¹ Yesu alandile kuli bena napeka mumilumbe, alandile ati, ² "Ubufumu bwamumulu bwapala imfumu iyapekenye umutebeto wabwinga bwamwana wakwe umwaume. ³ Atumine ababomfi ukuyaita bonse abalalikwe ukuti bengesa kumutebeto wabwinga, nomba tabaishile. ⁴ Peka imfumu yatumine nabambi ababomfi, yalandile ati, 'Ebeni bonse abalalikwe, "Moneni, nimpekanya icakulya cacungulo. Ing'ombe notuombe twandi utwaina natwipaiwa, nefintu fimbi nafipekanishiwa. Iseni kumutebeto wabwinga.'" ⁵ Nomba tabaumfwile baile nakumbi, umo kumabala, naumbi kumakwebo. ⁶ Bambi bakwete ababomfi bamfumu, nokubalenga insoni, nokubepaya. ⁷ Imfumu yalifulilwe, nokutuma abashilika ukuya ipaya bonse bakepaya nokoca umusumba. ⁸ Nomba yalandile kubabomfi bakwe ati, 'Ubwinga nabupalama, nomba bonse abalalikwe tabalingile. ⁹ Eico kabiyeni mumasansa yamisebo ikalamba muciluke nokulalika bonse abantu kumutebeto wabwinga kulyabo bonse abomulesanga.' ¹⁰ Ababomfi bafumine nokuya mumisebo ikalamba nokubalonganya abantu bonse abobasangile, bonse ababi nabasuma. Elo ing'anda yabwinga yaiswile bonse abalalikwe. ¹¹ Nomba ilyo imfumu yaishile mukati kukumona bonse abalalikwe, amwene umwaume uyo uushakwete insalu yabwinga. ¹² Nemfumu yalandile kuli ena ati, 'Cibusa, wingile shani muno ukwabula insalu yabwinga?' Nomba umwaume talandile kantu nangu kamo. ¹³ Nomba imfumu yalandile kubabomfi, 'Mukakeni uyu mwaume amaboko namolu, nokumuposa kunse ukwaba imfifi, uko ukukaba ukulila nokusumanya ameno.' ¹⁴ Pantu abengi abantu balitwa, nomba abanono ebasalwa."

¹⁵ Nomba aba Farise baile nokuya anshika umwaku kwatila Yesu mukulanda kwakwe. ¹⁶ Nomba batumine abasambi bakwe kuli ena, pamo nabena Helodi. Balandile kuli Yesu ati, "Kafundisha, twalishiba ukuti muli bacine, kabili mufundisha inshila yakwa Lesa mucine. Mulasakamana namatontonkanyo yamuntu onse, nakabili tamulanga kapatulula pakati kabantu. ¹⁷ Elo twebeni, bushe cinshi uli mukutontonkanya? Bushe cemfunde ukupela umusonko kuli Kaisala nangu iyo?"

¹⁸ Nomba Yesu pakwishiba ububi bwabo nokulanda ati, "Cinshi mwebo mulenjesesha, mwebabumumbi munda? ¹⁹ Nangeni indalama yamusonko." Nomba baletele denalyasi kuli ena. ²⁰ Yesu alandile kuli bena ati, "Bushe cipasho neshina lyakwa nani ifi fili apa?"

²¹ Balandile kuli ena ati, "Fyakwa Kaisala." Nomba Yesu alandile kuli bena ati, "Kanshi peni ifyakwa Kaisala kuli Kaisala, nakuli Lesa ifintu fyakwa Lesa." ²² Ilyo baumfwile ici, bali papile. Nomba bena balimushile nokuya baya.

²³ Muli bulya bushiku bamo abamu ba Saduki, abo abali mukulanda ati takwaba ukubushiwa, baishile kuli ena. Balimwipwishe, ²⁴ balandile ati, "Kafundisha, Mose alandile ati, 'Ngacakuti umwaume afwa, takwetepo umwana, munina kuti aupa umukashi wakwe nokukwata abana bakwa munyina.' ²⁵ Kwali bamunyina cine lubali. Uwakutampilapo alyupile nokufwa. Tashilepo umwana, ashilefye umukashi kuli munyina. ²⁶ Nowa cibili munyina acitile icintu cimo cine, nowacitatu, ifyo fine nakuwalenga cine lubali. ²⁷ Panuma yaaba bonse, umwanakashi alifwile. ²⁸ Nomba mukututubuka, bushe akaba mukashi wakwa nani pali balya cine lubali? Pantu bena bonse balimupileko."

²⁹ Nomba Yesu alibaswike alandile kuli bena ati, "Mwaliluba pantu mwebo tamwaishiba umwalola amalembo nangu amaka yakwa Lesa. ³⁰ Pantu mukubuka tabopa nangu ukupwa. Pantu, bena balikwati ni bamalaika mumulu. ³¹ Nomba palwa kubuka kwabafwa, bushe tamwabelanga ifyo calandilwe kuli mwebo kuli lesa, alandile ati, ³² Ndilesa wakwa Abulahamu, Lesa wakwa Isaki, kabibili Lesa wakwa Yakobo'? Lesa te Lesa wabafwa, lelo wabatuntulu." ³³ Ilyo amabumba yabantu yaumfwile ici, basungwike kukufundisha kwakwe.

³⁴ Nomba ilyo abafaliseo baumfwile ati Yesu natalalika abasaduki, bakolongene bonse capamo. ³⁵ Umo pali bena, uwaishiba amafunde, aipwishe ena ilipusho, ukumwesha ena- ³⁶ "Kafundisha, lifundenshi ilikalamba muma funde?"

³⁷ Yesu alandile kuli ena, "'Uletemwa Kuuku Lesa obe nomutima obe onse, nomweo obe onse, namano yobe onse.' ³⁸ Ili elikalamba kabili elyantanshi. ³⁹ Nefunde lyacibili lintu lyapala ili- 'Temwa umwina mupalamano ngefyo waitemwa,' ⁴⁰ Muli ayamafunde yabili epashintilila yonse nabakasesema."

⁴¹ Nomba ilyo bali nabakolongana bonse capamo, Yesu alibe pwishe icipusho. ⁴² Alandile ati, "Bushe mutontonkanya shani palwa kwa Kristu? Umwana mwaume wakwa nani?" Balandile kuli ena ati, "Mwana mwaume wakwa Davidi."

⁴³ Yesu alandile kuli bena, "Ngakanshi cinshi Davidi amwitila mumupashi ena ati Kuuku, alandile ati, ⁴⁵ Nga Davidi nomba ali mukumwita Kristu 'Kuuku,' Kuti aba nani umwana umwaume uwakwa Davidi? ⁴⁶ Takwali nangu umo uwayaswike, nangu umo umwaume uwamwipwishemo ifipusho ukufuma palibulya bushiku.