baishile kuli ena munkama nokulanda ati, "Twebeni, nilisa ilyo ifi fintu filinokucitika? Fishibilonshi ifyakubwela kwenu nokupwa kwanshita?
4
Yesu alyaswike nokulanda kuli bena ati, "Cenjeleni ukuti nangu umo emibepa.
5
Pantu abengi bakeshila mwishina lyandi. Bakalanda ati, 'Ninebo Kristu,' nokutungulula abengi ukuya mukuluba.
6
Mukomfwa inkondo namalyashi yankondo. Moneni ukweba ati tamutinine, ifi fyonse filinokucitika; Nomba impela ninshi icili tailafika.
7
Icalo cikemina icalo cinankwe, nobufumu bukemina ubufumu bunakwe. Kukaba ifipowe nefinkukuma muncende shimo shimo.
8
Nomba ifi fyonse ekutampa kwamacusho yakupapa.
9
Elyo bakamipeela kubucushi nokumipaya. Mukapatwa kumishobo yonse pamulandu weshina lyandi.
10
Abengi bakaipununa, nokuikana nokupatana.
11
Bakasesema babufi bakema nokutungulula abengi mukuluba.
12
Pantu ububi bukafulisha, eico necitemwiko cakutemwana cikacepa.
13
Nomba uukashipikisha ukufika nakumpela eukapusuka.
14
Imbila nsuma iyabufumu iyi ikabilwa kucalo conse kukuba bukambone kumishobo yonse. Nomba impela ikesa.
15
"Eico, ilyo mwamona icamuselu icabonaushi, icalandilwe na Danieli kasesema, naciminina umwa mushilo" (Uulebelenga eluke),
16
"Elyo abakaba mu Yudeya bakabutukile mumpili,
17
uukaba pamutenge wang'anda ekakoka mukubuula ifipe fyakwe mung'anda,
18
noyo onse uuli mwibala ebwela mukusenda insalu shakwe.
19
Nomba ubulanda kulyabo abakaba namafumo naba kalaonsha abana muli isho nshiku!
20
Mulepepa Lesa ukuti mwikabutuka munshita yampepo nangu peSabata.
21
Pantu kukaba ubucushi, ubushatala abubako ukufumafye kukutampa kwacalo ukufika nelelo. Takwakatale akuba napeka.
22
Ngaengakana ukucefyako ishonshiku, takuli nangu umo uwingapusuka. Nomba pamulandu wabasalwa isho nshiku shikacefiwako.
23
Elyo umo nga alanda kuli mwebo ati, 'Moneni, Yesu alipano!' Nangu, 'Uyo alipalya mwikasumina.
24
Pantu ba kristu babufi na bakasesema babufi bakeema nokulange fishibilo fikalamba nefyakupapa ifyakubepaikilako, ngacingacitwa, kumo naba salwa.
25
Moneni, Nebo namyebela limo kuntanshi yanshita.
26
Eico, ngabamyeba ati, 'Moneni, ali muciswebebe,' mwikayako kuciswebebe. Nangu, 'Moneni, uyo alimukati kamuputule,' mwikasumina.
27
Ngefyo akalumba kafuma kukabanga nokumoneka kumasamba, efyo cikaba nokwisa kwamwana wamuntu.
28
Uko konse ukuli icitumbi, eko amakubi yakolongana.
29
"Nomba panuma yabucushi ngabwapita akasuba kakafiita, nomwenshi tawakabale, nentanda shikapona ukufuma mumulu, namaka yamumulu yakatenkana.
30
Elyo ifilangililo fya Mwana mwaume wa Muntu fikamoneka mumulu, nabantu bapano calo bakalila imisowa. Elyo bakamona Umwana mwaume wa Muntu aleisa mumakumbi no bukata ubukulu.
31
Akatuma bamalaika neciunda icikulu icamapenga, elyo bakakolonganika capamo abasalwa bakwe ukufuma mutupinda tune, ukufuma ukwatampila umulu ukufika uko wapelela.
32
"Natusambilile kucimuti camukunyu, ilyo imisambo yatampa ukuba iiteku nokutampa ukufumya amabula, mwishibe ukuti amainsa yapalama.
33
Nelyo, mwamona ifintu fyonse, mwishibe ukuti ali mupepi, pamwinshi.
34
Mu cine cine ndelanda kuli mwebo, ino nkulo tayakapite kano fyonse fikacitike.
35
Umulu ne calo fikapita, nomba amashiwi yandi tayakapite.
36
Nomba ubushiku bulya nakashita kalya takwaba waishiba, nangu nibamalaika bamumulu, nangu Mwana umwaume, kano Tatafye eka.
37
Ngefyo cali munshiku shakwa Nowa, efyo nokwisa kwa Mwana umwaume wa Muntu kukaba.
38
Pantu efyo cali namunshiku shilya pantanshi yalyeshi balenwa nokulya, baleupa nokuupwa ukufika na panshita Nowa aingile mubwato,
39
tabaishibe nangu kamo mpakafye nelyeshi lyaisa nokusenda bonse-efyo nokwisa kwa Mwana mwaume wa Muntu kukaba.
40
Elyo abaume babili bakaba mwibala-umo akasendwa, umbi nao akashala.
41
Abanakashi babili bakaba mukutwa, umo bakamupita umbi nao akashala.
42
Eico mwishipula, pantu tamwaishiba ubushiku kuuku akesa.
43
Nomba ishibeni ici, umwine wang'anda ngaalishibe inshita iyo umung'o alaisa, ngalishibwike ngatasuminishe ukumwibila.
44
Eico mube abaiteyanya, pantu Umwana mwaume wamuntu akesa panshita iyo tamwaishiba.
45
"Ngakanshi ninani umubonfi wacishinka uo Shikulu wakwe aisalile muba mung'anda yakwe pakuti abapele ifyakulya panshita iisuma?
46
Alishuka uyo musha uo shikulu wakwe akamusanga alecita ifyo ilyo ena akesa.
47
Mu cine cine Nebo ndelanda kuli mwebo ati Shikulu akamusansabika pali fyonse ifyo akwata.
48
Nomba umubomfi umubi alanda mumutima wakwe, 'Shikulu wandi akokola,'
49
nokutampa ukuuma ababomfi banabo, nokuya mukunwa nabacakolwa,
50
elyo Shikulu waulya mubomfi akesa pabushiku ubo ulya mubomfi takeshibe nakashita ako takeshibe.
51
Shikulu wakwe akamuputaula mutupimfya nokumupatwilo bwikalo nabambikishi, uko ukukaba ukulosha nokusumanya ameno.