¹ Elyo Yesu alandile kucintu bwingi nakubasambi bakwe. ² Alandile ati, "Bakalemba nabafalise bekala pacipuna cakwa Mose. ³ Eico conse ico bamyeba ukucita, mulecita nokufilama. Nomba mwikonkelesha ifyo bacita, pantu ifintu ifyobalanda nomba bena tefyo bacita. ⁴ Eee, bakaka ifipe ifyafina kukusenda, nokufibika pafipeya fyabantu. Lelo bena tabesha nokukumyako umunye kukufisenda. ⁵ Babomba ifintu pakuti bamonwe nabantu. Pantu balapanga ifyakuikobeka ifingi, nokukusha imikansu yabo. ⁶ Batemwa incende isha bushimucindikwa kumitebeto nefipuna fikulu muma Sinagogo, ⁷ nokulapelwa umucinshi muma maliketi, nokulaitwa ati, 'Kasambilisha' kubantu. ⁸ Nomba mwilabeta ati, 'Kasambilsha,' pantu imwe mwakwatafye kasambilisha umo, nomba mwebo bonse muli ba munina. ⁹ Mwita umuntu mucalo ati tata, mwakwatafye tata umo, uwaba mu muulu. ¹⁰ Takuli uwakwitwa 'kasambilisha' kuli mwebo kwaba fye kasambilisha umo mpo, ni Kristu. ¹¹ Nomba umukalamba pali mwebo akaba umubomfi. ¹² Pantu abaimya pamulu bakakoshiwa naba ikosha bakapilushiwa pamulu.

¹³ Nomba bulanda kuli imwe, ba kalemba na ba Faliseo, mweba bumi munda! Mwisalila ubufumu bwa mumulu ku bantu. Pantu mwebo tamumfwaya ukwingilamo iyoo, nangu kulekela abakusumina basumine iyoo. ¹⁴ "Mweba bumi munda, bakalemba naba Faliseo, mulya mung'anda yaba mukamfwilwa, nokupepa amapepo ayatali, mukapokelela ukukandwa." ¹⁵ Bulanda kuli mwebo, bakalemba naba Falise, ba bumi munda! Kuli mwebo mulashunguluka ponse pamenshi namu calo nokulenga umo ukusanguka, ilyo umo apanga filya mwamupanga uwabifya saana imiku ibili aba umwana wamu gehena nga mwebo.

¹⁶ "Bulanda kuli mwebo mwentungulushi mpofu, mwebo mwebalanda ati, "Mwebalapa mucilonganino, cilifye tacili kantu. Nomba uyo onse uwalapa golide wacilonganino, nakakililwa kumu lapo wakwe.' ¹⁷ Muli mpofu ishatumpa! Icikulu cinshi, pali golide nangu cilonganino icipanga golide ukuba uwamushilo? ¹⁸ Kabili, 'Uwalapa pa bulambo, tacili cintu. Nomba uwalapa pa cabupe icilipo, aba uwakakililwa kumulapo wakwe.' ¹⁹ Mwebantu impofu! Icikulu cinshi pa cabupe nangu ubulambo ubupanga icabupe ukuba icamushilo? ²⁰ Eico, uwalapa pa bulambo alapa na pali fyonse ifilipo. ²¹ Uwalapa pa cilonganino nalapa na onse uwikala mucilonganino. ²² No walapa umulu alapa icitebe cakwa Lesa no waikalapo.

²³ Bulanda kuli mwebo, ba Kalemba na ba Falise, ba bumbi munda! Pantu mulapela icekumi ca miti na dilo na semini, nomba mulasha ifyakosa pe funde-umulinganya, umutende, no luse na bucishinka. Nomba tulebomba fyonse nomba twilashapo fimbi ukufibomba. ²⁴ Mwentungulushi impofu, mweba filwa ukumina akashishi lelo mwamina ingamali!

²⁵ "Bulanda kuli mwebo, bakalemba na ba Falise, ba bumbi munda, Pantu mwebo musamfya kapu ne mbale kunse, nomba mukati mwiswilefye ifiko na ukuikopeka mwebene. ²⁶ Mwe ba Falise impofu! Wamyeni mukati ka kapu ne imbale, pakuti nakunse kwingaaluka ukwabuuta.

²⁷ "Bulanda kuli imwe ba kalemba na ba Falise, ba bumbi munda, pantu mwaba nge nshishi isha samfiwa, ishimoneka bwino kunse, nomba shaisula amafupa yabafwa ne fyakowela fyonse. ²⁸ Munshila imoine, mula moneka abaololoka kunse kubantu, mukati muli ba bumbi munda aba talamina amafunde.

²⁹ "Bulanda kuli imwe, bakalemba na ba Falise, ba bumbi munda, mwebakula inshishi yakwa kasesema no kuwamya imanda ya bololoke. ³⁰ Nokulanda ati, 'Ngafwebo atubako munshiku sha fikolwe, nga tatwali nabo pamo mukusumya umulopa waba kasesema.' ³¹ Eico mulayesha mwebene kuti muli abaana baume ba abo baipeye ba kasesema. ³² Naimwe isusheni imilingo ya fikolwe fyenu. ³³ Mwensoka, mwebana ba mafolo, mukapusushiwa shani kubupingushi bwa mumulilo? ³⁴ Eico, moneni, Nebo ndi nokumitumina ba kasesema nabamano nabakalemba. Bamo mukepaya no kutanika, elyo bambi mukabalopaula muma Shinagogo yenu no kubatafya mumusumba no musumba. ³⁵ Nefika fumamo pali mwebo umulopa onse wabaololoka uyo uwasumine mu calo, ukaba pali imwe, ukufuma kumulopa wakwa Abele uwakaele, no mulopa wakwa Sakalia, mwana Belekia, uo mwaipeye pakati ka ukwashila noubulambo. ³⁶ Icine cine ndi mukulanda kuli mwebo, ifi fyonse fikesa muli shino nkulo.

³⁷ Yelusalemu, Yelusalemu, wewipaya ba kasesema no kusula abatumwa kuli mwebo nokubapola amabwe! Ninshita shinga nakabila ukukolonganika abana bobe, filya munkoko afukatisha utwana twakwe mumapapi yakwe, nomba mwalikana! ³⁸ Moneni, ing'anda yenu yashilwa kuli mwebo icibolya. ³⁹ Pantu Nebo ndi mukulanda kuli mwebo ati, Mwebo tamwakambone nebo ukufuma nomba ukufika ilyo mwebo mukalanda ati, 'Alipalwa uyo uwaishila mwishina lya kwa Kuuku."'